நியூயார்க்: பிரிட்டன் மன்னர் 3ம் சார்லஸ், அமெரிக்காவில் சுற்றுப்பயணம் செய்து வருகிறார். மன்னர் 3ம் சார்லஸூம், ராணி கேமிலாவும், கடந்த 2001ம் ஆண்டு செப்டம்பர் 11ம் தேதி நடத்தப்பட்ட இரட்டை கோபுர தாக்குதலில் உயிரிழந்தவர்களின் நினைவிடத்தில் மலர் வளையம் வைத்து அஞ்சலி செலுத்தினர். இந்த நிகழ்ச்சியில், மன்னர் 3ம் சார்லஸை நியூயார்க் நகர மேயரும், இந்திய வம்சாவளியினருமான சோஹ்ரான் மம்தானி சந்தித்து பேசினார். முன்னதாக, நிருபர்களிடம் பேசிய மம்தானி, ‘பிரிட்டன் மன்னர் 3ம் சார்லஸை சந்திக்கும்போது வரலாற்று சிறப்புமிக்க கோஹினூர் வைரத்தை இந்தியாவிடம் திருப்பி தருமாறு அவரிடம் வலியுறுத்துவேன்’ என்றார். ஆனால், அந்த சந்திப்பின்போது வைரத்தை பற்றிய பேச்சு நடத்தப்பட்டதா? என்பது குறித்து தெளிவான தகவல் ஏதுமில்லை. இது தொடர்பாக கருத்து தெரிவிக்க பக்கிங்ஹாம் அரண்மனையும் மறுத்துவிட்டது.

105.6 காரட் எடை கொண்ட கோஹினூர் வைரம், உலகின் மிக விலையுயர்ந்த வைரங்களில் ஒன்றாகும். 1849ம் ஆண்டு லாகூர் உடன்படிக்கையின் மூலம், மகாராஜா துலீப் சிங்கிடமிருந்து பிரிட்டிஷ் கிழக்கிந்திய நிறுவனம் இந்த வைரத்தை கைப்பற்றியது. இந்த வைரம், தற்போது ராணி எலிசபெத்தின் கிரீடத்தில் பதிக்கப்பட்டு, லண்டன் கோபுரத்தில் காட்சிக்கு வைக்கப்பட்டுள்ளது. இந்த வைரம் காலனித்துவ சுரண்டலின் சின்னம் என்றும், சீக்கிய மன்னரிடமிருந்து கட்டாயப்படுத்தி பறிக்கப்பட்டது என்றும் கூறி, வைரத்தை மீண்டும் ஒப்படைக்குமாறு பிரிட்டனிடம் இந்தியா தொடர்ந்து வலியுறுத்தி வருவது குறிப்பிடத்தக்கது.