டாலஸ்: பிபா உலக கோப்பை கால்பந்து தொடரின் முதலாவது அரையிறுதியில் பலம் வாய்ந்த பிரான்ஸ் அணியுடன் மோதிய ஸ்பெயின் 2-0 என்ற கோல் கணக்கில் அபாரமாக வென்று இறுதிப் போட்டிக்கு தகுதி பெற்றது. அமெரிக்காவின் டாலஸ் அரங்கில் நடைபெற்ற இப்போட்டியில், கிலியன் எம்பாப்பே தலைமையிலான பிரான்ஸ் அணிக்கே வெற்றி வாய்ப்பு அதிகம் என கணிக்கப்பட்டிருந்தது.

ஆனால், ஸ்பெயின் வீரர்கள் பந்தை துல்லியமாக கடத்திச் செல்வதிலும், தற்காப்பு ஆட்டத்திலும் தங்களுக்கே உரிய தனித்துவமான திறமையை வெளிப்படுத்தி பிரான்ஸ் அணிக்கு தண்ணி காட்டினர்.குறிப்பாக, எம்பாப்பேவை சுதந்திரமாக செயல்படவிடாமல் சுத்து போட்டு நெருக்கடி கொடுத்தனர். 22வது நிமிடத்தில் பிரான்சின் டிக்னே ஸ்பெயினின் இளம் வீரர் லாமைன் யமாலை கீழே தள்ளிவிட்டு தவறிழைத்ததால் பெனால்டி கிக் வழங்கப்பட்டது.

அந்த வாய்ப்பை சரியாகப் பயன்படுத்திக்கொண்ட மைகேல் ஒயர்ஸபால் மின்னல் வேகத்தில் கோல் போட்டு ஸ்பெயின் அணிக்கு 1-0 என முன்னிலை கொடுத்தார். இடைவேளை வரை இதே நிலை நீடித்தது. இரண்டாவது பாதியில் பதில் கோல் அடிக்க பிரான்ஸ் வீரர்கள் பிரம்மப் பிரயத்தனம் மேற்கொண்டாலும், அவர்களால் ஸ்பெயின் கோல் கீப்பர் உனய் சைமனை தாண்டி பந்தை வலைக்குள் திணிக்க முடியவில்லை.

தற்காப்பு ஆட்டத்தால் பிரான்ஸ் தரப்பை விரக்திக்குள்ளாக்கிய ஸ்பெயின் அணி, அவ்வப்போது துல்லிய தாக்குதல்களையும் தொடுத்து திணறடித்துக் கொண்டிருந்தது. அதன் பலனாக 58வது நிமிடத்தில் பெட்ரோ போர்ரோ கோல் போட்டு அசத்த ஸ்பெயின் அணி 2-0 என முன்னிலையை அதிகரித்துக் கொண்டது. இதனால் கடும் நெருக்கடிக்குள்ளான பிரான்ஸ் வீரர்கள் பதற்றத்துடன் விளையாடி பல வாய்ப்புகளை வீணடித்தனர். விரக்தியின் உச்சத்துக்கே சென்ற கேப்டன் எம்பாப்பே செய்வதறியாது தளர்நடை போட்டார்.

ஆட்ட நேர இறுதிவரை பிரான்ஸ் அணியால் உனய் சைமனின் தற்காப்பு அரணை ஊடுருவவே முடியவில்லை. இறுதியில் ஸ்பெயின் அணி 2-0 என்ற கோல் கணக்கில் சாம்பியனாகும் வாய்ப்புள்ள அணியாகக் கருதப்பட்ட பிரான்சுக்கு அதிர்ச்சி தோல்வியை பரிசளித்து பைனலுக்கு முன்னேறியது. பெட்ரோ போர்ரோ ஆட்ட நாயகன் விருது பெற்றார்.

அர்ஜென்டினா இங்கிலாந்து அணிகளிடையேயான 2வது அரையிறுதியில் வெற்றி பெறும் அணியுடன் ஸ்பெயின் இறுதிப் போட்டியில் மல்லுக்கட்டும். ஸ்பெயின் அணி ஏற்கனவே ஒரு முறை உலக கோப்பையை முத்தமிட்டுள்ளது (2010) நிலையில், 2026 உலக கோப்பையில் சாம்பியன் யார் என்பதை தீர்மானிக்கும் பரபரப்பான பைனல், நியூயார்க், நியூ ஜெர்சி அரங்கில் இந்திய நேரப்படி ஞாயிறன்று நள்ளிரவு 12.30க்கு (திங்கள் அதிகாலை) நடைபெறும்.

