லக்னோ: உத்தரப் பிரதேச மாநிலம் அயோத்தியில் நடைபெற்ற ஸ்ரீ லட்சுமி நாராயண மகா யாகத்தில் பங்கேற்றுவிட்டு, பலியா நோக்கித் திரும்பிக் கொண்டிருந்த பக்தர்களின் பேருந்து மௌ மாவட்டத்தில் கோர விபத்துக்குள்ளானது.

மார்ச் 20 முதல் 28 வரை நடைபெற்ற ஆன்மீக நிகழ்வை முடித்துவிட்டு நள்ளிரவு சுமார் 1:30 மணியளவில் ஹல்தர்பூர் காவல் எல்லைக்குட்பட்ட ரன்புரா-முபாரக்பூர் சாலையில் பேருந்து சென்று கொண்டிருந்தபோது, எதிர்பாராதவிதமாக ஓட்டுநரின் கட்டுப்பாட்டை இழந்து சாலையோரமிருந்த ஒரு பெரிய மரத்தில் பலமாக மோதியது. இந்த விபத்தின் தாக்கம் எவ்வளவு தீவிரமாக இருந்ததென்றால், பேருந்தின் முன்பகுதி முற்றிலும் உருக்குலைந்தது. விபத்து நடந்த சமயம் பயணிகள் அனைவரும் ஆழ்ந்த உறக்கத்தில் இருந்ததால், அவர்களுக்குச் சமாளிக்கக் கூட அவகாசம் கிடைக்கவில்லை. இதனால் பேருந்துக்குள் பெரும் அலறல் சத்தமும் பதற்றமும் நிலவியது.

சத்தம் கேட்டு ஓடிவந்த அப்பகுதி கிராம மக்கள் உடனடியாக மீட்புப் பணியில் இறங்கி, பேருந்துக்குள் சிக்கியிருந்தவர்களைப் பத்திரமாக வெளியே மீட்டனர். இந்த விபத்தில் பெண்கள், குழந்தைகள் மற்றும் முதியவர்கள் உட்பட சுமார் 40 பேர் காயமடைந்தனர். காயமடைந்தவர்கள் அனைவரும் முதலில் ஜோகாபூர் சமூக நல மையத்திற்குக் கொண்டு செல்லப்பட்டு, பின்னர் தீவிர சிகிச்சைக்காக மௌ மாவட்ட அரசு மருத்துவமனைக்கு மாற்றப்பட்டனர்.

அவர்களில் சிலரது நிலைமை கவலைக்கிடமாக இருப்பதாக மருத்துவமனை வட்டாரங்கள் தெரிவிக்கின்றன. தகவலறிந்து சம்பவ இடத்திற்கு வந்த போலீசார் விபத்து குறித்து விசாரணை நடத்தி வரும் நிலையில், பாஜக மாவட்டத் தலைவர் ராமாஷ்ரே மௌரியா காயமடைந்தவர்களைச் சந்தித்து ஆறுதல் கூறி, தேவையான அனைத்து உதவிகளும் செய்யப்படும் என உறுதியளித்தார். புண்ணிய பயணத்தை முடித்துவிட்டுத் திரும்பிய போது ஏற்பட்ட இந்த விபத்து அப்பகுதியில் பெரும் சோகத்தை ஏற்படுத்தியுள்ளது.