கொல்கத்தா: கொல்கத்தா அணிக்கு எதிரான ஐபிஎல் போட்டியில் நேற்று, சன்ரைசர்ஸ் ஐதராபாத் அணி 65 ரன் வித்தியாசத்தில் அபார வெற்றி பெற்றது. ஐபிஎல் 19வது தொடரின் 6வது போட்டி, கொல்கத்தா நகரின் ஈடன் கார்டன் திடலில் நேற்று நடந்தது. அதில், சன்ரைசர்ஸ் ஐதராபாத், கொல்கத்தா நைட் ரைடர்ஸ் அணிகள் மோதின. டாஸ் வென்ற கொல்கத்தா பந்து வீசியது. அதையடுத்து, சன்ரைசர்ஸ் அணியின் துவக்க வீரர்களாக டிராவிஸ் ஹெட், அபிஷேக் சர்மா களமிறங்கினர். துவக்கம் முதல் அடித்து ஆடத் துவங்கிய அவர்கள் மளமளவென ரன்களை குவிக்கத் துவங்கினர்.
அவர்களின் அதிரடியால், 4.1 ஓவரில் அபிஷேக் சர்மா அடித்த மெகா சிக்சருடன் சன்ரைசர்ஸ் அணி அரை சதம் கடந்தது. வருண் சக்ரவர்த்தி வீசிய 5வது ஓவரில் விஸ்வரூபம் எடுத்த அபிஷேக் சர்மா, 2 சிக்சர், 4 பவுண்டரிகள் விளாசியதால், அந்த ஓவரில் 25 ரன்கள் கிடைத்தன. மெகா ஸ்கோரை நோக்கி போட்டி நகர்ந்து கொண்டிருந்த சமயத்தில் கார்த்திக் தியாகி வீசிய 6வது ஓவரில் ஹெட் (21 பந்து, 3 சிக்சர், 6 பவுண்டரி, 46 ரன்) ஆட்டமிழந்தார்.
அடுத்து வந்த கேப்டன் இஷான் கிஷண் 14 ரன்னில் அவுட்டாகி வெளியேறினார். பிளெஸிங் முஸரபாணி வீசிய அந்த 8வது ஓவரில் அபிஷேக் சர்மாவும் (21 பந்து, 4 சிக்சர், 4 பவுண்டரி, 48 ரன்) விக்கெட்டை பறிகொடுத்தார். பின் வந்த அனிகேத் வர்மா 1 ரன்னில் வீழ்ந்தார். அதன் பின் இணை சேர்ந்த ஹென்றிச் கிளாசன், நிதிஷ் குமார் ரெட்டி சிறப்பாகவும் பொறுப்புடனும் ஆடி ரன்களை உயர்த்தினர். அதனால் 18வது ஓவர் முடிவில் சன்ரைசர்ஸ் ஸ்கோர் 200 ஆனது.
வைபவ் அரோரா வீசிய 19வது ஓவரின் முதல் பந்தில் நிதிஷ் குமார் (24 பந்து, 39 ரன்), அடுத்த பந்தில் சலீல் அரோரா (ரன் இல்லை) ஆட்டமிழந்தனர். கடைசி ஓவரில் கிளாசன் (35 பந்து, 1 சிக்சர், 4 பவுண்டரி) ஆட்டமிழந்தார். 20 ஓவர் முடிவில் சன்ரைசர்ஸ் ஐதராபாத், 8 விக்கெட் இழப்புக்கு 226 ரன்கள் குவித்திருந்தது. அடுத்து களமிறங்கிய கொல்கத்தா 16 ஓவரில் 161 ரன்னுக்கு ஆல் அவுட்டாகி சுருண்டது. ரகுவன்ஷி அதிகபட்சமாக 52 ரன் (29 பந்து) எடுத்திருந்தார். சன்ரைசர்ஸ் தரப்பில் உனாத்கட் 3, இஷான் மலிங்கா, நிதிஷ்குமார் ரெட்டி தலா 2, ஹர்ஸ் துபே 1 விக்கெட் கைப்பற்றினர்.
* பவர் பிளேயில் பவர் காட்டிய சன்ரைசர்ஸ்
கொல்கத்தா அணிக்கு எதிரான போட்டியில் முதலில் ஆடிய சன்ரைசர்ஸ் அணியின் துவக்க வீரர்கள் டிராவிஸ் ஹெட், அபிஷேக் சர்மா, துவக்கம் முதல் பந்துகளை துவம்சம் செய்து ரன் குவிப்பில் ஈடுபட்டனர். அதனால் சிக்சர், பவுண்டரிகளாக பறந்து, அணியின் ஸ்கோர் ஜெட் வேகத்தில் உயர்ந்தன.
இருவரில் யார் அரை சதம் அடிப்பார் என ரசிகர்கள் ஆவலுடன் எதிர்பார்த்திருந்த நிலையில், 6வது ஓவரை வீசிய கார்த்திக் தியாகி பந்தில் டிராவிஸ் ஹெட் ஆட்டமிழந்தார். பவர் பிளேயில் வீசப்பட்ட 6 ஓவர் முடிவில் சன்ரைசர்ஸ் ஐதராபாத் அணி ஒரு விக்கெட் இழந்து 84 ரன்கள் விளாசி வலுவான அடித்தளம் அமைத்திருந்தது. அப்போது அணியின் ஸ்டிரைக் ரேட், 14 ஆக இருந்தது.
