என் தொகுதி மக்களுடன் இருப்பதே மகிழ்ச்சி: ராயபுரம் அ.தி.மு.க வேட்பாளர் டி.ஜெயக்குமார் உருக்கம்

சென்னை: என் தொகுதி மக்களுடன் இருப்பதே மகிழ்ச்சி என ராயபுரம் அ.தி.மு.க வேட்பாளர் டி.ஜெயக்குமார் உருக்கமாக தெரிவித்தார். ராயபுரம் சட்டமன்ற தொகுதியில் அ.தி.மு.க வேட்பாளராக போட்டியிடும் டி.ஜெயக்குமார் தீவிர வாக்கு சேகரிப்பில் ஈடுபட்டு வருகிறார். வீடு வீடாக சென்று இரட்டை இலை சின்னத்துக்கு ஓட்டு கேட்கிறார். அப்போது ஆண்களும் பெண்களும் நீங்கள் எங்கள் வீட்டு பிள்ளை. வெள்ளப்பாதிப்பு காலங்கள் உள்ளிட்ட பல்வேறு கஷ்ட காலங்களில் ஓடோடி வந்து எங்களுக்கு உதவிய உங்களை எப்போதும் மறக்க மாட்டோம். நீங்கள் எம்.எல்.ஏ, அமைச்சர் பதவிகளில் இருந்த கால கட்டங்களில் ராயபுரம் தொகுதியை பல்வேறு நலத்திட்டங்கள் மூலம் மேம்படுத்தியதை ஒரு போதும் மறக்க மாட்டோம். இரட்டை இலைக்கே வாக்களிப்போம் என்று உறுதி கூறினர்.

இதுகுறித்து டி.ஜெயக்குமார் உருக்கமாக கூறும்போது, ‘ராயபுரம் தொகுதி மக்களின் அன்பான வரவேற்பிலும் பாசத்திலும் நெகிழ்ந்து போகிறேன். எப்போதும் எனது தொகுதி மக்களுடன் இருப்பதே எனக்கு மகிழ்ச்சியிலும் மகிழ்ச்சி அளிப்பதாக இருக்கிறது’’ என்றார். டி.ஜெயக்குமாருடன் கூட்டணி கட்சி தொண்டர்கள் பலரும் ஊர்வலமாக சென்று இரட்டை இலைக்கு ஓட்டு போடும்படி கோஷங்கள் எழுப்பினார்கள். போஜராஜ நகர் பகுதியில் வாக்காளர்கள் மத்தியில் டி.ஜெயக்குமார் பேசும்போது, ‘’கஷ்டமோ நஷ்டமோ சுகமோ துக்கமோ உங்கள் கூட இருக்கும் ஒரே நபர் யார்? என்றதும் டி.ஜெயக்குமார் என்று கூட்டத்தினர் கோஷம் போட்டனர். தொடர்ந்து ஜெயக்குமார் பேசும்போது, ‘’நான் யாரிடமாவது அடாவடி செய்தேனா? கட்டப்பஞ்சாயத்து செய்தேனா?. ரியல் எஸ்டேட் செய்தேனா?. அது எதுவும் தெரியாத எனக்கு தெரிந்த ஒரே தொழில் காலையில் இருந்து மாலை வரை மக்களை சந்திப்பதும் அவர்களிடம் குறைகள் கேட்டு நிவர்த்தி செய்வதும்தான். எப்போதும் தொகுதி மக்களுக்கு தொண்டு செய்யும் ஊழியனாகவே நான் இருக்கிறேன். எனக்கு இரட்டை இலை சின்னத்துக்கு வாக்களித்து வெற்றி பெற செய்யும்படி கேட்டுக் கொள்கிறேன்’’ என்றார்.

டி.ஜெயக்குமார் இன்று (5-ந்தேதி) பிற்பகல் ஜி.எம். பேட்டை செங்காளம்மன் கோயில், இந்திரா நகர் அவுசிங் போர்டு, ஜி.எம்.பேட்டை அவுசிங் போர்டு, துரை பள்ளம், ஜீவரத்தினம் நகர், பெரிய தம்பி தெரு, துரை தெரு, காசிமேடு திரவுபதி அம்மன் கோயில், ஜி.எம்.பேட்டைரோடு, கொடிமரத்தெரு வழி சந்து, எஸ்.என்.செட்டி தெரு, காசி தோட்டம், பெண்டில்மென் கார்டன் வழி சந்து, எ.ஜே.காலனி, மார்க்கெட் சந்து, தம்பு சந்து, ஷேக் மேஸ்திரி தெரு, பக்கிரி தெரு, உசேன் மேஸ்திரி தெரு உள்ளிட பல பகுதிகளில் வாக்காளர்களை சந்தித்து ஓட்டு சேகரிக்கிறார்.