ஐதராபாத்: 19வது சீசன் ஐபிஎல் தொடரில் ஐதராபாத்தில் இன்று இரவு 7.30 மணிக்கு நடைபெறும் 21வது லீக் போட்டியில் ராஜஸ்தான் ராயல்ஸ்- சன் ரைசர்ஸ் ஐதராபாத் மோதுகின்றன. ராஜஸ்தான் ராயல்ஸ் , சிஎஸ்கே, குஜராத், மும்பை, நடப்பு சாம்பியன் ஆர்சிபி என மோதிய 4 போட்டிகளிலும் வெற்றிபெற்று அசூர பலத்தில் உள்ளது. ஆரெஞ்ச் தொப்பியை வைத்துள்ள 15 வயதான சூர்யவன்ஷி 266.66 ஸ்டிரைக்ரேட்டில் 200 ரன் விளாசி ருத்ரதாண்டவம் ஆடி வருகிறார். ஜெய்ஸ்வால் 183, துருவ் ஜூரல் 176 ரன் எடுத்து பேட்டிங்கில் முதுகெலும்பாக உள்ளனர். இவர்களை தாண்டி கேப்டன் ரியான் பராக், ஹெட்மயர் , ஜடேஜா உள்ளிட்டோருக்கு அதிகம் பேட்டிங் செய்ய வாய்ப்பு கிடைக்கவில்லை.
பவுலிங்கில் சுழலில் ரவி பிஷ்னோய் 9 விக்கெட்எடுத்துள்ளார். வேகத்தில் ஆர்ச்சர், நாந்த்ரே பர்கர் , சந்தீப் சர்மா கைகொடுத்து வருகின்றனர். மறுபுறம் சன்ரைசர்ஸ் ஐதராபாத் 4 போட்டியில் ஒரு வெற்றி, 3ல் தோல்விகண்டுள்ள நிலையில் இன்று 2வது வெற்றி நெருக்கடியில் உள்ளது. பேட்டிங்கில் கிளாசென் 184 ரன் அடித்துள்ளார். டிராவிஸ்ஹெட், அபிஷேக் சர்மா அதிரடி தொடக்கம் அளிக்கின்றனர். கேப்டன் இஷான் கிஷன், நிதிஷ்குமார்ரெட்டி சலில் அரோரா, அங்கீத் சர்மா என சிறந்த வீரர்கள்உள்ளனர். ஆனால் பவுலிங் தான் கவலைக்குரியதாக உள்ளது.
கம்மின்ஸ் இல்லாத நிலையில், ஹர்சல்பட்டேல், ஜெய்தேவ் உனத்கட், ஈஷான் மலிங்கா ரன்னை வாரிக்கொடுக்கின்றனர். இன்று பவுலிங்கில் ஒருசில மாற்றம் இருக்கலாம். ராஜஸ்தானின் வெற்றி நடைக்கு சொந்த ஊரில் சன்ரைசர்ஸ் முட்டுக்கட்டை போடுமா என்ற எதிர்பார்ப்பு உள்ளது. இரு அணிகளும் இதற்கு முன் 21 முறை நேருக்கு நேர் மோதி உள்ளன. இதில் 12ல் சன்ரைசர்ஸ், 9ல் ராஜஸ்தான் வென்றுள்ளன.
