நன்றி குங்குமம் தோழி

ஒரு வீட்டின் அழகே அங்குள்ள வெளிச்சம் மற்றும் காற்றோட்டம் பொறுத்துத்தான் அமையும். இதனை ஜன்னல்கள் வழியாக தந்தாலும், ‘கலை’யம்சத்துடன் காணப்படுவதற்காக அங்கு விளக்கு வைக்கும் போது மேலும் அழகாக எடுத்துக்காட்டும். வெளிச்சமே இல்லாமல், கலையிழந்து காணப்படும் இடங்களை ‘பூத் பங்களா’ என்றழைப்பார்கள். பூத் என்றால் பேய் என்று அர்த்தம். அதனால்தான் எத்தகைய சிறிய இடமாக இருந்தாலும், விளக்குகள் போடாத வீடுகள் இருக்காது.

போடும் விளக்குகளை இடத்திற்குத் தகுந்தபடி, பொருத்தமான அமைப்பை தரவேண்டும். ஜொலிக்கும் விளக்குகள் ஒரு இடத்தின் அழகை மெருகூட்டும். ஒவ்வொரு அலங்காரத்தையும் பார்த்துப் பார்த்து செய்தாலும், அழகுற காண்பித்து, பிரதிபலிப்பதில் விளக்குகளுக்குத்தான் முதலிடம். விளக்குகளை இடம், தேவை, தோற்றம் இவற்றை கருத்தில் கொண்டு அமைக்க வேண்டும்.

பொதுவாக வரவேற்பு அறை, சிட்டிங் ரூம் போன்ற இடங்களுக்கு அலங்கார விளக்குகள் போடும் போதுதான் அறையின் அழகு வெளிப்படும். உதாரணத்திற்கு கடையில் பட்டுப்புடவைகள் அடுக்கி வைக்கப்பட்டிருக்கும் இடங்களில் அலங்கார விளக்குகள் போடப்பட்டிருக்கும். புடவையை விளக்கின் கீழ் பார்க்கும் போது அதன் நிறம் பளிச்சென்று இருக்கும். அதையே சூரிய வெளிச்சத்தில் பார்த்தால் அது வெளிர் நிறத்தில் தெரியும். அனைத்தையும் ஜொலிக்கச் செய்வது விளக்குகள் மட்டுமே. சரியானதொரு அமைப்பைத் தருவதற்கான விளக்குகளை போடும் போது உண்மையான அழகு வெளிப்படும்.

பகலில் சூரிய வெளிச்சம் வீட்டிற்குள் கிடைக்க ஜன்னல்கள் அவசியம். அதே போல், இரவில் வெளிச்சத்துடன் அழகையும் பிரதிபலிக்க விளக்குகள் அமைப்பதும் முக்கியம். அழகான விளக்கின் வெளிச்சம் அறையின் சிறிய குறைகளை தெரியாமல் மறைத்து விடும். பொதுவான உபயோகத்திற்காக பயன்படுத்தும் விளக்குகள் வெளிச்சத்திற்காக மட்டுமே போடப்படுகிறது. குறிப்பிட்ட சில வேலைகளுக்காக முக்கியத்துவம் கருதி போடப்படும் விளக்குகள் ஒரு வகை.

அதாவது, ‘தையல் மிஷன்’ வைத்து வேலை பார்க்கும் இடத்தில் விளக்கின் ஒளி சரியாக இருந்தால் தான் நன்றாக தைக்க முடியும். அடுத்து அலங்கார விளக்குகள், அழகிற்காக மட்டும் போடப்படுவது. வரவேற்பறை, ‘ஷோரூம்’ போன்ற இடங்களுக்கு பொருத்தமானவை. இவை கண்ணைக் கூசாத அளவிற்கு பார்த்துக்கொள்ள வேண்டும். அதனை சுவர், நிறம், தரை, மேற்கூரை உயரம் இவற்றிற்குத் தகுந்தாற் போல் அமைக்க வேண்டும்.

