*மயிலாடுதுறை கலெக்டர் உத்தரவு
மயிலாடுதுறை : மயிலாடுதுறை மாவட்டத்தில் மீன்பிடி தடைக்காலம் வருகிற ஏப்ரல் 15ம் தேதி முதல் நடைமுறைக்கு வருவதால் ஆழ்கடலில் மீன்பிடிக்கச் சென்றுள்ள விசைப்படகுகள் 14ம் தேதிக்குள் கரை திரும்ப வேண்டுமென மாவட்ட கலெக்டர் ஸ்ரீகாந்த் தெரிவித்துள்ளார்.
தமிழ்நாடு கடல் மீன்பிடிப்பு ஒழுங்குபடுத்தும் சட்டம் 1983-ன் கீழ் தமிழகத்தின் கிழக்கு கடல் பகுதி முழுவதிலும் (திருவள்ளூர் மாவட்டம் முதல் கன்னியாகுமரி மாவட்டம், கன்னியாகுமரி நகரம் வரை) மீன் இனப்பெருக்க காலத்தைக் கணக்கில் கொண்டும், மீன்வளத்தைப் பாதுகாத்திடும் பொருட்டும், ஆண்டுதோறும் ஏப்ரல் 15 முதல் ஜூன் 14 வரை (இரண்டு நாட்கள் உட்பட) 61 நாட்களுக்கு மீன்பிடி விசைப் படகுகள் மற்றும் இழுவலைப் படகுகள் மூலமாக கடலில் மீன்பிடிப்பதற்கு தடைவிதித்து அரசால் ஆணை வழங்கப்பட்டுள்ளது.
மேற்கண்ட அரசாணையின்படி, கடலில் மீன்கள் இனவிருத்திக்கு ஏற்ற காலமான ஏப்ரல் 15 முதல் ஜூன் 14 வரை உள்ள 61 நாட்கள் கடலில் மீன்பிடி விசைப் படகுகள் மற்றும் இழுவைப் படகுகள் மூலம் மீன்பிடிப்பு செய்வதை நிறுத்தி வைப்பதன் மூலம் இடையூறு இல்லாத இனவிருத்தி மேம்பட்டு, மீன்வளம் பெருக வாய்ப்புள்ளதால் மீனவர்கள் நலன் கருதி 2026 ஆம் ஆண்டு ஏப்ரல் 15 முதல் ஜூன் 14 வரை உள்ள 61 நாட்கள் மீன்பிடி விசைப் படகுகள் மற்றும் இழுவைப் படகுகள் மூலம் மயிலாடுதுறை மாவட்ட மீனவர்கள் எவரும் கடலுக்கு மீன்பிடிக்க செல்லக்கூடாது என இதன் மூலம் தெரிவிக்கப்படுகிறது.
மேலும், மீன்பிடித் தடைக்காலம் அமலுக்கு முன்னர் கடலுக்கு சென்ற மீன்பிடி விசைப் படகுகள் மற்றும் ஆழ்கடல் பகுதியில் மீன்பிடிப்பில் ஈடுபட்டுள்ள படகுகள் அனைத்தும் வரும் 14.4.2026 இரவு 12 மணிக்குள் கட்டாயம் கரைக்கு திரும்ப வேண்டும் என்றும், ஆழ்கடல் பகுதியில் மீன்பிடிப்பில் ஈடுபட்டுள்ள படகுகளுக்கு மீன்பிடித் தடைக்காலம் குறித்த தகவலை VHF/Satellite Phone மறும் பிற தகவல் தொடர்பு சாதனங்கள் மூலம் தெரிவித்து உடனடியாக கரைக்கு திரும்பிட முன்கூட்டியே அறிவுறுத்துமாறு அனைத்து மீன்பிடிப் படகு உரிமையாளர்களும் கேட்டுக்கொள்ளப்படுகிறார்கள் என மாவட்ட கலெக்டர் ஸ்ரீகாந்த் உத்தரவிட்டுள்ளார்.
