உடன்குடி: உடன்குடி காட்டுப்பகுதியில் கொடிகட்டிப் பறக்கும் சூதாட்டத்தால் பலரின் வாழ்வு பாழாவதோடு பண விஷயத்தில் கோஷ்டி மோதல் ஏற்படும் சூழலும் நிலவுகிறது. எனவே இதுவிஷயத்தில் காவல்துறை களமிறங்கி நடவடிக்கை எடுக்க முன்வருமா? என சமூக ஆர்வலர்கள் உள்ளிட்ட பலரும் எதிர்பார்க்கின்றனர். தூத்துக்குடி மாவட்டம், உடன்குடி வட்டாரத்தில் பல்லாயிரக்கணக்கானோர் வசித்து வருகின்றனர். இவர்களில் ஏராளமானோர் சொந்த தொழில் செய்துவருகின்றனர். அத்துடன் பெரும்பாலானோர் வாகனங்கள் ஓட்டும் தொழில் செய்து வருகின்றனர். இதில் அவர்களுடன் கூடப்பழகும் சில நண்பர்களின் ஏடா… கூட செயல்களால் தான் உண்டு தன் வேலை உண்டு என இருப்பவர்கள் கூட பணம் ஆசையினால் தடம் மாறிச் செல்லும் நிலை இன்றளவும் தொடர்கிறது.
குறிப்பாக லாட்டரி, 3ம் நம்பர் லாட்டரி, ரம்மி, வெட்டு சீட்டு என கொடிகட்டிப் பறக்கும் பல சூதாட்டங்களால் பலரின் வாழ்வு பாழாகும் அவலம் தொடர்கதையாக உள்ளது. தற்போது உடன்குடி பகுதியை மையமாக கொண்டு காட்டுப்பகுதிகளில் உள்ள தோட்டங்களின் மின்மோட்டார் அறைகளின் வெளிச்சத்தில் சூதாட்டம் ஜரூராக நடந்து வருகிறது.மெஞ்ஞானபுரம், திருச்செந்தூர், தட்டார்மடம் என அருகிலுள்ள காவல்நிலையங்களை ஒட்டிய எல்லைப்பகுதியை குறி வைத்து உடன்குடி பகுதியை மையமாக வைத்து சூதாட்ட கும்பல் ஈடுபட்டு வருகிறது. இதில் சாமானியன் முதல் பெரிய பணக்காரர்கள் வரை ஏராளமானோர் சூதாட்டத்தில் ஈடுபட்டு பல லட்சங்களை இழந்து வருகின்றனர்.
ஏதாவது ஒரு பகுதியில் பைக், காரை நிறுத்திவைத்து விட்டு சூதாட்ட பிரியர்களை அழைத்துச் சென்று அவர்களுக்கு உணவு, மது என சகல வசதிகளையும் செய்து கொடுப்பதுடன் அவர்களின் தகுதிக்கேற்ப சூதாட்டம் நடைபெறும் பகுதியிலேயே வட்டிக்கு பணம் கொடுக்கும் வகையில் ஆட்களை நியமித்துள்ளனர். பண விஷயமாக இருப்பதால் சூதாட்ட கும்பல்களிடையே கொடுக்கல், வாங்கலில் கோஷ்டி மோதல் உருவாகும் சூழல் உள்ளது. எனவே பலரின் வாழ்க்கையை பாழடித்து வரும் உடன்குடி பகுதி சூதாட்டத்தை முழுமையாகக் கட்டுப்படுத்திட சம்பந்தப்பட்ட போலீசாரும், அதிகாரிகளும் களமிறங்கி நடவடிக்கை எடுக்க முன்வருவார்களா? என சமூக ஆர்வலர்கள் உள்ளிட்ட பலரும் எதிர்பார்க்கின்றனர்.
