புதுடெல்லி: டெல்லியில் விரைவான பணம் மற்றும் கவர்ச்சிகரமான குற்றவியல் வாழ்க்கை முறையைக் காட்டி இளைஞர்களைத் தங்கள் கும்பலில் சேர்ப்பதற்காகச் சமூக ஊடகத் தளங்களைப் பயன்படுத்தி ஒருகும்பல் ஆட்கள் சேர்ப்பதை போலீசார் கண்டுபிடித்தனர். பின்னர் அவர்களை ஆயுதங்கள் மற்றும் போதைப்பொருள் கடத்தலில் ஈடுபடுத்தியது விசாரணையில் தெரியவந்தது. பாகிஸ்தானிலிருந்து டிரோன்கள் மூலம் பஞ்சாப் பகுதிக்கு வீசப்பட்ட ஆயுதங்கள் மற்றும் போதைப்பொருட்களை இந்தக் கும்பல் பெற்றுள்ளது. பின்னர் இந்தச் சரக்குகள் பலரின் கைமாறி டெல்லிக்குக் கொண்டு வரப்பட்டுள்ளன. இதுபற்றி தொடர்ந்து ரகசியமாக விசாரித்த போலீசார் அந்த கும்பலை சேர்ந்த 7 பேரை அதிரடியாக கைது செய்தனர்.

அவர்களிடம் நடத்திய விசாரணையில் பாகிஸ்தானைச் சேர்ந்த ஷாசாத் பட்டி மற்றும் அவரது கூட்டாளியான அஜ்மல் குஜ்ஜார் ஆகியோருக்காக செயல்பட்டு வந்தது தெரிய வந்தது. அவர்கள் மூலம் டெல்லி மற்றும் சுற்றுவட்டார பகுதியில் சட்டவிரோத ஆயுதங்கள், வெடிமருந்துகள் மற்றும் போதைப்பொருட்களைக் கொள்முதல் செய்து விநியோகிப்பதில் இந்தக் கும்பல் ஈடுபட்டு வந்துள்ளது. மேலும் டெல்லி, காசியாபாத் மற்றும் அதைச் சுற்றியுள்ள பகுதிகளில் உள்ள பல இடங்களை இந்தக் கும்பலைச் சேர்ந்தவர்கள் உளவு பார்த்திருப்பதையும் அதிகாரிகள் கண்டறிந்தனர்.

இது குற்றவியல் அல்லது பயங்கரவாதச் செயல்களைச் செய்வதற்கான திட்டங்கள் இருக்கலாம் என்ற அச்சத்தை எழுப்பியுள்ளது. இந்த கைது நடவடிக்கையின் போது ஐந்து கைத்துப்பாக்கிகள், 41 தோட்டாக்கள், ஏழு செல்போன்கள் மற்றும் ஒரு எஸ்யூவி வாகனம் ஆகியவை பறிமுதல் செய்யப்பட்டன. இந்தக் கும்பலின் முக்கிய உறுப்பினரான மோஹித் (எ) யோகி கைது கடந்த மே மாதம் செய்யப்பட்டார். தற்போது கைது செய்யப்பட்டவர்களில் பலர் மீது கொலை, கொலை முயற்சி, கொள்ளை மற்றும் ஆயுதச் சட்டம் மற்றும் போதைப்பொருள் வழக்குகள் இருப்பதாக போலீசார் தெரிவித்தனர்.