சென்னை: நடிகரும், இசையமைப்பாளருமான ஜி.வி. பிரகாஷ் நடிப்பில் வெளியான ‘ஹேப்பி ராஜ்’ திரைப்படத்தில், இசையமைப்பாளர் இளையராஜா அவர்களின் அனுமதியின்றி ‘பொதுவாக என் மனசு தங்கம்’ என்ற பாடலை பயன்படுத்தியதற்கு சென்னை உயர்நீதிமன்றம் இடைக்காலத் தடை விதித்துள்ளது. ஹேப்பி ராஜ் படம் வெளியாகி 3 மாதங்களான நிலையில் தற்போது அந்த பாடலை பயன்படுத்த இடைக்காலத் தடை விதிக்கப்பட்டுள்ளது.
ஜிவி பிரகாஷ் நடிப்பில், கடந்த மார்ச் 27ஆம் தேதி ஹேப்பி ராஜ் என்ற படம் வெளியானது. 1980ல் வெளியான நடிகர் ரஜினியின் முரட்டுக்காளை படத்தில் இளையராஜா இசையில் பொதுவாக என் மனசு தங்கம் பாடல் பயன்படுத்தப்பட்டிருந்தது.
தனது அனுமதியின்றி ஹேப்பிராஜ் படத்தில் பொதுவாக எம்மனசு தங்கம் என்ற பாடலை உருமாற்றி பயன்படுத்தியுள்ளதாக, இளையராஜா சென்னை உயர்நீதிமன்றத்தில் வழக்கு தொடர்ந்தார். படத்தில் அந்த பாடலை பயன்படுத்த தடை விதிக்க வேண்டும், பாடலை நீக்க உத்தரவிட வேண்டும் என, இசையமைப்பாளர் இளையராஜா தரப்பில் சென்னை உயர் நீதிமன்றத்தில் வழக்கு தொடரப்பட்டது.
இந்த வழக்கு சென்னை உயர்நீதிமன்றத்தில், நீதிபதி எம் குமரேஷ்பாபு முன்பு விசாரணைக்கு வந்தது. அப்போது இளையராஜா தரப்பில் ஆஜரான வழக்கறிஞர் ஏ சரவணன், இளையராஜா அனுமதி இல்லாமல் பதிப்புரிமைச் சட்டத்தை மீறும் வகையில் இந்த பாடல் படத்தில் பயன்படுத்தப்பட்டு உள்ளதாகவும், பாடலை உருமாற்றி உள்ளதால் பாடலை பயன்படுத்த தடை விதிக்க வேண்டும் என்று வாதிட்டார்.
இந்த வாதத்தை ஏற்றுக் கொண்ட நீதிபதி, ஹேப்பி ராஜ் படத்தில் பொதுவாக எம்மனசு தங்கம் என்ற பாடலை பயன்படுத்த இடைக்கால தடை விதித்து உத்தரவிட்டுள்ளார். மேலும் மனுவுக்கு பதிலளிக்கும்படி, படத்தின் இயக்குனர் மற்றும் தயாரிப்பாளருக்கு உத்தரவிட்டு, வழக்கை நான்கு வாரங்கள் தள்ளிவைத்தார்.
