சென்னை: நீட் மறுதேர்வுக்கான தேர்வு மையங்கள் தொடர்பான அறிவிப்புகளை தேசிய தேர்வுமுகமை (என்டிஏ) வௌியிட்டுள்ளது. நீட் மறுதேர்வு குறித்த முக்கிய அறிவிப்பை தேசியத் தேர்வுகள் முகமை வெளியிட்டுள்ளது. வரும் ஜூன் 21-ம் தேதி நடைபெற உள்ள இத்தேர்வுக்கான, தேர்வு மைய நகரங்கள் குறித்த முன் அறிவிப்பு சீட்டு (Advance Intimation Slip) நேற்று அதிகாரப்பூர்வ இணையதளத்தில் வெளியிடப்பட்டுள்ளது.

நாடு முழுவதும் மே 3ம் தேதி நடைபெற்ற நீட் தேர்வில் ஏற்பட்ட குளறுபடி காரணமாக அந்த தேர்வை தேசிய தேர்வு முகமை ரத்து செய்வதாக அறிவித்து மறுதேர்வுக்கான அறிவிப்பு வெளியிடப்படும் என அறிவிக்கப்பட்டிருந்தது. இதற்கு பல்வேறு தரப்பில் இருந்து கடும் எதிர்ப்புகள் வந்த நிலையில், வினாத்தாள் கசிவு தொடர்பான விசாரணைகளும் நடந்துகொண்டுள்ளன. இந்நிலையில், நீட் மறுதேர்வு ஜூன் 21ம் தேதி (ஞாயிற்றுக்கிழமை) அன்று நடைபெற உள்ளது. மேலும் ஹால் டிக்கெட் வெளியிடுவது தொடர்பான தகவல்களும் வெளியிடப்பட்டுள்ளது.

இதுதொடர்பாக என்டிஏ வெளியிட்டுள்ள அறிவிப்பில் கூறியிருப்பதாவது: இந்தியா முழுவதும் உள்ள 551 நகரங்களிலும், வெளிநாடுகளில் உள்ள 14 நகரங்களிலும் இத்தேர்வு திட்டமிடப்பட்டுள்ளது. வழக்கம்போல மதியம் 2 மணி முதல் மாலை 5.15 மணி வரை நேரடியாக காகிதம் மற்றும் பேனா முறையில் தேர்வு நடைபெறும்.

மாணவர்கள் தங்களின் தேர்வு மையம் எந்த ஊரில் ஒதுக்கப்பட்டுள்ளது என்பதை என்டிஏ-வின் அதிகாரப்பூர்வ இணையதளமான neet.nta.nic.in என்ற முகவரிக்குச் சென்று விண்ணப்ப எண், பிறந்த தேதி மற்றும் பாதுகாப்பு குறியீடு உள்ளிட்ட நுழைவு விவரங்களை சரியாகப் பதிவு செய்ய வேண்டும். இப்போது திரையில் தோன்றும் தேர்வு மைய நகர விவரங்கள் அடங்கிய சீட்டைப் பதிவிறக்கம் செய்து, சரிபார்த்துக் கொள்ளவும்.

தற்போது வெளியாகியிருப்பது நீட் தேர்வுக்கான ஹால் டிக்கெட் கிடையாது. மாணவர்கள் தங்களின் பயணங்களை முன்கூட்டியே திட்டமிட்டுக்கொள்வதற்காக, தேர்வு மையம் எந்த ஊரில் அமைந்துள்ளது என்பதைத் தெரிவிக்கும் முன் அறிவிப்பு மட்டுமே. தேர்வு மையத்தின் முழு முகவரி அடங்கிய அதிகாரப்பூர்வ ஹால் டிக்கெட் பின்னர் தனியாக வெளியிடப்படும்.

அதேபோல், தேர்வு நடப்பதற்கு சில நாட்கள் முன்பு ஹால் டிக்கெட் ஹாஇந்த தேர்வு மைய சீட்டைப் பதிவிறக்கம் செய்வதில் மாணவர்களுக்கு ஏதேனும் தொழில்நுட்பச் சிக்கல்கள் அல்லது சிரமங்கள் ஏற்பட்டால், என்டிஏ-வின் உதவி மைய எண்களான 011-40759000 அல்லது 011-69227700 ஆகிய எண்களைத் தொடர்புகொள்ளலாம். மேலும், neetug2026@nta.ac.in என்ற மின்னஞ்சல் முகவரிக்கும் விவரங்களை அனுப்பி உதவி பெறலாம்.