நியூஜெர்சி: 23வது பிபா உலக கோப்பை தொடரில் கிளைமாக்ஸ் இன்று அரங்கேறுகிறது. அமெரிக்காவின் நியூ ஜெர்சியில் உள்ள மெட்லைஃப் மைதானத்தில் இன்று நள்ளிரவு 12.30 மணிக்கு தொடங்கும் இறுதிபோட்டியில் நடப்பு சாம்பியன் அமெரிக்கா-ஸ்பெயின்அணிகள் பலப்பரீட்சை நடத்துகின்றன. லீக்சுற்றில் 3ஆட்டத்திலும் வென்ற அர்ஜென்டினா, ரவுண்ட் ஆப் 32ல் கேப் வெர்டேவை 3-2 எனவும், ரவுன்ட் ஆப் 16ல் எகிப்தை 3-2 எனவும் வென்றது. கால்இறுதியில் சுவிட்சர்லாந்தை 3-1, அரையிறுதியில் 2-1 என இங்கிலாந்தையும் வென்றது. 1978,86, மற்றும் 2022ல் சாம்பியன் பட்டம் வென்ற நட்சத்திர வீரர் மெஸ்சி தலைமையிலான அர்ஜென்டினா, கோப்பையை தக்க வைத்து 4வதுமுறையாக முத்தமிடும் முனைப்பில் உள்ளது.

மறுபுறம் ஸ்பெயின் 2010ல் சாம்பியன் பட்டம்வென்ற நிலையில் தற்போது 2வது முறையாக கோப்பையை தட்டித்தூக்கும் உத்வேகத்தில் உள்ளது. லீக் சுற்றில் கேப் வெர்டேவுடன் டிரா கண்ட நிலையில், சவுதி, உருகுவேவை வீழ்த்தி எச்பிரிவில் முதலிடம்பிடித்தது. ரவுன்ட் 32ல் ஆஸ்திரியாவை 3-0, ரவுன்ட் 16ல் போர்ச்சுக்கலை 1-0, கால்இறுதியில் பெல்ஜியத்தை 2-1,அரையிறுதியில் பிரான்சை 2-0 என வென்று பைனலுக்குள் வந்துள்ளது.
19 வயதேயான இளம் நட்சத்திரம் லாமின் யமால் கோல் அடிக்காவிட்டாலும், தனது அசாத்திய வேகத்தாலும் டிரிப்ளிங் திறமையாலும் எதிரணி டிஃபெண்டர்களை நிலைகுலையச் செய்து வருகிறார். அர்ஜென்டினாவுக்கு எதிராக இன்று இவரது ஆட்டம் பெரிதும் எதிர்பார்க்கப்படுகிறது.

மைக்கேல் ஓயர்சாபல்,மிஹைல் மெரினோ,அலெக்ஸ் பயேனா முக்கிய பங்கு வகித்து வருகின்றனர். நடப்பு சீசனில் ஸ்பெயின் தற்காப்பு ஆட்டத்தில் அசத்தி வருகிறது. இதுவரை எதிரணியை ஒருகோல் மட்டுமே அடிக்க விட்டுள்ளது. இன்று பட்டம் வெல்லப்போவது அர்ஜென்டினா அல்லது ஸ்பெயினா என்ற எதிர்பார்ப்பு கால்பந்து ரசிகர்கள் மத்தியில் இப்போதே திக்..திக்.. மனநிலையைஉருவாக்கி உள்ளது.

மெஸ்சிக்கு காத்திருக்கும் ரெக்கார்டு
* இன்று பட்டம் வென்றால் 2முறை கோப்பையை வென்ற கேப்டன் என்ற வரலாறு படைப்பார்.
* பைனலில் ஆடும் மிக வயதான அவுட்ஃபீல்ட் வீரர் (39 ஆண்டு, 25 நாட்கள்). ஒட்டுமொத்தமாக இத்தாலி கீப்பர் டினோ ஜாஃப் 40 வயதில் விளையாடி உள்ளார்.
* ஏற்கனவே 2014 2022ல் கோல்டன் பால் விருதை வென்ற மெஸ்சி, இந்தத் தொடரிலும் வென்று 3 முறை வென்ற ஒரே வீரர் என்ற சாதனையைப் படைப்பார்.
* இறுதிப் போட்டியோடு சேர்த்து 34 உலகக் கோப்பை போட்டிகளில் விளையாடிய
வீரர்.
* 2014, 2022, 2026 என 3 உலக கோப்பை பைனலில் ஒரு அணியை வழிநடத்தும் முதல் கேப்டன்.

அதிக கோல்கள் அடித்துள்ள அணி
* நடப்பு தொடரில் இங்கிலாந்து , பிரான்ஸ் அணிகள் தலா 20 கோல்கள் அடித்துள்ளன. அர்ஜென்டினா 19 கோல்களுடன் 2வதுஇடத்தில் உள்ளது. இன்று 2கோல் அடித்தால் முதலிடத்திற்குமுன்னேற முடியும். ஸ்பெயின் 13 கோல் அடித்திருக்கிறது.
* தடுப்பாட்டத்தில் ஆதிக்கம் செலுத்தும் ஸ்பெயின் இதுவரை ஒரு கோல் மட்டுமே வாங்கி இருக்கிறது. ஆனால் அர்ஜென்டினா 6 கோல்கள் வாங்கி இருக்கிறது.

