கிருஷ்ணகிரி, மே 6: வேப்பனஹள்ளி தொகுதியில் அதிமுக துணை பொதுச்செயலாளர் கே.பி.முனுசாமியை திமுக வேட்பாளர் சீனிவாசன் 138 வாக்கு வித்தியாசத்தில் வென்றார். கடைசி சுற்றுவரை இருவருக்கும் இழுபறி நீடித்ததால் வாக்கு எண்ணும் மையத்தில் பரபரப்பு நிலவியது.
கிருஷ்ணகிரி மாவட்டம், வேப்பனஹள்ளி சட்டமன்ற ெதாகுதியில் சீனிவாசன் (திமுக), கே.பி.முனுசாமி (அதிமுக), சம்பங்கி (தவெக), நாகராஜ் (நாதக) உள்ளிட்ட 13 வேட்பாளர்கள் களத்தில் இருந்தனர். நேற்று முன்தினம் காலை வாக்கு எண்ணிக்கை தொடங்கியது. முதலில் தபால் வாக்கு எண்ணப்பட்டது. இதில், ஆரம்பம் முதலே அதிமுக வேட்பாளர் கே.பி.முனுசாமி, திமுக வேட்பாளர் சீனிவாசன் இடையே கடும் போட்டி நிலவியது.
இந்நிலையில், 25வது சுற்று இறுதியில் திமுக வேட்பாளர் சீனிவாசன் 74,494 வாக்குகளும், அதிமுக வேட்பாளர் கே.பி.முனுசாமி 74,222 வாக்குகளும், தவெக வேட்பாளர் சம்பங்கி 63,482 வாக்குகளும், நாம் தமிழர் கட்சி வேட்பாளர் நாகராஜ் 4,493 வாக்குகளும் பெற்றிருந்தனர். அப்போது, ஒரு மின்னணு வாக்கு இயந்திரம் பழுதானதால் திறக்க முடியவில்லை. இதனால் அதிமுக வேட்பாளர் கே.பி.முனுசாமியை விட 272 வாக்குகள் கூடுதலாக பெற்று, திமுக வேட்பாளர் வெற்றி பெற்றதாக தெரிவிக்கப்பட்டது. ஆனால், இதனை அதிமுகவினர் ஏற்க மறுத்து, அதிகாரிகளுடன் கடும் வாக்குவாதத்தில் ஈடுபட்டனர்.
இதையடுத்து அதிகாரிகள் வாக்குப்பதிவு இயந்திரத்தை சரி செய்து திறந்தனர். தொடர்ந்து, அதில் இருந்த வாக்குகள் எண்ணப்பட்டது. அதில் திமுக வேட்பாளர் சீனிவாசன் 197 வாக்குகளும், அதிமுக வேட்பாளர் கே.பி.முனுசாமி 331 வாக்குகளும், தவெக சம்பங்கி 425 வாக்குகளும், நாதக நாகராஜ் 26 வாக்குகளும் பெற்றனர். இறுதியாக திமுக வேட்பாளர் சீனிவாசன் 74,691 வாக்குகளும், கே.பி.முனுசாமி 74,553 வாக்குகளும், தவெக வேட்பாளர் 63,907 வாக்குகளும், நாம் தமிழர் கட்சி வேட்பாளர் நாகராஜ் 4,519 வாக்குகளும் பெற்றிருந்தனர். இதன் மூலம் அதிமுக வேட்பாளர் கே.பி.முனுசாமியை விட, திமுக வேட்பாளர் 138 வாக்குகள் அதிகம் பெற்று வெற்றி பெற்றார். அதிமுகவின் துணை பொதுச்செயலாளரும், கடந்த முறை இதே தொகுதியில் போட்டியிட்டு வெற்றி பெற்றவருமான கே.பி.முனுசாமியை, முதல் முறையாக தேர்தலில் களம் கண்ட திமுக வேட்பாளர் சீனிவாசன் வீழ்த்தி வெற்றி பெற்றது, அதிமுகவினரிடையே அதிர்ச்சியை ஏற்படுத்தியுள்ளது.
