*சென்டர் மீடியன் பகுதியில் பொருத்தி நடவடிக்கை
ஓசூர் : ஓசூர்- கிருஷ்ணகிரி தேசிய நெடுஞ்சாலையில் வாகன ஓட்டிகளில் இரவுநேர பயணத்தை பாதுகாக்கும் வகையில், சென்டர் மீடியன் பகுதியில் ‘ஆன்டி-கிளேர் தடுப்பான்கள் அமைக்கப்பட்டுள்ளது.கிருஷ்ணகிரி மாவட்டம் ஓசூர் – கிருஷ்ணகிரி தேசிய நெடுஞ்சாலை வழியாக, தினமும் லட்சக்கணக்கான வாகனங்கள் வந்து செல்கின்றன.
வாகனங்கள் அதிகம் செல்லும் இந்த சாலையானது ஓசூர் அடுத்த பேரண்டப் பள்ளி அருகே சானமாவு வனப்பகுதியில் மேடாகவும், பள்ளமாகவும் உள்ளது. இதனால் இரவு நேரங்களில் சாலை வழியாக செல்லும் வாகனங்கள், பள்ளத்தில் இறங்கும் போது வேகத்தை கட்டுப்படுத்த முடியாமல், அடிக்கடி விபத்துக்களில் சிக்குகிறது.
தொப்பூருக்கு அடுத்த படியாக அதிக விபத்துக்கள் நடைபெறும் இடமாக, சானமாவு பகுதி உள்ளது. இந்த விபத்துக்கள் நடைபெறும் போது, ஓசூர்- கிருஷ்ணகிரி தேசிய நெடுஞ்சாலையில் கடுமையான போக்குவரத்து நெரிசல் ஏற்படுகிறது. இதனால் விபத்துக்களை தடுக்க சானமாவு வனப்பகுதி வழியாக செல்லும் தேசிய நெடுஞ்சாலையில், ஆன்டி-கிளேர் தடுப்பு பலகைகள் பொருத்தபட்டுள்ளது.
இதுகுறித்து தேசிய நெடுஞ்சாலைத்துணை அதிகாரிகள் கூறியதாவது: காஷ்மீர் முதல் கன்னியாகுமரி வரை செல்லும் பிரதான தேசிய நெடுஞ்சாலையானது, ஓசூர் வழியாக செல்கிறது. இந்நிலையில் தொப்பூருக்கு அடுத்த படியாக அதிக விபத்துக்கள் நடைபெறும் இடமாக பேரண்டப்பள்ளி அருகே உள்ள சானமாவு வனப்பகுதி உள்ளது.
இங்கு விபத்துக்களை தடுக்க வளைவுகள் மற்றும் மேடு பள்ளங்கள் நிறைந்த பகுதிகளில், வாகன ஓட்டிகளின் பாதுகாப்பிற்காக புதிய வகை ஆன்டி-கிளேர்’ (ஒளி சிதறல் தடுப்பு) பலகைகள் பொருத்தி உள்ளோம்.
இதனால் கண் கூச்சத்தை தடுத்தல், இரவு நேரங்களில் எதிரே வரும் வாகனங்களின் ‘ஹை-பீம்’ விளக்கு வெளிச்சம் நேரடியாக ஓட்டுநரின் கண்களில் படுவதை இந்த பச்சை நிற பலகைகள் தடுக்கின்றன. திடீர் கண் கூச்சத்தால் ஏற்படும் தற்காலிக பார்வையின்மையை இவை தடுப்பதால், சாலை விபத்துக்கள் கணிசமாக குறைகிறது.
மேலும் வாகன ஓட்டிகள் நிதானமாக செல்வார்கள். இவை காற்றில் எளிதாக ஆடும் வகையிலும், அதே சமயம் எதிரே வரும் ஒளியை முழுமையாக மறைக்கும் வகையிலும் நெடுஞ்சாலையின் மைய தடுப்புகளில் வரிசையாக பொருத்தப்பட்டு உள்ளன. இவ்வாறு அவர்கள் தெரிவித்தனர்.
