திருவெறும்பூர்: திருச்சியில் சொந்த கட்சி பிரமுகரையே முகம் சுழிக்கும் வகையில் ஆபாச வார்த்தையால் தவெக எம்எல்ஏ திட்டும் ‘பீப்’ ஆடியோ சமூக வலைதளத்தில் வைரலாகி பரபரப்பை ஏற்படுத்தியுள்ளது. தமிழகத்தில் விஜய் தலைமையிலான தவெக அரசு பொறுப்பேற்றது முதல் கட்சி நிர்வாகிகள், எம்எல்ஏ, அமைச்சர்களின் செயல்பாடுகள், ரீல்ஸ்கள், அட்ராசிட்டிகள் சமூக வலைதளங்களில் வைரலாகி பெரும் பரபரப்பை ஏற்படுத்தி வருகிறது. அந்த வகையில் திருச்சி மாவட்டம் திருவெறும்பூர் தவெக எம்எல்ஏ நவல்பட்டு விஜி, அதிமுகவிலிருந்து விலகி தவெகவில் புதிதாக இணைந்த உறுப்பினரை ஆபாச வார்த்தைகளால் திட்டும் ஆடியோ சமூகவலைதளத்தில் தற்போது வைரலாகி பரபரப்பை ஏற்படுத்தியுள்ளது.

திருச்சியில் எம்எல்ஏ நவல்பட்டு விஜிக்கும், திருவெறும்பூர் தொகுதி தவெக மாவட்ட செயலாளர் அருளுக்கும் இடையே கருத்து வேறுபாடு நிலவி வருகிறது. நவல்பட்டு விஜிக்கு கட்சி நிர்வாகிகள் பெரும்பாலானோர் ஆதரவு தெரிவித்து வரும் நிலையில் ஒரு சிலர் மட்டும் அருளுக்கு ஆதரவு தெரிவித்து வருவதாக கூறப்படுகிறது. இதனால் இருவருக்கும் ஏற்பட்டுள்ள உரசல், ஏற்கனவே கட்சியின் தலைமைக்கு சென்றுள்ளது. இந்நிலையில் அதிமுகவை சேர்ந்த பல்வேறு நிர்வாகிகள் அக்கட்சியை விட்டு விலகி தவெகவில் இணைந்து வருகின்றனர். பல்வேறு குற்ற செயல்களில் ஈடுபடுபவர்களும் தவெகவில் இணைந்து வருகின்றனர். இது தவெகவுக்கு பெரும் தலைவலியை ஏற்படுத்தி வருவதுடன் பல்வேறு பிரச்னைகளையும் உருவாக்கி வருகிறது.

இந்நிலையில் திருவெறும்பூரை சேர்ந்த அதிமுக ஜெ.பேரவை பகுதி செயலாளர் சபரி, கடந்த மாதம் அக்கட்சியில் இருந்து விலகி செங்கோட்டையன் முன்னிலையில் தவெகவில் இணைந்தார். சபரி கட்சியில் இணைந்தது முதல் அருளுக்கு ஆதரவாக செயல்பட்டு வருவதாக கூறப்படுகிறது. இவர் மீது ரூ.8கோடி பண மோசடி வழக்கு உள்ளதாக கூறப்படுகிறது. இந்நிலையில் திருவெறும்பூர் எம்எல்ஏ நவல்பட்டு விஜி- சபரி ஆகியோர் செல்போனில் பேசியதாக கூறப்படும் உரையாடல் சமூக வலைதளங்களில் வெளியாகி அனைவரையும் முகம் சுழிக்க வைத்துள்ளது. அந்த உரையாடல் விவரம்:

எம்எல்ஏ விஜி: என் நம்பர் உங்கிட்ட இல்லையா…
சபரி: இல்லண்ணே….அண்ணா நம்பர் இல்லேண்ண… சாரிண்ணே..
விஜி: அப்படியா….உண்மையா இருக்காதுடா..
சபரி: அண்ணே நிறைய நாள் பேசியிருக்கோம்…..நீங்கதான்…
விஜி: சரிடா…நீ நல்லா பேசுவியா. அதான் பாராட்டத்தான்.. பாராட்டி சால்வை போடதான் வாடா.
சபரி: அண்ணே இல்லண்ணே.
விஜி: ஏய் வாடா… ஆபிஸ்லதான் இருக்கேன். வாடா.. உன்னை பாராட்டி சால்வே போடனும்டா.
சபரி: ஏன்ணே சால்வை எல்லாம் போட்டுகிட்டு.
விஜி: ஏய் வாடா..
சபரி: வீட்டுக்கு வரேன்னு சொன்னதற்கு நீங்க தான் வேணாம்னு சொன்னீங்க… அப்புறம் எதற்கண்ணே..
விஜி: ஏய் வாடா இங்க… என்று இருமுறை முகம் சுழிக்கும் (பீப்) கெட்டவார்த்தையால் திட்டுகிறார்.
சபரி: ஏண்ணே… கெட்டவார்த்தையால் திட்டுறீங்க.
விஜி: நீ பண்ணிய பிராடு தனம் தெரியாதாடா. ஊரையே ஏமாற்றி ரூ.8 கோடி மோசடி செய்து பிராடு தனம் பண்ணிட்டு 3 மாதமாக ஒளிஞ்சிட்டு இருந்த உனக்கு இப்ப கட்சி பாதுகாப்பா… டிவிகே பாதுகாப்பாடா…
சபரி: அப்படியாண்ணே… நீங்க கெட்டவார்த்தை பேசாதீங்க… நான் விஜய் அண்ணாவிடம் கம்ப்ளைன்ட் பண்ணுவேன்.
விஜி: வாடா… நீ ஆம்பள தானடா… வாடா…
சபரி: நீ முதலில் மரியாதையா பேசுடா… கெட்டவார்த்தை பேசாதடா… நீ எம்எல்ஏவாக இருக்கலாம். உனக்காக மக்கள் ஓட்டு போடல… விஜய் அண்ணனுக்காகத்தான் தான் ஓட்டு போட்டாங்க…
விஜி: கெட்டவார்த்தையால் சரமாரி திட்டி கொண்டே இருக்கிறார். இவ்வாறு இந்த உடையாடல் இருந்தது. இப்படி இருவருக்கும் இடையே முகம் சுழிக்கும் வகையில் இருந்த உரையாடல் சமூக வலைதளங்களில் வெளியாகி பரபரப்பை ஏற்படுத்தியுள்ளது.