அறையின் மேற்கூரை உயரம் குறைவாக இருந்தால், மேல் நோக்கிக் காணப்படும் அலங்கார விளக்குகள் போடலாம். உயரம் குறைவான அறையில் தொங்கும் விளக்குகளை மாட்டினால், அறைக்குப் பொருந்தாது. நம் தலை மேலே விளக்கு தொங்குவது போன்று தோன்றும். அறையின் அளவிற்கு ஏற்ப பொருத்த வேண்டும். சிறிய வரவேற்பறையில் 3, 4 அடுக்குகள் கொண்ட விளக்குகள் போதுமானது. அல்லது அறையின் நடுவில் ஒரே பெரிய விளக்காக மேல் தூக்கியபடி போடலாம். அழகு செய்கிறோம் என்கிற பெயரில், பெரிய விளக்குகளை மாட்டுவதை தவிர்த்து இடத்திற்கும் அறையின் உயரத்திற்கும் ஏற்றவாறு போடுவது உத்தமம்.

மிகப்பெரிய வரவேற்பறை மற்றும் மேற்கூரையும் உயரமாக இருந்தால், அங்கு தொங்கும் சர விளக்குகளை போடலாம். கண்ணாடியால் ஆன சர விளக்குகள் தனித்துவமானவை. நடுவில் பல அடுக்குகள் கொண்ட விளக்கு போடும் பொழுது, இரு பக்கங்களிலும் அதன் தோற்றத்திலேயே சிறிய விளக்கும் போடலாம். ‘டிராயிங் ரூம்’ தவிர மற்ற இடங்களுக்கு பொதுவான வெளிச்சம் தரக்கூடிய டியூப் லைட்டுகள் போடலாம்.

சிம்பிளாக வேண்டும் என்பவர்கள் அறை நடுவே அழகான ‘டூம்’ லைட் போடலாம். இதனை ‘ப்ளூ டூத்’ உடன் இணைத்துவிட்டால், இரவில் பளிச்சென மின்னுவதை பார்க்க அழகாக இருக்கும். எளிய முறையில் அழகாகவும் இருக்க வேண்டும் என நினைத்தால், சுவர் நிறங்களில் அங்கங்கே ‘வால் பிராக்கெட்’ லைட்டுகள் போடலாம். பித்தளை, மெட்டல், பிளாஸ்டிக் என பல்வேறு வகைகளில் ‘வால் பிராக்கெட்ஸ்’ கிடைக்கின்றன. எளிதாக வாங்கக்கூடிய விலையில் அமைந்துள்ளன.

சாப்பாட்டு மேசை அருகில் பொதுவாக ‘டியூப்’ லைட் போடுவோம். மேசை மேல் தொங்கும் விளக்குகளை உணவகங்களில் பார்த்திருப்போம். பார்ப்பதற்கு அழகாக மட்டுமில்லாமல், உணவிலும் தூசி இருந்தால் துல்லியமாக தெரிந்துவிடும். பெடஸ்ட்ரல் விளக்குகள் வேண்டிய பொழுது எங்கு வேண்டுமோ, அங்கு எளிதாக மாற்றிக் கொள்ளலாம்.படுக்கையறையில் படுப்பது மட்டுமில்லாது, எழுதப் படிக்க பயன்படுத்தும் பட்சத்தில் படுக்கைக்கு நேர் எதிரில் இல்லாமல் மற்ெறாரு பக்கம் மேசை போட்டு, அங்கு படிக்கும் விளக்குகள் போட்டுக் கொள்ளலாம். சிலர் படுக்கு முன் புத்தகம் படிக்கும் பழக்கம் கொண்டிருப்பார்கள். அவர்களுக்காக பேட்டரி விளக்குகள் மற்றும் ‘சார்ஜ்’ செய்யும் சிறிய விளக்குகள் கிடைக்கின்றன.

படுக்கையின் ‘சைட் டேபிளில்’ பொருத்திக் கொள்ளலாம். உறக்கம் வரும் பொழுது அணைத்து விடலாம். இரவு போடும் விளக்குகள் நிறைய எல்.இ.டியில் (LED) வந்துவிட்டன. அழகான வெளிச்சம் தருவதுடன், மின்சார பில்லும் குறைகிறது. பெரிய சமையலறை ‘ட’ அல்லது ‘U’ வடிவத்தில் இருந்தால், இருபுறமும் ‘ப்ளோரஸன்ட்’ விளக்குகளை போடலாம். டியூப் லைட்டுகள் கூட இருபுறமும் போடும் பொழுது வெளிச்சம் நமக்கு நன்கு கிடைக்கும்.

