சென்னை: தமிழக துணை முதல்வரும், திமுக இளைஞரணி செயலாளருமான உதயநிதி ஸ்டாலின், சேப்பாக்கம்-திருவல்லிக்கேணியில் நேற்று தீவிர வாக்கு சேகரிப்பில் ஈடுபட்டார். சேப்பாக்கம் வட்டம் 62, அய்யா தெருவில் தனது பிரசாரத்தை தொடங்கி சுமார் 1.30 மணி நேரத்திற்கு மேல் வீதி வீதியாக ஜீப்பில் சென்று, வாக்கு சேகரித்தார். அப்போது பேசியதாவது:

கடந்த முறை 70,000 வாக்கு வித்தியாசத்தில் வெற்றி பெற்றேன். மற்ற வேட்பாளர்கள் போல் எப்போதாவது தொகுதிக்கு வருவது நான் இல்லை. கடந்த 5 ஆண்டுகளாக உங்களுடன் தொடர்ந்து பயணம் செய்தேன். 135 தொகுதிகளில் சென்று மக்களைச் சந்தித்து வந்துள்ளேன். அதிலிருந்து தெரிவது என்னவென்றால், திமுக ஆட்சி அமையப் போவது உறுதி. மீண்டும் நம் தலைவர் தான் முதல்வர் பொறுப்பில் அமருவார். இதற்கு ஸ்டார்ட்டாக சேப்பாக்கம்-திருவல்லிக்கேணி இருக்க வேண்டும். நம்முடைய திட்டங்கள் அனைத்தும் மக்களிடம் சென்று சேர்ந்துள்ளன. கடந்த முறை வாக்குறுதிகள் நிறைவேற்றப்பட்டன. அதேபோல் ஆட்சிக்கு வந்தால் என்னென்ன செய்வோம் என்ற வாக்குறுதிகளை இந்த முறையும் அளித்துள்ளோம்.

இந்த தொகுதியில் நீங்கள் என்னை வெற்றி பெற வைப்பீர்கள் என்று தெரியும். திராவிட மாடல் 2.0 அமையப் போவது உறுதி. அதனை மனதில் வைத்துக்கொள்ள வேண்டும். மக்கள் அனைவரும் வாக்கு அளிக்க வேண்டும். அதனை உங்கள் குடும்பத்தினரிடமும், வீதிகளிலும் விழிப்புணர்வை ஏற்படுத்த வேண்டும். இவ்வாறு அவர் பேசினார்.

* கடைசி நிமிடம் வரை விழிப்போடு பணியாற்ற வேண்டும்: துணை முதல்வர் உதயநிதி ஸ்டாலின் நேற்று வெளியிட்ட அறிக்கை:

சட்டப்பேரவைத் தேர்தல் எனும் ஜனநாயகத் திருவிழா, கிட்டத்தட்ட இறுதிக்கட்டத்தை எட்டி இருக்கிறது. தமிழ்நாட்டு மக்கள் ஓரணியில் திரண்டு மதச்சார்பற்ற முற்போக்குக் கூட்டணியை வெற்றி பெறச் செய்ய ஆயத்தமாகிவிட்டார்கள். மக்களிடம் இருக்கும் எழுச்சியைப் பார்க்கும்போது, 234 இடங்களிலும் மதச்சார்பற்ற முற்போக்குக் கூட்டணிதான் வெல்லப் போகிறது.

இந்த இலக்கினை நாம் அடைய, தேர்தல் நாளின் கடைசி நிமிடம் வரை மிகுந்த விழிப்போடு பணியாற்றிட வேண்டும். அதேபோல், மே 4ம் தேதி, இறுதிச்சுற்று வாக்குகள் எண்ணப்பட்டு அதிகாரபூர்வ அறிவிப்பு வரும் வரை நமது தேர்தல் பணி தொடர வேண்டும். தலைவர் தொடரட்டும் – தமிழ்நாடு வெல்லட்டும் என கூறியுள்ளார்.