* பென்-டிரைவில் ஆபாச வீடியோக்கள் சிக்கின, ஆடியோவில் பேசிய பெண் திடீர் மாயம்

சேலம்: சேலத்தில் 50 பெண்களை ஆபாச படம் எடுத்து மிரட்டி பாலியல் தொல்லை கொடுத்த வழக்கில் கைதான தவெக பிரமுகரின் பென்-டிரைவில் இருந்து வெவ்வேறு பெண்களுடன் இருக்கும் ஆபாச வீடியோக்களை போலீசார் கைப்பற்றியுள்ளனர். அவர் மீது பாலியல் துன்புறுத்தல் உள்பட 8 பிரிவின் கீழ் வழக்குப்பதிவு செய்தனர். அவர் விஐபிக்களுக்கு பெண்களை சப்ளை செய்தாரா? என்ற கோணத்தில் போலீசார் விசாரிக்கின்றனர்.

சேலத்தை சேர்ந்த இளம்பெண் ஒருவர் பேசும் ஆடியோ நேற்று முன்தினம் சமூகவலைதளங்களில் வைரலாக பரவியது. அதில், ‘‘சேலம் நெய்க்காரப்பட்டி புத்தூர் அக்ரஹாரத்தை சேர்ந்த தவெக பிரமுகர் மணிகண்டன் என்பவர், 50க்கும் மேற்பட்ட பெண்களை ஆபாசமாக வீடியோ எடுத்து வைத்து மிரட்டி, துன்புறுத்தி வருகிறார். அவர் மீது நடவடிக்கை எடுத்து பெண்களை காக்க வேண்டும்,’’ எனக்கூறியிருந்தார்.

இப்புகாரின்பேரில் தவெக பிரமுகர் மணிகண்டனின் செயல்பாடு பற்றி விசாரித்து நடவடிக்கை எடுக்க கொண்டலாம்பட்டி போலீசாருக்கு மாநகர போலீஸ் கமிஷனர் அனில்குமார் கிரி உத்தரவிட்டார். இதன்பேரில் உதவி கமிஷனர் முரளி, இன்ஸ்பெக்டர் சிலம்பரசன் ஆகியோர் மணிகண்டனை பிடித்து வந்து கிடுக்கிப்பிடி விசாரணை நடத்தினர். அவரது செல்போன் மற்றும் வீட்டில் இருந்து எடுக்கப்பட்ட ஒரு பென்-டிரைவ் ஆகியவற்றை கைப்பற்றி ஆய்வு செய்தனர்.

அதில், மணிகண்டனின் பென்-டிரைவில் 3 பெண்களுடன் அவர் இருக்கும் ஆபாச வீடியோக்கள் சிக்கியது. அந்த வீடியோக்களில் பெண்களை நிர்பந்தப்படுத்தி நிர்வாணமாக்கி தொல்லை கொடுப்பதும் தெரியவந்தது. பாதிக்கப்பட்ட பெண்கள் பற்றி போலீசார் தீவிர விசாரணை நடத்திய நிலையில், அந்த வீடியோக்களில் இருந்த பெண்களில் 32 வயது கொண்ட ஒரு பெண் கொண்டலாம்பட்டி போலீசில் புகார் கொடுத்தார்.

அந்த புகாரின் பேரில், மணிகண்டன் மீது 7 பிஎன்எஸ் சட்டப்பிரிவு மற்றும் ஒரு தகவல் தொழில்நுட்ப பிரிவு என 8 பிரிவுகளின் கீழ் வழக்குப்பதிவு செய்தனர். அதாவது, பிஎன்எஸ் பிரிவுகளில் 74-பெண்ணின் கண்ணியத்திற்கு களங்கம் ஏற்படுத்துதல், 75(1)-பாலியல் துன்புறுத்துதல், 75(2)-விருப்பத்திற்கு மாறாக பாலியல் தொந்தரவு, 76-பெண்ணை கட்டாயப்படுத்தி நிர்வாணப்படுத்துதல், 77-பெண்ணின் சம்மதம் இல்லாமல் ஆபாசமாக படம், வீடியோ எடுத்தல், 78-குற்றத்திற்காக பின்தொடருதல், 79-பெண்ணின் மானத்திற்கு களங்கம் விளைவிக்கும் நோக்கில் சைகை செய்தல், 66(E)-தனிப்பட்ட அந்தரங்கத்தை படம் எடுத்து மீறும் செயல் மற்றும் வெளியிடுதல் ஆகிய பிரிவுகள் பாய்ந்துள்ளது.

