குன்னூர், நவ.18 : குன்னூர் ஊராட்சி சார்பில் பல்வேறு பகுதிகளில் நடந்த வாக்காளர் பட்டியலில் திருத்தம் செய்யும் பணிகளை திமுக ஒன்றிய செயலாளர் பிரேம்குமார் ஆய்வு மேற்கொண்டார். வாக்காளர் பட்டியலில் பெயர் சேர்ப்பு, நீக்கம் உள்ளிட்ட திருத்த பணிகள் சனி, ஞாயிற்றுக்கிழமைகளில் தமிழகம் முழுவதும் சிறப்பு முகாம் நடைபெற்று முடிந்தது. அதன்படி நீலகிரி மாவட்டம் குன்னூர் நகரம், பேரூராட்சி மற்றும் ஒன்றியத்திற்குட்பட்ட பல்வேறு பகுதிகளில் இந்த பணிகள் சிறப்பாக நடைபெற்று முடிந்தது.
மேலும் குன்னூர் ஊராட்சிக்கு உட்பட்ட நஞ்சப்பசத்திரம், பர்லியார், பழத்தோட்டம் உட்பட பல்வேறு பகுதிகளில் இந்த பணிகள் நடைபெற்றது. அதன் ஒரு பகுதியாக பர்லியார் அங்கன்வாடி மையத்தில் முகாம் நடைபெற்றதையொட்டி, வாக்காளர் பட்டியலில் பெயர் சேர்ப்பது, நீக்குவது, திருத்துவது, முகவரி மாற்றம் செய்வது போன்ற பணிகள் நடைபெற்றது. இதில் இளைய வாக்காளர்கள் தங்களது பெயர்களை வாக்காளர் பட்டியலில் பதிவு செய்து மகிழ்ந்தனர்.
இவ்வாறு நடந்து வரும் இந்த பணிகளையும், வாக்காளர் பட்டியல்களையும் அலுவலர்களிடமிருந்து பெற்று கொண்டு குன்னூர் ஒன்றிய திமுக செயலாளர் பிரேம்குமார் ஆய்வு மேற்கொண்டதோடு, இந்த முகாமை அனைத்து வாக்காளர்களும் பயன்படுத்தி கொள்ளுமாறு அறிவுரைகளும் வழங்கினார். இந்த ஆய்வின்போது ஒன்றியக்குழு உறுப்பினர் மகாலிங்கம் மற்றும் ஜெயராஜ் ஆகியோர் உடனிருந்தனர்.
The post பல்வேறு பகுதிகளில் வாக்காளர் பட்டியல் திருத்தம் செய்யும் பணி appeared first on Dinakaran.
