நன்றி குங்குமம் டாக்டர்
முதுகுவலி என்பது இன்றைய சூழலில் சிறியவர் முதல் பெரியவர் வரை அனைவரும் சந்திக்கும் பொதுவான பிரச்னையாகும். முதுகுவலி மனிதனை முற்றிலும் நிலைகுலையச் செய்துவிடும் ஒருவித வலியாகும். முதுகுவலிக்கு பலவித காரணங்கள் உண்டு. உதாரணமாக, நீண்ட நேரம் இருக்கையில் அமர்ந்து பணி புரிவது. உடல் எடை அதிகரிப்பு, அதிக பளூ தூக்குதல், ஹார்மோன் ஏற்றத்தாழ்வுகள் அல்லது வளர்சிதை மாற்றக் கோளாறுகள், உயரமான செருப்புகள் அணிந்து நடப்பது போன்ற பலவித காரணங்கள் முதுகுவலிக்கு வழிவகுக்கும்.
முதுகுவலியைத் தவிர்க்கும் வழிகள்
உடல் எடையைப் பராமரிக்க வேண்டும். அதிக உடல்எடை பல நோய் பாதிப்புகளை தரலாம். அதில் ஒன்றுதான் முதுகுவலி. உடலின் கூடுதல் எடை, குறிப்பாக வயிற்றுப் பகுதியில், முதுகெலும்பில் அதிக அழுத்தத்தை ஏற்படுத்தி, தசைகள் மற்றும் தசைநார்கள் மீது திரிபை உண்டாக்கி, நாள்பட்ட முதுகுவலி மற்றும் மூட்டு (disc) நோய்களுக்கு வழிவகுக்கிறது.
நீண்ட நேரம் நின்றுகொண்டு வேலை செய்வதையும், அடிக்கடி குணிந்து எழுந்து வேலை செய்வதையும் தவிர்க்க வேண்டும். நாற்காலியில் உட்காரும்போது கால் மீது கால் போட்டு உட்காரக்கூடாது.
மோசமான சாலைகளில் அடிக்கடி இருசக்கர வாகனங்களில் பயணிப்பதும் முதுகுவலிக்கு ஒரு காரணமாகும். நான்கு சக்கர வாகனங்கள் ஓட்டும்போது, நிமிர்ந்து உட்கார்ந்து ஸ்டீயரிங் அருகில் அமர்ந்து ஓட்ட வேண்டும்.மேற்கத்தியக் கழிப்பறையைப் பயன்படுத்துவது நலமாகும்.
சுமை அதிகம் உள்ள பொருட்களை தூக்கும்போது இடுப்பை வளைத்துத் தூக்காமல், முழங்காலை மடக்கித் தூக்க வேண்டும். பெரும்பாலும், சுமையை மார்பில் தாங்கிப் பிடித்துக் கொள்ளலாம்.முதுகுவலி உள்ளவர்கள் கயிற்றுக் கட்டிலில் படுத்துறங்கக் கூடாது.இவர்கள் சரியான மெத்தையை தேர்ந்தெடுத்து பக்கவாட்டில், சற்று குப்புறப் படுத்துக் கொள்ளலாம்.நீளமான துடைப்பத்தைக் கொண்டு நின்றுகொண்டே தரையைச் சுத்தம் செய்வது நல்லது.சிறுவயதில் இருந்தே உடற்பயிற்சி செய்யும் வழக்கத்தை ஏற்படுத்திக் கொள்வது நல்லது. எலும்புகளுக்கு வலு சேர்க்கும் உணவுகளை அடிக்கடி உட்கொள்வது முதுகுவலியை தவிர்க்கும்.
தொகுப்பு: – ரிஷி
