தவெக வேட்பாளர்களுடன் நாளை பனையூரில் ஆலோசனை: இன்று சீரடி சாய்பாபா கோயிலில் தரிசனம் செய்ய விஜய் திட்டம்?

சென்னை: தமிழக வெற்றிக் கழகத்தின் அனைத்து வேட்பாளார்களுடன் விஜய் நாளை பனையூரில் ஆலோசனை நடத்த திட்டமிட்டுள்ள நிலையில், இன்று சீரடி சாய்பாபா கோயிலில் தரிசனம் செய்ய விஜய் திட்டமிட்டுள்ளதாக கூறப்படுகிறது. தமிழக சட்டப்பேரவை தேர்தலுக்கான வாக்குப்பதிவு கடந்த 23ம் தேதி நிறைவடைந்த நிலையில், வாக்கு எண்ணிக்கை வரும் மே 4ம் தேதி நடைபெறவுள்ளது. இந்த தேர்தலில் நடிகர் விஜய் தமிழக வெற்றிக் கழகத்தை தொடங்கி முதல் முறையாக தேர்தலைச் சந்தித்தார். அந்த கட்சி 233 தொகுதிகளில் போட்டியிட்ட நிலையில், எடப்பாடி தொகுதியில் சுயேச்சை வேட்பாளரை ஆதரித்தது. அக்கட்சியின் தலைவர் விஜய் பெரம்பூர் மற்றும் திருச்சி கிழக்கு தொகுதியில் போட்டியிட்டார்.

தேர்தல் வாக்குப்பதிவு நிறைவடைந்த பிறகு விஜய் தவெக முக்கிய நிர்வாகிகளைச் சந்தித்து ஆலோசனை நடத்தினார். அந்த ஆலோசனையில் வாக்குப்பதிவு, களம் எவ்வாறு உள்ளது, வாக்கு எண்ணிக்கையின் போது செய்ய வேண்டியவை உள்ளிட்ட பல்வேறு ஆலோசனைகள் மேற்கொண்டதாக தகவல் வெளியானது. இந்நிலையில், நாளை விஜய் பனையூரில் உள்ள தவெக அலுவலகத்தில் அனைத்து தவெக வேட்பாளர்களையும் சந்தித்து ஆலோசனை நடத்தவுள்ளதாக தகவல் வெளியாகியுள்ளது. இந்த ஆலோசனை கூட்டத்தில் வாக்கு எண்ணிக்கையின் போது எவ்வாறு செயல்பட வேண்டும், எவ்வளவு கவனமாக இருக்கவேண்டும், கடைபிடிக்க வேண்டியவை உள்ளிட்டவை குறித்து விஜய் வேட்பாளர்களுக்கு வழிகாட்டுதல்களை வழங்கவுள்ளதாக கூறப்படுகிறது.

சட்டப்பேரவை தேர்தல் வாக்குப்பதிவு நிறைவடைந்த பிறகு விஜய் பொதுவெளிக்கு வராமல் இருந்தார். இந்தநிலையில், விஜய் நேற்று அதிகாலை திருச்செந்தூர் முருகன் கோயிலில் சாமி தரிசனம் செய்தார். இந்நிலையில், மகாராஷ்டிரா மாநிலத்தில் உள்ள சீரடி சாய்பாபா கோயிலில் சாமிதரிசனம் செய்வதற்காக செல்லவுள்ளதாக தகவல் வெளியாகியுள்ளது. அதன்படி, இன்று காலை 10.30 மணிக்கு தனி விமானம் மூலம் மகாராஷ்டிரா செல்லும் விஜய், சீரடி சாய்பாபா கோயிலுக்குச் சென்று சாமி தரிசனம் செய்வார் என்று கூறப்படுகிறது. தனது தனிப்பட்ட பிரச்னைகள், தேர்தல் முடிவு உள்ளிட்ட காரணங்களுக்காக ஜோதிடரின் அறிவுரையின் பெயரில்தான் விஜய் தொடர்ச்சியாக ஆன்மிகப் பயணங்கள் மேற்கொண்டு சாமிதரிசனம் செய்கிறார் என்று கூறப்படுகிறது.