* 37 போட்டியில் தோல்வியின்றி தொடரும் சாதனை பயணம்!
உலக கோப்பை அரையிறுதியில் பிரான்ஸ் அணியை வீழ்த்திய ஸ்பெயின் அணி ஒரு உலக சாதனையை சமன் செய்து அசத்தியுள்ளது. அந்த அணி தொடர்ச்சியாக 37 போட்டிகளில் தோல்வியடையாமல் (28 வெற்றி, 9 டிரா) இருந்து வருவது குறிப்பிடத்தக்கது.

அந்த வகையில் இத்தாலியுடன் (37 போட்டி, 2018-21) முதலிடத்தை பகிர்ந்துகொண்டுள்ள ஸ்பெயின் (2024…இதுவரை), நடப்பு தொடரின் பைனலிலும் வென்றால் புதிய சாதனை படைக்கலாம். அர்ஜென்டினா 2019-22ல் தொடர்ச்சியாக 36 போட்டியில் தோற்காமல் இருந்துள்ளது.

* ஸ்பெயின் 48% மற்றும் பிரான்ஸ் 44% நேரம் பந்தை தங்கள் கட்டுப்பாட்டில் வைத்திருந்தன.
* ஸ்பெயின் தரப்பில் 10, பிரான்ஸ் தரப்பில் 8 கோல் முயற்சிகள் மேற்கொள்ளப்பட்டன.
* தலா 2 ஷாட்கள் இலக்கு நோக்கி துல்லியமாக இருந்த நிலையில், ஸ்பெயின் கோல் கீப்பர் உனய் சைமன் சாகசத்தால் ஸ்பெயின் வெற்றி உறுதியானது.
* ஸ்பெயின் தரப்பில் 511 பாஸ், பிரான்ஸ் தரப்பில் 480 பாஸ் செய்யப்பட்டன. அதில் துல்லியமாக செயல்பட்டதில் ஸ்பெயின் 85%, பிரான்ஸ் 81%.
* ஒயர்ஸபால் ஸ்பெயின் அணிக்காக கடைசியாக விளையாடிய 20 போட்டிகளில் 18 கோல் அடித்துள்ளார். டேவிட் வில்லா (59), ரவுல் (44), டாரஸ் (38), அல்வரோ (37), டேவிட் சில்வா ஆகியோரைத் தொடர்ந்து 30+ கோல் அடித்த 6வது ஸ்பெயின் வீரர் என்ற பெருமையும் அவருக்கு கிடைத்துள்ளது.

* எங்களுக்கு தகுதியில்லை…
நாங்கள் நினைத்த வகையில் எங்களால் விளையாட முடியவில்லை. வியூகம் அமைப்பதிலும் அதை செயல்படுத்துவதிலும் ஒட்டுமொத்தமாக சொதப்பிவிட்டோம். நடுகளத்தில் ஸ்பெயின் மிகச் சிறப்பாக செயல்பட்டது. அவர்களை கட்டுப்பாட்டுக்குள் வைப்பது என்பது இயலாத காரியமாகிவிட்டதே எங்கள் தோல்விக்கு காரணம். மொத்தத்தில் இறுதிப் போட்டிக்கு முன்னேறுவதற்கான தகுதி எங்களிடம் இல்லை. பிரான்ஸ் கேப்டன் எம்பாப்பே

* 500 கிலோ இறைச்சி… அர்ஜென்டினா வெற்றி ரகசியம்!
நடப்பு சாம்பியனான அர்ஜென்டினா அணி கோப்பையை தக்கவைத்துக் கொள்வதற்காக முழுவீச்சுடன் போராடி வரும் நிலையில், வீரர்களின் உணவு தேவையை பூர்த்தி செய்வதிலும் கூடுதல் கவனம் செலுத்தி வருகிறது. இதற்காக கன்சாஸ் சிட்டியில் உள்ள முகாமுக்கு 500 கிலோ மாட்டிறைச்சியை கப்பலில் கொண்டு வந்து, தினந்தோறும் சுடச்சுட பார்பிக்யூ உணவு வகைகளை தயார் செய்து வழங்கி வருகிறார்கள். இதுவே அர்ஜென்டினா வீரர்களின் ஆற்றல் + வெற்றி ரகசியம் என்கிறார்கள்.