சென்னை: வில்லிவாக்கம் தொகுதி திமுக வேட்பாளர் கார்த்திக் மோகன் தனது தொகுதிக்கு உட்பட்ட பகுதிகளில் அனல் பறக்கும் பிரசாரத்தில் ஈடுபட்டார். அவருக்கு பொதுமக்கள் உற்சாக வரவேற்பு அளித்தனர். சென்னை வில்லிவாக்கம் சட்டமன்ற தொகுதி திமுக வேட்பாளர் கார்த்திக் மோகன் தனது தொகுதிக்கு உட்பட்ட பகுதிகளில் அனல் பறக்கும் பிரசாரத்தில் ஈடுபட்டு வருகிறார். அவர் செல்லும் இடம் எல்லாம் மக்கள் உற்சாக வரவேற்பு அளித்து வருகின்றனர்.
இந்த நிலையில் வேட்பாளர் கார்த்திக் மோகன் வில்லிவாக்கம் தொகுதிக்கு உட்பட்ட அயனாவரம், மெட்டு தெரு மற்றும் கீழ்ப்பாக்கம் சன்னியாசிபுரம் 98, 98அ ஆகிய வார்டுகளில் வீடுவீடாகச் சென்று, மக்களை சந்தித்து தீவிர தேர்தல் பரப்புரை மேற்கொண்டார். பிரசாரத்தின் போது பகுதி செயலாளர்கள் கூபி ஜெயன், வாசு, மற்றும் தொகுதி பொறுப்பாளர் நாகலிங்கம் உள்ளிட்டோர் உடனிருந்தனர். வழிநெடுகிலும் திரண்டிருந்த திமுக, காங்கிரஸ், விசிக, இடதுசாரிகள் உள்ளிட்ட மதச்சார்பற்ற முற்போக்குக் கூட்டணியின் ஆயிரக்கணக்கான தொண்டர்கள் மலர் தூவியும், முழக்கங்களை எழுப்பியும் உற்சாக வரவேற்பு அளித்தனர்.
முன்னதாக வில்லிவாக்கம் தொகுதி திமுக வேட்பாளர் கார்த்திக் மோகன் மநீம தலைவர் கமல்ஹாசனை நேரில் சந்தித்து வாழ்த்துப் பெற்றார். அப்போது சென்னை கிழக்கு மாவட்ட செயலாளர் அமைச்சர் பி.கே. சேகர்பாபு உடன் இருந்தார். மேலும் தென்னிந்திய திருச்சபையின் சென்னைப் பேராயத்திற்கு நேரில் சென்று, சென்னை பேராயர் பால் பிரான்சிஸ் ரவிச்சந்திரனை நேரில் சந்தித்து வாழ்த்துப் பெற்றார். இதே போல இந்திய யூனியன் முஸ்லிம் லீக் நிர்வாகிகளையும், அதனைத் தொடர்ந்து தேமுதிக மற்றும் பிற கூட்டணிக் கட்சிகளின் முக்கிய நிர்வாகிகளையும் நேரில் சந்தித்து ஆலோசனைக் கூட்டத்தில் கலந்து கொண்டார்.
