புதுச்சேரி, நவ. 18: புதுச்சேரியில் பல்வேறு இடங்களில் பைக்குகளை திருடிய 3 வாலிபர்களை லாஸ்பேட்டை போலீசார் கைது செய்தனர்.  புதுச்சேரி கருவடிக்குப்பம் சிவாஜி சிலை அருகே லாஸ்பேட்டை இன்ஸ்பெக்டர் இனியன், சப்-இன்ஸ்பெக்டர் அன்சர் பாஷா தலைமையிலான போலீசார் நேற்று முன்தினம் மாலை தீவிர வாகன சோதனை மேற்கொண்டனர். அப்போது அவ்வழியே ஒரே பைக்கில் 3 பேர் வந்தனர். அந்த பைக்கை தடுத்து, ஆவணங்களை கேட்டபோது அது திருட்டு வண்டி என தெரியவந்தது.

இதையடுத்து பைக்குடன் 3 பேரையும், காவல் நிலையம் அழைத்து வந்து விசாரணை நடத்தினர். அதில், திருபுவனைபாளையம் பாரதிதாசன் நகரை சேர்ந்த ரியாஸ் அகமது (21), வாணரப்பேட்டையை சேர்ந்த சஞ்சய் (எ) சொம்பு (20), முதலியார்பேட்டை அனிதா நகரை சேர்ந்த சிவகுமார் (22) என்பதும், லாஸ்பேட்டையில் 2 இடங்களிலும், ரெட்டியார்பாளையம் காவல் சரகத்தில் ஒரு இடத்திலும் என மொத்தம் 3 பைக்குகள் திருடியது தெரியவந்தது. இதையடுத்து 3 பேரையும் போலீசார் கைது செய்தனர். அவர்களிடம் இருந்து 3 பைக்குகளையும் பறிமுதல் செய்தனர். பின்னர் அவர்களை மாஜிஸ்திரேட் முன் ஆஜர்படுத்தி காலாப்பட்டு சிறையில் அடைத்தனர்.

The post வாகன சோதனையில் சிக்கினர் பைக்குகளை திருடிய 3 வாலிபர்கள் கைது appeared first on Dinakaran.