சென்னை: புழல் சிறையில் விசாரணை கைதி மர்மமான முறையில் உயிரிழந்தார். அவரை போலீசார் அடித்து கொன்றதாக உறவினர்கள் குற்றம்சாட்டியுள்ளனர். சென்னை புழல் விசாரணை சிறையில் சுமார் 3000க்கும் மேற்பட்ட கைதிகள் உள்ளனர். இதில் சேலையூர் ஜானகிராமன் தெருவை சேர்ந்தவர் பாலாஜி (44) என்பவரை, கஞ்சா வழக்கில் சேலையூர் போலீசார் கைது செய்து, கடந்த 12ம் தேதி புழல் சிறையில் அடைத்தனர். சர்க்கரை நோய் மற்றும் போதைக்கு அடிமையான பாலாஜி, பல்வேறு நோயால் அவதிப்பட்டு வந்ததாக கூறப்படுகிறது. இதனால், பாலாஜியை சிறையில் உள்ள மருத்துவமனையில் சேர்த்து, சிகிச்சை அளிக்கப்பட்டு வந்துள்ளது.

அங்கிருந்து, நேற்று காலை மேல் சிகிச்சைக்காக ஸ்டான்லி அரசு மருத்துவமனைக்கு போலீசார் அழைத்து சென்றனர். அங்கு, அவரை பரிசோதித்த மருத்துவர்கள், வரும் வழியிலே பாலாஜி இறந்துவிட்டதாக தெரிவித்தனர். இதுகுறித்த புகாரின்பேரில் புழல் போலீசார் வழக்கு பதிவு செய்து விசாரணை நடத்தி வருகின்றனர். இதுகுறித்து உயிரிழந்தவர்களின் உறவினர்கள் கூறுகையில், ‘பாலாஜி மீது, சேலையூர் காவல் துறையினர் பொய் வழக்கு போட்டு அவசர அவசரமாக நீதிபதி வீட்டில் ஆஜர்படுத்தி புழல் சிறையில் அடைத்தனர். அவரை பார்க்க வழக்கறிஞருடன் சென்று ஜாமீனில் எடுக்க வக்காலத்து சீட்டில் கையெழுத்து வாங்கி வந்தோம்.

நேற்று காலை திடீரென அவருக்கு உடல்நிலை சரியில்லை என்று, ஸ்டான்லி மருத்துவமனைக்கு அழைத்துச் செல்கிறோம் என்று கூறினர். பின்னர் அவர் இறந்து விட்டதாக கூறுகிறார்கள். இது முழுக்க முழுக்க காவல்துறையினர் பொய் வழக்கு போட்டு, அவரை அடித்து துன்புறுத்தி கொலை செய்துள்ளனர். இதுகுறித்து உயர் காவல்துறையினர் விசாரணை செய்து உரிய நடவடிக்கை மேற்கொள்ள வேண்டும்,’ என்றனர்.