கைதான மணிகண்டனால், வீடியோக்களில் இருக்கும் 3 பெண்கள் மற்றும் சமூகவலைதளத்தில் புகார் தெரிவித்த ஒரு பெண் என இதுவரை 4 பேர் பாதிக்கப்பட்டிருப்பது உறுதியாகியுள்ளது. பெண் பேசிய ஆடியோவில், 8 ஆயிரத்திற்கும் மேற்பட்ட வீடியோக்களை மணிகண்டன் போனில் பார்த்ததாகவும், 50க்கும் மேற்பட்ட பெண்கள் பாதிக்கப்பட்டிருப்பதாகவும் கூறியிருப்பதால், அவரது செல்போனை ஆய்வுக்கு உட்படுத்த போலீசார் முடிவு செய்துள்ளனர்.

இதற்காக அவரது செல்போன் மற்றும் கைப்பற்றப்பட்ட பென்-டிரைவ் ஆகியவற்றை ஆய்வகத்திற்கு அனுப்ப ஏற்பாடுகளை செய்துள்ளனர். மேலும், மணிகண்டனால் பாதிக்கப்பட்ட பெண்கள் யாராக இருந்தாலும் போலீசில் புகார் கொடுக்கலாம் என போலீஸ் அதிகாரிகள் தெரிவித்துள்ளனர். இதற்கிடையில் ஆடியோவில் பேசிய பெண் என்ன ஆனார்? அவர் இப்போது எங்ேக இருக்கிறார்? என்ற கேள்வியும் எழுந்துள்ளது.

தவெக பிரமுகர் மீது பரபரப்பு புகார் தெரிவித்த நிலையில், அவர் மாயமாகி இருப்பது மேலும் அதிர்ச்சியை ஏற்படுத்தியுள்ளது. அவரது பேச்சில், தன்னுடன் பழகியதுபோல் தனது நண்பர்களுடனும் பழக வேண்டும், இல்லையென்றால் வீடியோவை வெளியிட்டு விடுவேன் என மிரட்டியதாக கூறியிருக்கிறார். இதனால், மணிகண்டன் தனது பாலியல் இச்சைக்கு உட்படுத்திய பெண்களை, தனது நண்பர்களுக்கும், விஐபிக்கள் சிலருக்கும் சப்ளை செய்திருக்கலாம் என்ற திடுக்கிடும் தகவல் வெளியாகியுள்ளது.

அதுகுறித்து முழு விவரங்கள் அறிய ஆடியோவில் பேசிய பெண்ணை போலீசார் தேடி வருகின்றனர். அவரை பிடித்து விசாரித்தால், பல்வேறு புதிய தகவல்கள் கிடைக்கும் எனக்கூறப்படுகிறது. பெண்கள் மீதான பாலியல் குற்றமாக இருப்பதால், மணிகண்டன் மீதான வழக்கை சேலம் டவுன் அனைத்து மகளிர் காவல்நிலைய இன்ஸ்பெக்டர் ஆனந்தஜோதி விசாரிக்க உத்தரவிடப்பட்டுள்ளது. அவர் தலைமையிலான மகளிர் போலீசார் தங்களது மேல் விசாரணையை துவங்கியுள்ளனர்.

அவர்கள், பாதிக்கப்பட்ட பெண்கள் பற்றி தீவிரமாக விசாரித்து வருகின்றனர். இதனிடையே தவெக பிரமுகர் மணிகண்டனை சேலம் கோர்ட்டில் ஆஜர்படுத்தி, மத்திய சிறையில் அடைத்தனர். இன்னும் ஓரிருநாளில் அவரை காவலில் எடுத்து விசாரிக்க போலீசார் முடிவு செய்துள்ளனர். இச்சம்பவம் சேலத்தில் பெரும் பரபரப்பை ஏற்படுத்தியுள்ளது.

இதற்கிடையே பாலியல் புகாரில் போலீசாரால் கைது செய்யப்பட்டுள்ள மணிகண்டனுக்கும், தமிழக வெற்றிக்கழகத்திற்கும் எந்த தொடர்பும் இல்லை என சேலம் தெற்கு மாவட்ட தவெக செயலாளர் ஆர்.எஸ்.மணிகண்டன் அறிக்கை வெளியிட்டுள்ளார்.