சென்னை: வாக்குப்பதிவு இயந்திரத்தில் வேட்பாளர் வரிசை சீட்டில், வேட்பாளரின் வண்ணப் புகைப்படம் ஒட்டப்படும் என்று தேர்தல் கமிஷன் அறிவித்துள்ளது. இதற்கு முன் நடந்த தேர்தல்களில் இவிஎம் இயந்திரத்தில் வேட்பாளர் பெயர் சீட்டில் மூன்று வரிசை இருக்கும். முதல் வரிசையில் வரிசை எண், இரண்டாம் வரிசையில் வேட்பாளரின் பெயர், மூன்றாம் வரிசையில் அவருக்கான தேர்தல் சின்னம் இடம் பெற்றிருக்கும்.

இந்த முறை வேட்பாளரின் வண்ண புகைப்படத்தையும் இணைப்பதற்கு தேர்தல் கமிஷன் முடிவு செய்துள்ளது. இரண்டாம் வரிசையில் இடம் பெற்றுள்ள வேட்பாளரின் பெயருக்கு அடுத்தபடியாக வேட்பாளரின் வண்ண புகைப்படம் வைக்கப்படும். முதலாவது, அங்கீகரிக்கப்பட்ட தேசிய கட்சிகளின் வேட்பாளரின் பெயர்கள், அகர வரிசையில் (அந்தந்த மாநில மொழியில்) வரிசைப்படுத்தப்படும்.

2வதாக, அங்கீகரிக்கப்பட்ட மாநில கட்சிகளின் வேட்பாளரின் பெயர்கள் வரிசைப்படுத்தப்படும். 3வதாக, அங்கீகரிக்கப்படாத பதிவு பெற்ற கட்சிகளின் வேட்பாளர் பெயர்கள் அகர வரிசையில் வரிசைப்படுத்தப்படும். 4வதாக சுயேச்சை வேட்பாளர்களின் பெயர்கள் அகர வரிசையில் வரிசைப்படுத்தப்படும். கடைசி பெயராக நோட்டா இடம் பெறும். அகர வரிசைக்காக, பெயர்களின் முதல் எழுத்தே கருத்தில் கொள்ளப்படும் என்று தேர்தல் அதிகாரி கூறினார்.