பொதுவாக, நாம் ஒரே மாதிரியான அலங்காரத்தை விரும்புவதில்லை. நம்பெற்றோர்கள் காலத்தில் வீடுகளிலும் தொங்கும் விளக்குகள் அலங்கரித்துக் கொண்டிருந்தன. தொங்கும் அலங்கார விளக்குகள் இல்லாவிடில், கலர் கலரான ‘ஷேட்’களுடன் பல்புகள் தொங்கின. அவை நிறைய வேலைப்பாடுகளுடன் கிடைக்கின்றன. வீட்டின் ஒவ்வொரு அமைப்பிற்கும் ‘பட்ஜெட்’ போட்டு ஒதுக்குவது போல, விளக்குகளுக்கும் முக்கியத்துவம் தரத் தேவைப்படுகிறது. ஒரு முறை சரியான அமைப்புத் தந்துவிட்டால் போதும். நமக்கு எந்த இடங்களில் எப்படியெல்லாம் அலங்கரிக்க ஆசை ஏற்படுகிறதோ அங்கெல்லாம் ஆரம்பத்திலேயே போதிய அடிப்படை இணைப்புகளை கொடுத்துவிட்டால்தான் நல்லது. அடிப்படை இணைப்புகள் விளக்கிற்கும், மின்சார உபகரணங்களுக்கும் முதலிலேயே தருவது நல்லது.

குழந்தைகள் அறை தனியாக இருந்தால் இணைப்பு போர்டை ஓரளவு உயரத்தில் அல்லது பெரியவர்கள் உபயோகப்படுத்தும் படி அமைக்கலாம். மாடிப்படிகள் இருந்தால் அதன் ஒவ்வொரு திருப்பத்திலும் இணை ‘சுவிட்சு’கள் இருப்பது அவசியம். வாசலில் போடப்படும் விளக்கிற்கும் உள்ளே-வெளியே இருபுறம் ‘சுவிட்ச்’ கள் பொருத்துவது அவசியம். வெளியே சென்று விட்டு திரும்பும் போது வாசற்புறம் இருட்டாக இருந்தால், விளக்கைப் போட்டு விட்டு உள்ளே நுழையலாம். விளக்குகள் போடுவதற்கு முன்பே சில நடைமுறை சிக்கல்களை கருத்தில் கொண்டு அமைத்து விட்டால், அழகற்ற இடம் கூட அழகாகத் தெரியும்.

வரவேற்பறையில் பால்ஸ் சீலிங் என்னும் மேற்கூரை அலங்காரம் இருக்குமானால், அதற்கு நாம் சரியானதொரு விளக்கு அலங்காரம் செய்தால்தான் அழகு வெளிப்படும். ‘ரோப்லைட்’ என்று சொல்லக்கூடிய ‘கயிறு’ போன்ற விளக்கை மேல்பாகம் முழுவதும் தந்துவிட்டால், அது தனி ஒரு அழகாக மிளிரும். ஓரங்களில் வண்ணமயமான ‘ஸ்பாட்லைட்’டுகளை போடலாம். படுக்கையறைக்கேற்ற ரம்மியமான வெளிச்சத்தைத் தரும் விளக்குகளும் கிடைக்கின்றன. அவற்றைப் பற்றியும் தெரிந்து கொண்டு நமக்குப் பிடித்தவாறு போட்டுக் கொள்ளலாம். சில இடங்களில் சிறிய கடைகள் கூட பார்க்க பிரமிக்கும் அளவுக்கு அழகைத் தரும். காரணம், அங்குள்ள உள் அலங்காரங்கள்தான். யோசித்துப் பார்த்து, சரியான அழகையும், நல்ல விளக்குகளையும் தந்து நம் வீட்டைக்கூட ஒரு ‘ஹோட்டல்’ போலக் காட்ட முடியும்.

பொதுவாக ‘ஸ்பாட்லைட்’ மேற்கூரை உள்ள இடங்களுக்குப் பொருந்தும். ‘போலார்டு லைட்’ என்று சொல்லப்படுவது நீளமாக இருக்கும். ஸ்டாண்டு போல நிறுத்தி மேலே விளக்கு எரியும் அமைப்புப் போன்றது. இடத்திற்குப் பொருத்தமான விளக்குகளை அமைப்பதுதான் உண்மை அழகு. பல்வேறு மாடல்களில் ‘மல்ட்டி ஸ்பாட்’ லைட்டுகள் பல்வேறு நிறங்களில் கிடைக்கின்றன. ‘டிராக்லைட்’ போன்றவையும் கிடைக்கின்றன. ‘டியூப் லைட்’ போன்ற பட்டி வடிவில் விளக்குகள் அழகாகத் தொங்கும் அமைப்புக் கொண்டது. ஒவ்வொரு விளக்கிலும் ஓவ்வொரு விதமான அழகும் ‘ஜொலிப்பும்’ கண்ணைப்பறிக்கும். பொருத்தி வைத்தால், விசேஷ நாட்களிலோ, ஏதேனும் பார்ட்டி, விருந்து போன்ற சமயங்களிலோ தனி அலங்காரமாகத் தெரியும்.

