வெண்கலப் பதக்கம் யாருக்கு?.. பிரான்ஸ் – இங்கிலாந்து பலப்பரீட்சை

மயாமி: ஃபிபா உலக கோப்பை கால்பந்து போட்டித் தொடரில் 3வது இடம் யாருக்கு என்பதை தீர்மானிப்பதற்கான போட்டியில் பிரான்ஸ்-இங்கிலாந்து அணிகள் இன்று இரவு 2.30க்கு பலப்பரீட்சையில் இறங்குகின்றன. அமெரிக்கா, மெக்சிகோ, கனடா நாடுகள் இணைந்து நடத்தி வரும் இந்த தொடர் நாளையுடன் நிறைவடைய உள்ளது. மொத்தம் 48 அணிகள் 12 பிரிவுகளாக லீக் சுற்றில் மோதிய நிலையில், 32 அணிகள் நாக் அவுட் சுற்றுக்கு தகுதி பெற்றன. ரவுண்ட் ஆப் 32, ரவுண்ட் ஆப் 16, காலிறுதி சுற்றின் நிறைவில் பிரான்ஸ் ஸ்பெயின், அர்ஜென்டினா இங்கிலாந்து அணிகள் அரையிறுதியில் பலப்பரீட்சை நடத்தின.

முதலாவது அரையிறுதியில் ஸ்பெயின் அணி 2-0 என்ற கோல் கணக்கில் பலம் வாய்ந்த பிரான்ஸ் அணியை வீழ்த்தி பைனலுக்கு முன்னேறியது. 2வது அரையிறுதியில் அர்ஜென்டினா 2-1 என்ற கோல் கணக்கில் இங்கிலாந்தை போராடி வென்றது. சாம்பியன் யார் என்பதை தீர்மானிப்பதற்கான பைனலில் அர்ஜென்டினா ஸ்பெயின் அணிகள் நாளை நள்ளிரவு மோத உள்ள நிலையில், வெண்கலப் பதக்கத்துக்காக பிரான்ஸ் இங்கிலாந்து அணிகள் இன்று இரவு 2.30 மணிக்கு (ஞாயிறு அதிகாலை) பலப்பரீட்சை நடத்துகின்றன.

இப்போட்டியில், பிரான்ஸ் கேப்டன் எம்பாப்பே, டெம்பெலே, இங்கிலாந்து கேப்டன் ஹாரி கேன், ஜூட் பெல்லிங்காம் ஆகியோரது ஆட்டம் பெரும் எதிர்பார்ப்பை ஏற்படுத்தி உள்ளது. இரு அணிகளும் 3வது இடம் பிடிக்க மல்லுக்கட்டுவதால் ஆட்டம் மிகவும் சுவாரசியமாக அமையும் என எதிர்பார்க்கலாம்.

நிறைவு விழாவில் போஸ்ட் மலோன் இசை மழை
பிபா உலக கோப்பை கால்பந்து தொடர் பரபரப்பான இறுதிக் கட்டத்தை நெருங்கியுள்ளது. நாளை இரவு நியூ ஜெர்சி அரங்கில் நடைபெற உள்ள பைனலில் நடப்பு சாம்பியன் அர்ஜெண்டினா அணியுடன் ஸ்பெயின் மோதவுள்ளது. இந்த போட்டியின் இடைவேளையின்போது கோலாகலமான இசை, நடனத்துடன் கூடிய நிகழ்ச்சிக்கு ஏற்பாடு செய்யப்பட்டுள்ளது. 11 நிமிடங்களுக்கு நடைபெற உள்ள அந்த நிகழ்ச்சியில் பிரபல நட்சத்திரங்கள் ஷகிரா, மடோனா, ஜஸ்டின் பைபர் மற்றும் தென் கொரியாவின் பிடிஎஸ் குழுவினர் இசை மழை பொழிவதுடன் அச்சத்தலான நடனமும் ஆடி ரசிகர்களை மகிழ்விக்க உள்ளனர்.

வண்ண மயமான நிறைவு விழா
ஷகிரா, பைபர் நிகழ்ச்சி மட்டுமல்லாது இறுதிப் போட்டி தொடங்குவதற்கு ஒன்றரை மணி நேரம் முன்பாக வண்ணமயமான நிறைவு விழாவுக்கும் பிபா ஏற்பாடு செய்துள்ளது. அதில், உலக அளவில் பிரபலமான இசைக் கலைஞர், கவிஞர், நடிகர், தயாரிப்பாளர் என பன்முகத் திறமையுடன் கலக்கி வரும் அமெரிக்க பாடகர் போஸ்ட் மலோன் பங்கேற்று இசை மழை பொழிய உள்ளார். போஸ்ட் மலோன் மற்றும் பாலிக் ஒண்டர் ஸ்டுடியோ இணைந்து நிறைவு விழாவை வடிவமைத்துள்ளனர்.

பைனலில் நடுவராக வின்சிக் நியமனம்
அர்ஜென்டினா-ஸ்பெயின் அணிகள் மோதவுள்ள உலக கோப்பை பைனலுக்கான முதன்மை நடுவராக ஸ்லோவேனியாவை சேர்ந்த ஸ்லாவ்கோ வின்சிக் (46 வயது) நியமிக்கப்பட்டுள்ளார். உதவி நடுவர்களாக தாமஸ் கிளான்க்னிக், ஆந்த்ரஸ் கோவாசிச், ஆதம் மகமது (4வது நடுவர்), முகமது அல்கலாப் (ரிசர்வ் ரெப்ரீ) ஆகியோர் செயல்பட உள்ளனர்.

2022ல் கத்தாரில் நடந்த உலக கோப்பையில் அர்ஜென்டினா 1-2 என்ற கோல் கணக்கில் சவுதி அரேபியாவிடம் தோற்ற போட்டியில் ஸ்லாவ்கோ நடுவராக இருந்துள்ளார். ஸ்ட்ரிக்ட் ஆபீசரான இவர், நடப்பு தொடரில் மெக்சிகோவுடன் ஈக்வடார் மோதிய ரவுண்ட் ஆப் 32 ஆட்டத்தில் ஈக்வடாரின் பியரோ ஹின்கேபிக்கு ரெட் கார்டு காட்டி வெளியேற்றியது குறிப்பிடத்தக்கது. நடப்பு சாம்பியன் அர்ஜென்டினாவுக்கு ஆதரவாக ஃபிபா செயல்படுவதாக குற்றச்சாட்டு எழுந்த நிலையில், பைனலுக்கான நடுவராக வின்சிக் நியமிக்கப்பட்டுள்ளார்.