கோடை காலத்தில் மின்விசிறி மெதுவாக சுழன்றால், காற்று குறைவாக வரும், அறை குளிராது, மின்சாரமும் வீணாகும். உங்கள் சீலிங் மின்விசிறி அல்லது மேசை மின்விசிறி முன்புபோல வேகமாக சுழலவில்லை என்றால், பெரும்பாலும் அதை வீட்டிலேயே எளிதாக சரிசெய்யலாம். மின்விசிறியின் வேகம் குறைவதற்கான முக்கிய காரணங்கள்: பிளேடுகள் மற்றும் மோட்டாரில் தூசி, அழுக்கு படிதல்; மின்தேக்கி பழுதடைதல் பேரிங்குகளில் உராய்வு அல்லது உலர்தல்; வயரிங் தளர்வு அல்லது இணைப்பு பிரச்சனை; ரெகுலேட்டர் பழுதடைதல்; குறைந்த மின்னழுத்தம்; மிக பழைய மின்விசிறி; இவைதான் முக்கிய காரணங்கள்.

இதை சரிசெய்ய, முதலில் மின்சாரத்தை அணைத்துவிடுங்கள். பிறகு பிளேடுகள், கிரில், மோட்டார் பகுதி ஆகியவற்றை நன்கு சுத்தம் செய்யுங்கள். பிளேடுகளில் இருக்கும் தூசி, காற்றின் வேகத்தை குறைக்கும். லேசாக ஈரமான துணி அல்லது பிரஷ் கொண்டு துடைக்கவும். கிரில்லை திறந்து உள்ளே இருக்கும் தூசியையும் அகற்றுங்கள். சுத்தம் செய்த பிறகு விசிறியை இயக்கி பாருங்கள்; சில நேரங்களில் இதுவே வேகத்தை அதிகரித்து விடும்.பெரும்பாலான சமயங்களில் மின்விசிறி மெதுவாக சுழல்வதற்கு முக்கிய காரணம், மின்தேக்கி பழுதாகி இருப்பதுதான். இது, சிறிய உருளை மாதிரி இருக்கும் பாகம்.

சந்தையில் இருந்து அதே மதிப்புள்ள (உதாரணமாக 2.5F அல்லது 3.5 F) புதிய மின்தேக்கியை வாங்குங்கள். மின்சாரத்தை அணைத்து, பழையதை எடுத்து, புதியதை பொருத்துங்கள். இந்த வேலை எளிதானதுதான். இருப்பினும் எலக்ட்ரிசீயனின் ஆலோசனை அல்லது உதவியை பெறுவது நல்லது. வயரிங் மற்றும் இணைப்புகளை சரிபார்க்கவும். தளர்ந்த இணைப்புகள், துருப்பிடித்த வயர்கள், பழுதான ரெகுலேட்டர் ஆகியவை மின்விசிறி மெதுவாக சுழல காரணமாக இருக்கும். சுவிட்சை அணைத்துவிட்டு எல்லா இணைப்புகளையும் சரிபார்க்கவும். தேவைப்பட்டால் ரெகுலேட்டரை மாற்றலாம்.சில நேரங்களில் மின்னழுத்தம் குறைவாக இருப்பதால் விசிறி மெதுவாக சுழலும். நல்ல தரமான சீராக்கி அல்லது நிலைப்படுத்தியை பயன்படுத்தலாம்.

மின்விசிறியை வருடத்திற்கு குறைந்தது 2 முறை சர்வீஸ் செய்யுங்கள். புதிய விசிறி வாங்கும்போது BLDC அல்லது 5-நட்சத்திர ஆற்றல் சேமிப்பு மாடல்களை தேர்ந்தெடுக்கவும். அதிக காற்று வர பிளேடுகளின் கோணத்தை சரியாக அமைத்திருக்க வேண்டும்.

இந்த எளிய வழிமுறைகளை பின்பற்றினால், உங்கள் மின்விசிறி மீண்டும் வேகமாக காற்றை வீச தொடங்கும். அப்படியும் பிரச்னை தீராவிட்டால், ஒரு எலக்ட்ரிசீயனை அழைக்கவும். எந்த வேலை செய்தாலும் மின்சாரத்தை அணைத்துவிட்டு, கவனமாக செய்யவேண்டும். இதன்பின்னரும் மின்விசிறி வேலை செய்யவில்லை என்றால் அது பழைய மின்விசிறியாக இருந்தால் புதிதாக ஒன்றை வாங்குவதை தவிர வேறு வழி இல்லை.