சென்னை: நடிகரும், தவெக தலைவருமான விஜய் ஒரு முதிர்ச்சியற்ற அரசியல்வாதி என்று கர்நாடக துணை முதல்வர் கிண்டல் அடித்துள்ளார். தமிழக காங்கிரஸ் கட்சி சார்பில் சட்டமன்ற தேர்தலுக்கான காங்கிரஸ் தேர்தல் அறிக்கை வெளியிடும் நிகழ்ச்சி சென்னை சத்தியமூர்த்தி பவனில் நேற்று நடந்தது. அப்போது, கர்நாடக துணை முதல்வர் டி.கே.சிவகுமாரிடம் நிருபர்களிடம் கூறியதாவது: உண்மையான காங்கிரஸ் தவெக பக்கம் தான் இருப்பதாக நடிகர் விஜய் பேசியுள்ளார். இதில் இருந்தே விஜய் ஒரு முதிர்ச்சியற்ற அரசியல்வாதி. அவருக்கு அரசியல் முதிர்ச்சி என்றால் என்னவென்றே தெரியவில்லை. அவர் இன்னும் கற்றுக்கொள்ள வேண்டியவை நிறைய இருக்கின்றன. தமிழ்நாட்டில் அகில இந்திய காங்கிரஸ் கட்சி எப்போதும் திமுகவுடன் தான் இருக்கிறது. விஜய்யுடன் வேண்டுமானால் ஜி.கே.வாசனின் தமிழ் மாநில காங்கிரஸ் இருக்கலாம். ஆனால், இந்திய தேசிய காங்கிரஸ் அவரோடு இல்லை. யார் யாருடன் இருக்கிறார்கள் என்பதில் குழப்பம் தேவையில்லை. எங்களின் ஆதரவு தமிழக முதல்வர் மு.க.ஸ்டாலினுக்கு தான். எங்கள் கூட்டணி மூன்றில் 2 பங்கு இடங்களை கைப்பற்றி அமோக வெற்றி பெறும். இதில் எந்த மாற்றமும் இல்லை. இவ்வாறு அவர் கூறினார்.