சென்னை: சென்னையில் ஆபரணத் தங்கம் விலை சவரனுக்கு ரூ.200 குறைந்து ரூ.1,12,800க்கு விற்பனையாகிறது. சர்வதேச பொருளாதாரம் மற்றும் அரசியல் சூழல், அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு அதிகரிப்பு, உலக பங்குச்சந்தை முதலீடு உள்ளிட்டவற்றின் அடிப்படையில், தங்கத்தின் விலை நிர்ணயிக்கப்படுகிறது. ஈரான் அமெரிக்கா, இஸ்ரேல் இடையிலான போர் காரணமாக தங்கத்தின் விலையில் தாக்கம் ஏற்பட்டுள்ளது.
அதாவது தங்கம் விலை நேற்று பவுனுக்கு ரூ.1000 அதிகரித்தது. தங்கம் விலை தொடர்ந்து ஏற்றம், இறக்கத்துடன் காணப்பட்டு வருகிறது. அதே நேரத்தில் சில நாட்களில் தங்கம் விலை அதிரடியாக உயர்ந்தும் அதிர்ச்சியையும் ஏற்படுத்தி வருகிறது. இந்த நிலையில் கடந்த 8ம் தேதி தங்கம் விலை பவுனுக்கு ரூ.2,720 உயர்ந்து, ஒரு பவுன் ரூ.1 லட்சத்து 13,600க்கு விற்பனையானது. தொடர்ந்து நேற்று முன்தினம் தங்கம் விலை கிராமுக்கு ரூ.200 குறைந்து, ஒரு கிராம் ரூ.14,000க்கும், பவுனுக்கு ரூ.1,600 குறைந்து, ஒரு பவுன் ரூ.1 லட்சத்து 12,000க்கும் விற்பனையானது. வெள்ளியும் கிலோவுக்கு ரூ.5 ஆயிரம் குறைந்து, பார் வெள்ளி ரூ.2.60 லட்சத்துக்கு விற்பனையானது.
இந்நிலையில் நேற்று மீண்டும் தங்கம் விலை அதிகரித்தது. நேற்று தங்கம் விலை கிராமுக்கு ரூ.125 உயர்ந்து, ஒரு கிராம் ரூ.14,125க்கும், பவுனுக்கு ரூ.1,000 உயர்ந்து, ஒரு பவுன் ரூ.1 லட்சத்து 13000க்கும் விற்பனையானது. மேலும் தங்கத்தை போல வெள்ளி விலையும் உயர்ந்தது. வெள்ளி விலை கிராமுக்கு ரூ.5 உயர்ந்து, ஒரு கிராம் ரூ.265க்கும், கிலோவுக்கு ரூ.5 ஆயிரமும் உயர்ந்து, பார் வெள்ளி ரூ.2.65 லட்சத்துக்கு விற்பனையானது. தங்கம் விலை ஒரு நிலையான நிலையில் இல்லாமல் தொடர்ந்து ஏற்றம், இறக்கத்துடன் காணப்பட்டு வருவது நகை வாங்குவோரை குழப்பத்தில் ஆழ்த்தியுள்ளது.
இதனையடுத்து இன்று சென்னையில் ஆபரணத் தங்கம் விலை சவரனுக்கு ரூ.200 குறைந்துரூ.1,12,800க்கு விற்பனையாகிறது. தங்கம் விலை கிராமுக்கு ரூ.25 குறைந்து ஒரு கிராம் ரூ.14,100க்கு விற்பனை செய்யப்படுகிறது. சென்னையில் சில்லறை வர்த்தகத்தில் வெள்ளி விலை மாற்றமின்றி ஒரு கிராம் ரூ.265க்கு விற்பனையாகிறது.