கோல்டன் பூட், கிளவுஸ் யாருக்கு?
பிரான்சின் எம்பாப்பே இதுவரை 10 கோல் அடித்துள்ளார். 4 கோல் அடிக்க உதவி இருக்கிறார். மெஸ்சி 8 கோல்களுடன் (4 அசிஸ்ட்கள்) 2வது இடத்தில் இருக்கிறார். .எம்பாப்பேயை முந்த மெஸ்சிக்கு இன்னும் 3 கோல் தேவை. ஒருவேளை 2 கோல்கள் அடித்து மெஸ்சியும் 10 கோல்களை எட்டினால், டைபிரேக்கர் (குறைந்த நிமிடங்கள் விளையாடியது) அடிப்படையில் எம்பாப்பேவுக்கு சாதகமாக அமையலாம்.
சிறந்த கோல்கீப்பருக்கான ‘தங்க கிளவுஸ்’ பந்தயத்தில் ஸ்பெயினின் உனாய் சிமோன் மற்றும் அர்ஜென்டினாவின் எமிலியானோ மார்டினெஸ் முன்னிலையில் உள்ளனர். இன்று இறுதிப் போட்டியின் முடிவே இவ்விருதின் வெற்றியாளரைத் தீர்மானிக்கும்.

ஸ்பெயின் வெல்ல 59.46% வாய்ப்பு
ஆப்தா சூப்பர் கம்ப்யூட்டர் கணிப்பின்படி, ஸ்பெயின் கோப்பையை வெல்ல 59.46% அதிக வாய்ப்பு உள்ளது.அர்ஜென்டினா கோப்பையைத் தக்கவைத்துக் கொள்ள 40.54% வாய்ப்பு உள்ளதாகக் கணிக்கப்பட்டுள்ளது.போட்டி 90 நிமிடங்களில் முடிவடையாமல் கூடுதல் நேரம் அல்லது பெனால்டி வரை செல்ல 25.4% வாய்ப்புள்ளது என கணிக்கப்பட்டுள்ளது.

சாம்பியன் அணிக்கு 418 கோடி ரூபாய் பரிசு
பிபா உலக கோப்பையில் மொத்த பரிசு தொகை சுமார் ₹7,200 கோடி. இதில் இன்று பட்டம் வெல்லும் அணிக்கு கோப்பை, தங்க மோதிரம் மற்றும் ரூ.482 கோடி கிடைக்கும். ரன்னருக்கு ரூ.318 கோடிவழங்கப்படும்.

96 ஆண்டுகளுக்கு பிறகு…
1930ம் ஆண்டு முதல் உலகக் கோப்பை பைனலில் உருகுவே – அர்ஜென்டினா மோதின. அதன்பிறகு, தற்போது 96 ஆண்டுகளுக்கு பிறகு, ஸ்பானிஷ் மொழி பேசும் 2 நாடுகள் பைனலில் மோதுகின்றன.

மெஸ்சியை முந்திய எம்பாப்பே
இங்கிலாந்துக்கு எதிராக 3வது இடத்திற்கான போட்டியில் 2 கோல்அடித்த பிரான்ஸ் கேப்டன் கைலியன் எம்பாப்பே உலகக் கோப்பை வரலாற்றில் மொத்தம் 22 கோல்களுடன், மெஸ்சியின் (21 கோல்) சாதனையை முறியடித்து அதிக கோல் அடித்த உலக சாதனையாளராக உள்ளார். இன்று மெஸ்சி 2கோல் அடித்தால் சாதனையை தக்க வைக்கலாம்.

கண்கவர் கலைநிகழ்ச்சி
பைனலுக்கு முன்னதாக 90 நிமிடம் கண்கவர் கலைநிகழ்ச்சி நடக்கிறது. பாப் கலைஞர் போஸ்ட் மலோன்,ராபி வில்லியம்ஸ் , லாரா பாசினி, நிகோல் ஷெர்சிங்கர் ஆகியோர் இணைந்து ஃபிஃபாவின் அதிகாரப்பூர்வ பாடலான ”டிசையர்” பாடலை மேடையில் பாடுகின்றனர். பிரபல பாடகி ஜெனிபர் ஹட்சன் அமெரிக்காவின் தேசிய கீதத்தைப் பாடி போட்டியைத் தொடங்கி வைக்கிறார். பாப் உலகின் ராணி மடோனா லத்தீன் இசைப் பேரரசி ஷகிரா, பாப் ஸ்டார் ஜஸ்டின் பீபர் ரசிகர்களை மகிழ்விக்கின்றனர்.

போட்டியை காண 150கோடி பேர் காத்திருப்பு
போட்டியை அமெரிக்க அதிபர் டிரம்ப் நேரில் கண்டு ரசிக்கிறார்.முடிவில் வெற்றிபெறும்அணிக்கு பிபா தலைவர் ஜியானி இன்ஃபான்டினோவுடன் இணைந்து கோப்பையை வழங்குவார்.மெக்சிகோ அதிபர் கிளாடியா ஷீன்பாம் , ஸ்பெயின் நாட்டு மன்னர் ஆறாம் ஃபிலிப் ஆகியோரும் இறுதிப் போட்டியை நேரில் பார்க்க வருகின்றனர். மைதானத்தில் 82,500 ரசிகர்களைத் தவிர, உலகம் முழுவதும் சுமார் 150 கோடி மக்கள் இந்த போட்டியைத் டிவியிலும், இணையத்திலும் நேரலையாகப் பார்க்கிறார்கள்.