புதுடெல்லி: இந்தியாவின் ரஷ்ய கச்சா எண்ணெய் இறக்குமதி ஜூன் மாதத்தில் முந்தைய மாதத்துடன் ஒப்பிடுகையில் 34 % அதிகரித்து சாதனை அளவை எட்டியது. இது குறித்து எரிசக்தி மற்றும் தூய்மையான காற்று ஆராய்ச்சி மையம்(சிஆர்இஏ) வெளியிட்டுள்ள அறிக்கை: கடந்த ஜூன் மாதத்தில் இந்தியா ரூ.4.89 லட்சம் கோடி( 4.5 பில்லியன் யூரோ) மதிப்புள்ள ரஷ்ய கச்சா எண்ணெயை வாங்கியுள்ளது.
இது, இந்தியாவின் மொத்த ரூ.5.98 லட்சம் கோடி(5.5 பில்லியன் யூரோ)மதிப்பிலான ரஷ்ய புதைபடிவ எரிபொருள் இறக்குமதியில் 83 %.இதன் மூலம், சீனாவுக்கு அடுத்தபடியாக ரஷ்ய எரிபொருள்களை வாங்கும் 2வது பெரிய நாடாக இந்தியா உள்ளது. இந்தியாவின் ஒட்டுமொத்த கச்சா எண்ணெய் இறக்குமதி மாதந்தோறும் 5.4 % உயர்ந்த நிலையில், சுத்திகரிப்பு நிலையங்களுக்கான ரஷ்ய விநியோகம் கணிசமாக அதிகரித்துள்ளது.
ஜாம்நகரில் உள்ள ரிலையன்ஸ் இண்டஸ்ட்ரீஸின் சுத்திகரிப்பு நிலையத்திற்கான விநியோகம் மே மாதத்திலிருந்து 150% அதிகரித்துள்ளது. அதே நேரத்தில் ஐஓசி பாரதீப் சுத்திகரிப்பு நிலையத்திற்கான இறக்குமதி 126% உயர்ந்துள்ளது. பிபிசிஎல்-ன் கொச்சி சுத்திகரிப்பு நிலையம் மற்றும் நயாரா எனர்ஜியின் வதினார் சுத்திகரிப்பு நிலையம் முறையே 83% மற்றும் 45% அதிகரித்துள்ளது.
இந்திய கொள்முதல் அதிகரித்ததால், ஜூன் மாதத்தில் ரஷ்யாவின் கச்சா எண்ணெய் ஏற்றுமதி அளவு 14% உயர்ந்தது. இருப்பினும், குறைந்த விலைகள் காரணமாக அதன் கச்சா எண்ணெய் ஏற்றுமதி வருவாய் முந்தைய மாதத்துடன் ஒப்பிடுகையில் 8% சரிந்து,ஒரு நாளைக்கு ரூ. 3700 கோடியாக குறைந்தது என்று கூறப்பட்டுள்ளது.
