இந்திய தேர்தல் ஆணையம், வாக்காளர்கள் தேர்தல் நடைமுறைகளை எளிதில் புரிந்துகொள்வதற்காக ‘ஸ்மார்ட் வாக்காளராக இருங்கள்’ என்ற தலைப்பில் விரிவான வழிகாட்டி கையேடு ஒன்றை வெளியிட்டுள்ளது. வாக்காளர் பதிவு முதல் வாக்குப்பதிவு நாள் வரை கடைபிடிக்க வேண்டிய நடைமுறைகளை விளக்கும் இக்கையேடு, தகவல்களின் களஞ்சியமாகத் திகழ்கிறது. இந்த 8 பக்க கையேட்டில், புதிய வாக்காளர்கள் தங்களை இணைத்துக்கொள்ள தற்போது ஆண்டுக்கு நான்கு முறை (ஜனவரி 1, ஏப்ரல் 1, ஜூலை 1 மற்றும் அக்டோபர் 1) வாய்ப்புகள் வழங்கப்பட்டுள்ளது குறித்த முக்கிய தகவல் இடம்பெற்றுள்ளது. மேலும், முகவரி மாற்றம் மற்றும் பிழைகளை திருத்த ‘படிவம் 8’ மற்றும் பெயர்களை நீக்க ‘படிவம் 7’ ஆகியவற்றைப் பயன்படுத்துவது குறித்த தெளிவான விளக்கங்கள் அளிக்கப்பட்டுள்ளன.

வாக்குப்பதிவு நாளன்று, ஆதார் அட்டை, ஓட்டுநர் உரிமம், பான் கார்டு உள்ளிட்ட 12 வகையான அங்கீகரிக்கப்பட்ட அடையாள ஆவணங்களில் ஏதேனும் ஒன்றைக் கொண்டு வந்து வாக்களிக்கலாம் என்ற பட்டியலும் இதில் விரிவாக வழங்கப்பட்டுள்ளது. இந்த கையேடு மிக முக்கியமான மற்றும் பயனுள்ள தகவல்களை தாங்கி வந்தாலும், இதில் ஒரு பெரிய நடைமுறைச் சிக்கல் இருப்பதாக வாக்காளர்கள் வருத்தம் தெரிவிக்கின்றனர். அதாவது, இந்த கையேட்டில் உள்ள எழுத்துக்கள் மிக மிகச் சிறியதாக அச்சிடப்பட்டுள்ளன. ‘தகவல்கள் அனைத்தும் மிகச் சிறப்பாக உள்ளன, ஆனால் சாதாரண கண்களால் இதைப் படிப்பது சவாலாக உள்ளது. குறிப்பாக, கண்ணாடி அணியும் முதியவர்கள் மற்றும் பார்வைத்திறன் சற்றே குறைவாக இருப்பவர்கள், பூதக்கண்ணாடி வைத்துப் பார்த்தால் மட்டுமே புரியும் அளவிற்கு எழுத்துக்கள் மிகச் சிறியதாக இருப்பது ஒரு பெரிய குறையாக உள்ளது’ என்று சமூக ஆர்வலர்கள் சுட்டிக்காட்டுகின்றனர்.

முக்கியமான ஆவணங்கள் மற்றும் விண்ணப்ப படிவங்களின் பெயர்கள் கூட மிகச் சிறியதாக இருப்பதால், சாதாரண வாக்காளர்களை இத்தகவல்கள் முழுமையாகச் சென்றடையுமா என்ற கேள்வி எழுந்துள்ளது. தேர்தல் ஆணையம் டிஜிட்டல் முறையில் இதைப் பகிரும்போது ‘ஜூம்’ செய்து பார்க்க முடிகிறது என்றாலும், அச்சிடப்பட்ட பிரதிகளில் இந்த எழுத்துக்கள் வாக்காளர்களுக்குச் சிரமத்தையே தருகிறது. குறிப்பாக, படிவம் 12 மற்றும் படிவம் 8 போன்ற முக்கிய விவரங்களைச் சாதாரணக் கண்களால் வாசிப்பது சவாலாக உள்ளது. தேர்தல் ஆணையம் டிஜிட்டல் தொழில்நுட்பத்தில் கவனம் செலுத்துவது போல், சாதாரண வாக்காளர்கள் எளிதில் வாசிக்கும் வகையில் எழுத்துக்களின் அளவிலும் கவனம் செலுத்தி இருக்க வேண்டும் என்பதே கள நிலவரமாக உள்ளது.

தேர்தல் ஆணையம் இதுபோன்ற பயனுள்ள தகவல்களை வெளியிடும்போது, பொதுமக்கள் எளிதில் வாசிக்கும் வகையில் பெரிய எழுத்துக்களில் வெளியிட்டால் அதன் நோக்கம் முழுமையாக நிறைவேறும் என்பதே அனைவரின் எதிர்பார்ப்பாகும்.

வாக்குச்சாவடியில் செல்போன் பாதுகாப்பு
வாக்குச் சாவடிக்குள் செல்போன் உள்ளிட்ட மின்னணு சாதனங்கள் கொண்டு செல்லத் தடை விதிக்கப்பட்டுள்ளது. இதற்காகவே, வாக்காளர்கள் தங்களது செல்போன்களைப் பாதுகாப்பாக வைத்துவிட்டுச் செல்ல, வாக்குச்சாவடிக்கு வெளியிலேயே ‘மொபைல் டெபாசிட் வசதி’ கொண்ட கவுன்டர்கள் அமைக்கப்பட்டுள்ளன.

7 விநாடி அதிசயம்
நீங்கள் யாருக்கு வாக்களித்தீர்கள் என்பதை உறுதி செய்ய விவிபேட் இயந்திரத்தின் கண்ணாடித் திரையில் தேர்ந்தெடுத்த வேட்பாளரின் சின்னம் மற்றும் பெயர் அடங்கிய சீட்டு சரியாக 7 விநாடிகள் தோன்றும். ஒருவேளை சீட்டு தெரியவில்லை என்றாலோ அல்லது ‘பீப்’ சத்தம் வரவில்லை என்றாலோ உடனடியாக அங்கிருக்கும் தலைமை அலுவலரை அணுகலாம்.

எஸ்.எம்.எஸ் மூலம் விவரம் அறியலாம்
இணையதளம் தவிர்த்து, மிக எளிமையாக பெயரை வாக்காளர் பட்டியலில் தேட 1950 என்ற எண்ணுக்கு குறுஞ்செய்தி அனுப்பலாம். கைப்பேசியில் ECI < இடைவெளி > உங்கள் அடையாள அட்டை எண் என தட்டச்சு செய்து 1950க்கு அனுப்பினால், வாக்குச்சாவடி விவரங்கள் பெறப்படும்.

வேட்பாளர்களின் ஜாதகம் உங்கள் கையில்
வேட்பாளர்களின் கல்வித் தகுதி, சொத்து விவரங்கள், மற்றும் அவர்கள் மீது குற்றப்பின்னணி ஏதேனும் உள்ளதா என்பதை ேகஒய்சி செயலி மூலம் எவரும் எளிதில் சரிபார்த்துக் கொள்ளலாம். ஜனநாயகத்தை நேர்மையாகக் கடைபிடிக்க இது மிக முக்கியமான தொழில்நுட்பமாகும்.