பிரெஞ்ச் ஓபனில் முதல் கிராண்ட்ஸ்லாம் மகுடம்; பட்டம் வென்றதை என்னால் நம்ப முடியவில்லை: அலெக்சாண்டர் ஸ்வெரேவ் பேட்டி

பாரீஸ்: டென்னிசில் உயரிய அந்தஸ்து பெற்ற கிராண்ட்ஸ்லாம் தொடர்களில் ஒன்றான பிரெஞ்ச் ஓபன் தொடர் பாரீசில் நடந்து வந்தது. இதில் நேற்றிரவு நடந்த ஆடவர் ஒற்றையர் பிரிவு இறுதி போட்டியில் ஜெர்மனியின் 29 வயதான அலெக்சாண்டர் ஸ்வெரேவ், 6-1, 4-6, 6-4, 6-7 (5), 6-1 என்ற செட்கணக்கில் இத்தாலியின் 14வது ரேங்கில் உள்ள ஃபிளாவியோ கோபோலியை வீழ்த்தி சாம்பியன் பட்டம் வென்றார். கிராண்ட்ஸ்லாம் தொடரில் இது அவருக்கு முதல் பட்டமாகும். மொத்தம் 4 மணி நேரம் 16 நிமிடங்கள் இந்த போட்டி நடந்தது.

மேலும் 1996 ஆஸ்திரேலியா ஓபனில் சாம்பியன் பட்டம் வென்ற போரிஸ் பெக்கருக்கு பின்னர் கிராண்ட்ஸ்லாம் பட்டம் வென்ற ஜெர்மனி வீரர் என்ற சாதனையை அவர் படைத்தார். அவருக்கு ரூ.30.84 கோடி பரிசு தொகை கிடைத்தது. வெற்றிக்கு பின்னர் அவர் கூறியதாவது: முதலில், நான் ஜெயித்துவிட்டேன் என்பதை என்னால் நம்பவே முடியவில்லை, எனது பயிற்சியாளர் குழுவினரை பார்த்தேன். அவர்கள் அனைவரும் கொண்டாடிக் கொண்டிருந்தார்கள். அப்போதுதான் நான் ஜெயித்துவிட்டேன் என்பதை உணர்ந்தேன்.

குறிப்பாக என் தந்தை தன் கைகளை உயர்த்தியதைப் பார்த்தபோதுதான், ‘சரி, நான் ஜெயித்துவிட்டேன்’ என்பது எனக்கு உறைத்தது. இந்த ஆடுகளம் எனக்கு நேர்மறையாகவும் எதிர்மறையாகவும் மிகவும் விசேஷமானது. எனது டென்னிஸ் வாழ்க்கையின் மிகக் கடினமான தருணங்களில் சிலவற்றை நான் இங்குதான் சந்தித்தேன். இங்கு 2024ல் இறுதிப் போட்டியில் தோற்றேன். அந்த நினைவுகள் எதுவும் எனக்கு அழிந்துவிடவில்லை. அவை இன்னும் என்னுடன்தான் இருக்கின்றன, ஆனால் இது அவை அனைத்தையும் மிஞ்சிவிடும்.

எனது 20 வயதில் ”மாஸ்டர்ஸ் 1000 போட்டியில் பட்டம் வென்றேன். ஆனால் கிராண்ட்ஸ்லாமில் பட்டம் வெல்ல அதிக காலம் பிடித்தது. இனி என்ன நடந்தாலும், நான் எப்போதும் ஒரு கிராண்ட்ஸ்லாம் சாம்பியனாகவே இருப்பேன், அதை என்னிடமிருந்து யாராலும் பறிக்க முடியாது. இந்தக் கோப்பை எனக்கு மிகவும் முக்கியமானது, ஏனென்றால் நான் இதில் தோற்றிருந்தால், என் தன்னம்பிக்கை பெருமளவு குறைந்திருக்கும். ஆனால் இப்போது நான் அதை வென்றுவிட்டதால், என்னால் மீண்டும் அதைச் செய்ய முடியும் என்று உணர்கிறேன். 12 வருடமாக ஒரே பயிற்சியாளர் குழுவுடன் இருக்கிறேன். அனைவரும் இந்த கோப்பையை வெல்ல தகுதியானவர்கள், என்றார்.

மிரா ஆண்ட்ரீவா முன்னேற்றம்
மகளிர் ஒற்றையர் பிரிவில் சாம்பியன் பட்டம் வென்ற ரஷ்யாவின் 19 வயதான மிரா ஆண்ட்ரீவா 8வது இடத்தில் இருந்து 2 இடங்கள் முன்னேறி 6வது இடத்தை பிடித்துள்ளார். பெலாரசின் சபலென்கா, கஜகஸ்தானின் ரைபகினா, போலந்தின் இகா ஸ்வியாடெக் முதல் 3 இடத்தை தக்க வைத்துள்ளனர். அமெரிக்காவின் பெகுலா ஜெசிகா, அமண்டா அனிசிமோவா தலா ஒருஇடம் முன்னேறி 4 மற்றும் 5வது இடத்தில் உள்ளனர். கோகோ காப் 3 இடங்கள் சரிந்த 7வது இடத்திலும், உக்ரைனின் எலினா ரைபகினா 8வது இடத்திலும் உள்ளனர்.