மாஸ்கோ: ரஷ்யாவின் அதிநவீன ‘Tu-22M3’ ரக உத்திசார் குண்டுவீச்சு விமானம் ஒன்று, சைபீரியாவின் இர்குட்ஸ்க் பிராந்தியத்தில் நேற்று வழக்கமான பயிற்சிப் பறப்பில் ஈடுபட்டிருந்தபோது விமானம் கட்டுப்பாட்டை இழந்து, செங்குத்தாகத் தலைகீழாகத் தரையில் பாய்ந்து விழுந்து நொறுங்கியது.
விபத்து நடந்தவுடன் அந்த இடத்திலிருந்து பயங்கர கரும்புகை வானுயர எழும்பியது. இந்த விபத்து அங்காரா நதிக்கு அருகில் உள்ள ஒரு காட்டுப் பகுதியில் நடந்ததாக சமூக ஊடகங்களில் வீடியோக்கள் வெளியாகியுள்ளன.
விமானம் தரையில் மோதுவதற்கு சில நொடிகள் முன்பாக, அதில் இருந்த 4 ராணுவ வீரர்களும் தங்களின் அவசரகால இருக்கை தொழில்நுட்பம் மூலம் விமானத்திலிருந்து பாதுகாப்பாக வெளியேறி உயிர் தப்பினர். அவர்களின் உயிருக்கோ அல்லது ஆரோக்கியத்திற்கோ எந்த ஆபத்தும் இல்லை என்று ரஷ்ய பாதுகாப்பு அமைச்சகம் அதிகாரப்பூர்வமாகத் தெரிவித்துள்ளது. விபத்துக்கான காரணம் குறித்து ராணுவ அதிகாரிகள் தீவிர விசாரணை நடத்தி வருகின்றனர்.
