பாஸ்டன்: பிபா உலக கோப்பை கால்பந்து தொடரின் பரபரப்பான காலிறுதியில் மொராக்கோ அணியுடன் மோதிய பிரான்ஸ், கேப்டன் எம்பாப்பேவின் அசத்தலான ஆட்டத்தால் 2-0 என்ற கோல் கணக்கில் வென்று அரையிறுதிக்கு முன்னேறியது. பாஸ்டன் அரங்கில் நடந்த இப்போட்டியில், பந்தை கடத்திச் செல்வதிலும் தாக்குதல் நடத்துவதிலும் பிரான்ஸ் கையே ஓங்கியிருந்தது. எனினும், மொராக்கோ கோல் கீப்பர் யாசின் போனோ விழிப்புடன் செயல்பட்டு பிரான்ஸ் தாக்குதல்களை முறியடித்ததால் 0-0 என சமநிலையே நிலவியது.
நாஸர் மஸ்ரோயி மொராக்கோ கோல் பகுதிக்குள் எம்பாப்பேவை இடறி விழச் செய்ததால் பெனால்டி கிக் வாய்ப்பு வழங்கப்பட்டது. அதிலும் எம்பாப்பே அடித்த ஷாட்டை யாசின் போனோ துல்லியமாகக் கணித்து பாய்ந்து தடுத்ததால் இழுபறி நீடித்தது. இடைவேளையின்போது இரு அணிகளும் கோல் ஏதும் அடிக்காமல் சமநிலை வகித்தன. இரண்டாவது பாதியிலும் மொராக்கோ தற்காப்பு அரணை தகர்க்க முடியாமல் பிரான்ஸ் தரப்பு விரக்தி அடைந்தது.
ஆட்டத்தின் 60வது நிமிடத்தில் கிடைத்த வாய்ப்பை சரியாகப் பயன்படுத்திக் கொண்ட எம்பாப்பே பந்தை மின்னல் வேகத்தில் வலைக்குள் திணிக்க, பிரான்ஸ் 1-0 என முன்னிலை பெற்றது. அடுத்து 66வது நிமிடத்தில் எம்பாப்பே வாகாகக் கடத்திய பந்தை உஸ்மான் டெம்பெலே கோலாக மாற்றி 2-0 என முன்னிலையை அதிகரித்தார். விறுவிறுப்பான ஆட்டத்தின் முடிவில் 2-0 என வென்ற பிரான்ஸ் அணி தொடர்ந்து 3வது முறையாக உலக கோப்பை அரையிறுதிக்கு தகுதி பெற்றது. எம்பாப்பே ஆட்ட நாயகன் விருது பெற்றார்.
* எந்த சவாலுக்கும் தயார்…
எனது கணுக்காலில் காயம் ஏற்பட்டுள்ளது. ஆனாலும், நல்ல உடல்தகுதியுடன் தான் இருக்கிறேன். நாங்கள் ரிலாக்ஸ் செய்ய வேண்டும் என்றால் அதற்கு வெற்றி மட்டுமே ஒரே வழி. அதுவரை எந்தவித சமரசமும் இல்லாமல் போராடுவோம். அரையிறுதிக்கு முன்னேறி இருப்பதில் மிக்க மகிழ்ச்சி. அதே சமயம், இன்னும் வெகுதூரம் போக வேண்டியிருப்பதை உணர்ந்துள்ளோம். இதைவிட இன்னும் கடினமான சவால்கள் காத்திருக்கின்றன. எதையும் சந்திக்க நாங்களும் தயார்.
– கிலியன் எம்பாப்பே
* மொராக்கோ 49% நேரமும், பிரான்ஸ் 44% நேரமும் பந்தை தங்கள் கட்டுப்பாட்டில் வைத்திருந்தன.
* பிரான்ஸ் தரப்பில் 21 கோல் முயற்சிகளும், மொராக்கோ தரப்பில் 4 முயற்சிகளும் மேற்கொள்ளப்பட்டன.
* பிரான்ஸ் அடித்த 8 ஷாட்கள் இலக்கு நோக்கி துல்லியமாக அமைந்த நிலையில், மொராக்கோ ஒரு முறை மட்டுமே பிரான்ஸ் கோல் கீப்பரின் திறமையை சோதித்தது.
* நடப்பு தொடரில் எம்பாப்பே களமிறங்கிய 6 போட்டியில் ஒன்றில் மட்டுமே கோல் அடிக்கவில்லை. 5 போட்டியில் 8 கோல் மற்றும் 3 அசிஸ்ட் உடன் அவர் கோல்டன் பூட் ரேசில் முன்னிலை வகிக்கிறார்.
* உலக கோப்பையில் அதிக கோல் அடித்த வீரர்கள் பட்டியலிலும் மெஸ்ஸி (21), எம்பாப்பே (20) இடையே கடும் போட்டி நிலவுகிறது.
* 30 வயதுக்குள்ளாக உலக கோப்பையில் 20 கோல் என்ற மைல் கல்லை எட்டிய முதல் வீரர் என்ற சாதனையை எம்பாப்பே படைத்துள்ளார்.
* ஒரே உலக கோப்பை தொடரில் 5 கோல் போட்ட 3வது பிரான்ஸ் வீரர் என்ற பெருமை உஸ்மான் டெம்பெலேவுக்கு கிடைத்துள்ளது.
* ஆப்ரிக்காவை சேர்ந்த அணியில் ஒரு டீன்ஏஜராக 5 உலக கோப்பை ஆட்டங்களில் விளையாடிய முதல் வீரர் என்ற சாதனை அயூப் பொவாதி (18 வயது, 280 நாள்) வசமாகி உள்ளது.
