திருமங்கலம், மே 6: திருமங்கலம் சட்டமன்ற தொகுதியில் திமுக வேட்பாளர் சேடபட்டி மணிமாறன், முன்னாள் அமைச்சர் ஆர்பி.உதயகுமார் மற்றும் தவெக வேட்பாளரை பின்னுக்குத்தள்ளி வெற்றி பெற்றுள்ளார். திருமங்கலம் சட்டமன்ற தொகுதியில் திமுக வேட்பாளர் சேடபட்டி மு.மணிமாறன் தன்னை எதிர்த்து போட்டியிட்ட அதிமுக வேட்பாளரும் முன்னாள் அமைச்சருமான ஆர்பி உதயகுமாரை 23 ஆயிரத்து 807 வாக்குகள் வித்தியாசத்தில் தோற்கடித்தார். இந்த தொகுதியில் திமுக, அதிமுக, தவெக உள்ளிட்ட 15 வேட்பாளர்கள் போட்டியிட்டனர்.

இந்த தொகுதிக்கான வாக்கு எண்ணிக்கை திருமங்கலம் அருகே கப்பலூரில் உள்ள அரசு கல்லூரியில் நேற்று முன்தினம் நடைபெற்றது. முதற்கட்டமாக தபால் ஓட்டுகள் எண்ணப்பட்டன. இதில் திமுகவிற்கு 1228 வாக்குகளும், அதிமுகவிற்கு 832 வாக்குகளும், தவெகவிற்கு 1126 வாக்குகளும் கிடைத்தன. மொத்த வாக்குகளில் திமுக வேட்பாளர் சேடபட்டி மு.மணிமாறன் 88 ஆயிரத்து 291 வாக்குகள் பெற்று வெற்றி பெற்றார். இவருக்கான வெற்றி சான்றிதழை தொகுதிக்கான தேர்தல் அலுவலர் திருமங்கலம் ஆர்டிஓ சிவஜோதி வழங்கினார்.

அதிமுக வேட்பாளரான முன்னாள் அமைச்சர் ஆர்பி.உதயகுமார் 64 ஆயிரத்து 484 வாக்குகள் பெற்று இரண்டாமிடம் பிடித்தார். தவெக வேட்பாளர் சதீஷ் 60 அயிரத்து 826 வாக்குகளுடன் மூன்றாம் இடத்தினை பெற்றார். இவர்களை தவிர மற்ற அனைத்து வேட்பாளர்களும் டெபாசிட் தொகையை இழந்தனர். திருமங்கலம் தொகுதியில் போட்டியிட்ட சசிகலா கட்சி வேட்பாளர் ஜீவிதா நாச்சியார் 2851 வாக்குகள் மட்டுமே பெற்று டெபாசிட் இழந்தார் என்பது குறிப்பிடத்தக்கது.