தஞ்சை: பேராவூரணி தொகுதியில் கஞ்சா வழக்கில் கைதாகி ஜாமீனில் வந்தவர் தவெக வேட்பாளராக அறிவிக்கப்பட்டதால் தலைமை மீது நிர்வாகிகள் அதிருப்தியில் உள்ளனர். இதுதொடர்பான வீடியோ சமூகவலைதளத்தில் வைரலாகி வருகிறது. தஞ்சை மாவட்டம் பேராவூரணி சட்டமன்ற தொகுதியில் தவெக சார்பில் அதே பகுதியை சேர்ந்த சேதுபாவாசத்திரம் மத்திய ஒன்றிய செயலாளர் அருள்முருகன் போட்டியிட போவதாக பரவலாக பேசப்பட்டு வந்தது. தவெக சார்பில் எடுக்கப்பட்ட சர்வேயிலும் அருள்முருகன் அதிக வாக்குகள் பெறுவதற்கான வாய்ப்பு உள்ளதால் அவரே போட்டியிட வேண்டும் என்று தலைமை கூறியதோடு குறிப்பிட்ட தொகையை தேர்தலுக்கு செலவு செய்ய வேண்டும் என்றது.
தவெக தலைமை கூறிய தொகையை தன்னால் செலவு செய்ய இயலாது. அதனால் அடுத்த தேர்தலில் பார்த்து கொள்ளலாம் என்று அருள்முருகன் கூறிவிட்டார். இதனால் கடைசி நேரத்தில் பேராவூரணி தொகுதி தவெக வேட்பாளராக அதே பகுதியை சேர்ந்த சந்திர காண்டீபன் அறிவிக்கப்பட்டார்.
இந்நிலையில் தொகுதிக்கு நன்கு பரிச்சியமான நபரை நிறுத்தாமல் சந்திர காண்டீபனை எப்படி வேட்பாளராக அறிவிக்கலாம் என்று தவெகவில் சலசலப்பு ஏற்பட்டது. மேலும் சந்திர காண்டீபன் குறித்த பல்வேறு தகவல்கள் சமூக வலைதளங்களில் வெளியானது. அதில், அவர் கடந்த சில நாட்களுக்கு முன் கஞ்சா வழக்கில் கைதாகி சிறையில் இருந்ததாகவும், 10 நாட்களுக்கு முன்பு தான் ஜாமீனில் வெளிவந்ததாகவும் தகவல் பரவி வருகிறது. அதுமட்டுமின்றி அவர் மீது குடும்ப பிரச்னை காரணமாக அடிதடி வழக்குகள் இருந்ததாகவும், அந்த பிரச்னையும் நீதிமன்றத்தை அணுகி முடிக்கப்பட்டதாகவும் கூறப்பட்டிருந்தது. இந்த வீடியோ சமூக வலைதளங்களில் தற்போது வைரலாகி வருகிறது.
சந்திர காண்டீபன் மீது மேலும் 2 அடிதடி வழக்குகள் நிலுவையில் உள்ளதாகவும் போலீஸ் தரப்பில் கூறப்படுகிறது. இப்படி குற்ற வழக்குகள் உள்ளவரை தவெக தலைமை எப்படி வேட்பாளராக அறிவித்தது என்று இந்த தொகுதி மக்கள் மட்டுமின்றி அந்த கட்சிக்காரர்களே குழப்பத்தில் உள்ளனர். மேலும் இவருக்கு எப்படி பொதுமக்களை அணுகி வாக்கு சேகரிப்பார். பணம் பலம் இருந்தால் யாருக்கு வேண்டுமானாலும் சீட் கொடுக்கலாமா என்று பேராவூரணி தொகுதி தவெக நிர்வாகிகள் கேள்வி எழுப்பி வருகின்றனர்.