‘பல்க்ஹெட்’ விளக்குகள் உயரம் அதிகம் கொண்ட சுவர் உள்ள அறைகளில், மேற்கூரையும் உயரத்தில் தெரிவதால் பொருத்தமாக கண்ணை ஈர்க்கக்கூடிய அளவில் அழகு கிடைக்கும். பார்ப்பதற்கு இதன் தலை ெபரிதாக இருப்பது போன்று காணப்படும். ‘ஸ்பாட்’ லைட்டுகள் என்று எடுத்துக் கொண்டால், மிகக் குறைந்த விலையிலிருந்து, அதிகபட்ச ஆடம்பரமானவைகளும் கிடைக்கின்றன.

தற்போது அனைவருமே ஒயர்கள் தொங்கிக் கொண்டிருப்பதை விரும்புவதில்லை. வெளிக்குத் தெரியாத உள்ளமைப்புக் கொண்ட விளக்குகளில் இணைப்பு எங்கிருந்து வருகிறது என்பது கூட தெரியாதபடி விளக்குகள் மட்டும் பிரகாசிப்பதைக் காணமுடியும். அவைதான் ‘இன்பில்ட் விளக்குகள்.’ வீட்டை ஜொலிக்கச் செய்யும் விளக்குகளுக்கு ஏராளமான முகவரிகள் காணப்படுகின்றன. முகவரியை அடையாளம் கண்டு வீட்டிற்குக் கொண்டு வந்தால் போதும்.

சர விளக்குகள் மற்றும் கண்ணாடிக் கொத்து லைட்டுகளும் இடத்தை ‘ரிச்’சாகக் காட்டும். ‘கிரிஸ்டல் பால்ஸ்’ விளக்குகள் கொஞ்சம் செலவுதான் என்றாலும், ஒரே ஒருமுறை செலவுதான். அழகோடு நல்ல ‘ஷேட்’ தந்து மற்றப் பொருட்களையும் ெஜாலிக்கச் செய்யும் பொழுது கலையார்வத்தைத் தூண்டும். மீன் தொட்டி அலங்கரிக்க, நீரூற்று இருந்தால் அதையும் விளக்குகள் போட்டு அலங்கரிக்கலாம்.

செயற்கை மரங்கள், ‘ஷோகேஸ்’ போன்றவற்றைக் கூட அதற்கேற்ற விளக்குகள் போட்டு பிரமாண்டமாகக் காட்ட முடியும். மேலை நாடுகளில் கோடை வந்து விட்டாலே, வாயிற் தோட்டத்தில் விளக்குகளை மாட்டி, பெரிய குடையின் அடியில் நிலா வெளிச்சத்தில் அனைவரும் குடும்பத்தோடு அமர்ந்து விருந்து உண்டு களிப்பார்கள். நம் வீடுகளிலும் தனித் தோட்டம் இருந்தால், பொருத்தமான விளக்குகள் வாங்கிப் போட்டு மகிழலாம்.

பழைய வீடாக இருந்தாலும் சரி, புதிதாக வாங்கியதாக இருந்தாலும், இனி கட்டப் போவதாக இருந்தாலும் சரி… அழகிய தரம் கொண்ட விளக்குகளுக்காக ஒருமுறை செலவு செய்தால் போதும். சிறிய இடமாக இருந்தாலும் அழகிய இடமாகக் காட்ட முடியும்.

தினந்தோறும் நாம் வாங்கும் பொருட்கள் போல் அல்ல விளக்குகள். வீடு கலையம்சத்துடன் காணப்பட வேண்டுமானால், சரியான விளக்குகள் அழகை பிரதிபலித்துக் காட்டும். ஏதோ வீடு வாங்கினோம், உள் அலங்காரம் செய்தோம் என்றில்லாமல், ஒவ்வொன்றின் முக்கியத்துவத்தையும், அவசியத்தையும் ஆராய்ந்து ரசனையோடு அமைப்பதே சிறந்த அழகையும், திருப்தியும் தரும்.

தொகுப்பு: சரஸ்வதி ஸ்ரீ நிவாசன்