லக்னோ: லக்னோ சூப்பர் ஜெயன்ட்ஸ் அணிக்கு எதிரான போட்டியில் பஞ்சாப் கிங்ஸ் அணி அசத்தல் வெற்றி பெற்றது. ஐபிஎல் தொடரின் 68வது போட்டி லக்னோவில் நேற்று நடந்தது. அதில் லக்னோ சூப்பர் ஜெயன்ட்ஸ், பஞ்சாப் கிங்ஸ் அணிகள் மோதின. டாஸ் வென்ற பஞ்சாப் அணி பந்து வீச்சை தேர்வு செய்தது. அதையடுத்து லக்னோ அணியின் துவக்க வீரர்களாக, ஜோஷ் இங்லீஸ், அர்ஷின் குல்கர்னி களமிறங்கினர்.
அஸ்மதுல்லா ஓமர்ஸாய் வீசிய 2வது ஓவரில், அர்ஷின் குல்கர்னி ரன் எடுக்காமல் வீழ்ந்தார். அடுத்து வந்த நிகோலஸ் பூரன் (2 ரன்), மார்கோ யான்சன் ஓவரில் அவுட்டானார். அதன் பின், களமிறங்கிய ஆயுஷ் படோனி அதிரடி ஆட்டத்தை அரங்கேற்றி ரன் குவிப்பில் ஈடுபட்டார். 18 பந்துகளில் 3 சிக்சர், 5 பவுண்டரிகளுடன் 43 ரன்களை வெளுத்த அவர், யுஸ்வேந்திர சஹல் வீசிய 7வது ஓவரில் ஆட்டமிழந்தார்.
அதன் பின் இணை சேர்ந்த ஜோஷ் இங்லீஸ், கேப்டன் ரிஷப் பண்ட் இணை சிறப்பாக ஆடி 65 ரன்கள் சேர்த்த நிலையில், ரிஷப் (26 ரன்), சஹல் பந்தில் வீழ்ந்தார். அடுத்ததாக, துவக்க வீரராக களமிறங்கி, அதிரடியாக, 44 பந்துகளில் 2 சிக்சர், 9 பவுண்டரிகளுடன் 72 ரன்கள் விளாசியிருந்த ஜோஷ் இங்லீஸ், 17வது ஓவரில் விக்கெட்டை பறிகொடுத்தார். யான்சன் வீசிய அடுத்த ஓவரில் முகுல் சவுத்ரி (1 ரன்) அவுட்டானார். 20 ஓவர் முடிவில் லக்னோ அணி, 6 விக்கெட் இழப்புக்கு 196 ரன்கள் எடுத்தது. அந்த அணியின் அப்துல் சமத் 37, அர்ஜுன் டெண்டுல்கர் 5 ரன்னுடன் களத்தில் இருந்தனர்.
அதன் பின் களமிறங்கிய பஞ்சாப் அணி 18 ஓவர்களில் 3 விக்கெட் இழப்புக்கு 200 ரன்கள் எடுத்தது. இதையடுத்து அந்த அணி 7 விக்கெட் வித்தியாசத்தில் வெற்றி பெற்றது. இந்த வெற்றியின் மூலம் பஞ்சாப் அணி புள்ளி பட்டியலில் 4ம் இடத்துக்கு உயர்ந்துள்ளது. பஞ்சாப் அணி கேப்டன் ஸ்ரேயஸ் ஐயர் அபாரமாக ஆடி 101 (51) ரன்களை குவித்தார்.
