நெல்லை: நெல்லை மேலப்பாளையத்தில் அமரன் படம் திரையிடப்பட்டுள்ள திரையரங்கத்தில் இன்று அதிகாலையில் மர்ம நபர்கள் பெட்ரோல் குண்டுகளை வீசிவிட்டு தப்பி ஓடிவிட்டனர். இதுகுறித்து மேலப்பாளையம் போலீசார் வழக்குபதிந்து சிசிடிவி காட்சிகளின் அடிப்படையில் மர்ம நபர்களை தேடி வருகின்றனர். நெல்லை மேலப்பாளையத்தில் மல்டிபிளக்ஸ் திரையரங்கம் அமைந்துள்ளது. இந்த திரையரங்கத்தில் அமரன் திரைப்படம் திரையிடப்பட்டுள்ளது. இந்த திரைப்படத்தில் முஸ்லிம்களை தீவிரவாதிகளாக சித்தரிக்கப்பட்டுள்ளதாக பரவலாக எதிர்ப்பு கிளம்பியது.

இந்நிலையில் இன்று அதிகாலையில் இரண்டு மர்ம நபர்கள் திரையரங்கத்தின் மீது மூன்று பெட்ரோல் குண்டுகளை வீசி விட்டு தப்பி ஓடிவிட்டனர். இதைத்தொடர்ந்து அங்கு பாதுகாப்பு பணியில் இருந்த காவலாளிகள் வெடி சத்தம் கேட்டு ஓடிவந்து பார்த்தனர். அப்போது பெட்ரோல் குண்டுகள் வீசப்பட்டு பாட்டில்கள் உடைந்து சிதறிக் கிடந்தது. இதுகுறித்து தகவல் அறிந்ததும் சம்பவ இடத்துக்கு விரைந்து வந்த மாநகர போலீஸ் துணை கமிஷனர் விஜயகுமார், மேலப்பாளையம் போலீசார் விசாரணை நடத்தினர். இதைத்தொடர்ந்து திரையரங்கத்தில் பொருத்தப்பட்டுள்ள சிசிடிவி காட்சிகளை ஆய்வு செய்தனர். அதில் இரு மர்ம நபர்கள் சாதாரணமாக நடந்து வந்தனர்.

திரையரங்கம் முன்பாக வந்த அவர்கள் கையில் வைத்திருந்த 3 பெட்ரோல் குண்டுகளை தீ பற்ற வைத்து திரையரங்கத்தின் மீது எறிந்து விட்டு தப்பி ஓடிய காட்சிகள் பதிவாகி இருந்தது. இதுகுறித்து மேலப்பாளையம் போலீசார் வழக்குபதிந்து விசாரணை நடத்தி வருகின்றனர். வெடிகுண்டு தடுப்புபிரிவு போலீசார் மற்றும் தடயவியல் பிரிவு போலீசார் சம்பவ இடத்துக்கு வந்து ஆய்வு செய்து கைரேகை மற்றும் தடயங்களை சேகரித்தனர். மேலும் அப்பகுதியில் உள்ள சிசிடிவியில் பதிவான காட்சிகளின் அடிப்படையில் போலீசார் பெட்ரோல் குண்டு வீசிய மர்ம நபர்களை தேடிவருகின்றனர். இந்த சம்பவம் அப்பகுதியில் பரபரப்பை ஏற்படுத்தி உள்ளது.

The post ‘அமரன்’ படம் திரையிட்டுள்ள நெல்லை தியேட்டரில் பெட்ரோல் குண்டுவீச்சு: மர்ம நபர்களுக்கு போலீஸ் வலை appeared first on Dinakaran.