சென்னை: தவெக தலைவர் விஜய் கடந்த புதன்கிழமை ஆட்சி அமைக்க அழைப்பு விடுக்கும்படி சென்னை, கிண்டியில் உள்ள கவர்னர் மாளிகைக்கு தமிழக ஆளுநர் அர்லேகரை சந்திக்க சென்றார். அப்போது விஜய்க்கு பொன்னாடை, நினைவு பரிசு வழங்கி ஆளுநர் வரவேற்றார். ஆனால் விஜய் ஆளுநருக்கு ஒரு பொன்னாடை கூட அணிவிக்காமல், கைகுலுக்கி மட்டும் வாழ்த்து தெரிவித்தார். வழக்கமாக முக்கிய பிரமுகர்களை பார்க்க செல்லும்போது பொன்னாடை, பூங்கொத்து கொடுத்து வாழ்த்துவது வழக்கம். இதைகூட விஜய்யுடன் சென்ற செங்கோட்டையன் உள்ளிட்ட நிர்வாகிகள் சொல்லி கொடுக்கவில்லையா? என்று தினகரனில் செய்தி வெளியாகி இருந்தது. அதேபோன்று விஜய், ஆளுநரை பார்க்க சென்றபோது பிஎம்டபிள்யு மின்சார காரில் சென்றார். ஆனால் முழு மெஜாரிட்டிக்கு தேவையான 118 எம்எல்ஏக்கள் கடிதம் இருந்தால் மட்டுமே ஆட்சி அமைக்க அழைப்பு விடுப்பேன் என்று ஆளுநர் கூறி விட்டார். இதைத்தொடர்ந்து 2வது முறையாக நேற்று முன்தினம் விஜய், ஆளுநரை நேரில் சென்று சந்தித்து, ஆட்சி அமைக்க அழைப்பு விடுக்க வேண்டும் என்று கோரிக்கை வைத்தார். அப்போதும், அவர் முதல் நாள் போட்டிருந்த காக்கி கலர் பேன்ட், வெள்ளை சட்டை, அதே பிஎம்டபிள்யு காரில் சென்றார். ஆனால், ஆளுநர் 118 எம்எல்ஏக்கள் ஆதரவு இருந்தால் மட்டுமே ஆட்சி அமைக்க அனுமதி அளிப்பேன் என்று உறுதியாக கூறி விட்டார்.

இதைத்தொடர்ந்து திமுக கூட்டணியில் இணைந்து போட்டியிட்ட விசிக, இந்திய கம்யூனிஸ்ட், மார்க்சிஸ்ட் கட்சிகளுடன் நேற்று விஜய் மற்றும் அவரது கட்சி நிர்வாகிகள் தொடர்ந்து பேசி ஆதரவு கேட்டார். 2 கம்யூனிஸ்ட் கட்சிகள் ஆதரவு தெரிவித்தன. இதையடுத்து அவசர அவசரமாக நேற்று மாலை 6.50 மணிக்கு தமிழக ஆளுநர் அர்லேகரை விஜய் நேரில் சந்தித்து, ஆதரவு எம்எல்ஏக்கள் பட்டியலை அளித்தார். முன்னதாக ஆளுநரை சந்தித்தபோது, ஆளுநருக்கு சால்வை மற்றும் பூங்கொத்து கொடுத்து விஜய் வாழ்த்து தெரிவித்தார். அதேபோன்று புளு கலர் ஜீன்ஸ், வெள்ளை சட்டை போட்டு சென்றார். முன்னதாக, தனது காரையும் மாற்றினார். அதன்படி, ஏற்கனவே சென்ற கார் ராசி இல்லை என கருதிய விஜய், டொயோட்டா லேண்ட் க்ரூஸர் காரில் சென்றார். கையில், கோயிலுக்கு சென்று வந்ததற்கான கயிறு மற்றும் நெற்றில் போட்டு, மூக்கு கண்ணாடி அணிந்து முற்றிலும் வித்தியாசமான கெட்டப்பில் இருந்தார் என்பது குறிப்பிடத்தக்கது.