*பொதுமக்கள் மகிழ்ச்சி
பவானி : பவானி நகராட்சியில் பொதுமக்களின் கோரிக்கைகளை நிறைவேற்றும் வகையில் 25.27 கி.மீ. தொலைவுக்கு 152 தெருக்களில் ரூ.12.82 கோடியில் புதிதாக தார்ச்சாலை அமைக்கப்பட்டுள்ளது. இதற்கு, பொதுமக்கள் வரவேற்பு தெரிவித்துள்ளனர்.
பவானி நகராட்சியில் அம்ரூத் திட்ட பணிகளுக்காக பிரதான மற்றும் பகிர்மானக் குழாய்கள் அமைக்க சாலைகளில் குழிகள் தோண்டப்பட்டு குழாய்கள் பதிக்கப்பட்டன. இதற்காக தோண்டப்பட்ட குழிகளில் கான்கிரீட் கலவை கொண்டு சீரமைக்கப்பட்டு, போக்குவரத்து எளிதாக நடவடிக்கை எடுக்கப்பட்டது.
இந்நிலையில், புதிதாக தார் சாலை அமைக்க வேண்டும் என பொதுமக்கள் கோரிக்கை விடுத்தனர். இதனைப் பரிசீலித்த தமிழக அரசு தார் சாலைகளை புதுப்பிக்க நிதி ஒதுக்கியது. இதைத் தொடர்ந்து, தார் சாலைகள் அமைக்கும் பணியை தொடங்கிய நகராட்சி நிர்வாகம், சாலைகளில் இருந்த பள்ளங்களில் ஜல்லிகள் நிரப்பி, முதல்கட்ட சீரமைப்பு பணிகளைத் தொடங்கியது.
15வது நிதிக்குழு திட்டத்தில் ரூ.43 லட்சம் மற்றும் ரூ.1.34 கோடியில் நகராட்சியில் குடியிருப்புப் பகுதியில் 30 இடங்களில் 1.20 கி.மீ. தொலைவுக்கு தார்ச்சாலை மேம்படுத்தப்பட்டது. 6-வது நிதிக் குழுத் திட்டத்தில் 13 சாலைகள், ரூ.1.08 கோடியில் புதுப்பிக்கப்பட்டது.
நமக்கு நாமே திட்டம்: உள்ளூர் அடிப்படைத் தேவைகளைப் மேம்படுத்த, தமிழ்நாடு அரசு நமக்கு நாமே திட்டத்தை செயல்படுத்தி வருகிறது. இத்திட்டத்தில், பொதுமக்கள் ஒரு பங்கு செலுத்தினால், அரசு 2 பங்கு வழங்குகிறது. இதன்மூலம், நகரின் வளர்ச்சிக்கு திட்டங்கள் நிறைவேற்றப்படுகிறது.
இத்திட்டத்துக்கு, பவானி நகராட்சி பகுதியைச் சேர்ந்த பொதுமக்கள் தங்கள் பங்களிப்பாக ரூ.36.32 லட்சம் செலுத்தினர். தமிழ்நாடு அரசு சார்பில் இரு மடங்கு தொகையாக ரூ.72.62 லட்சம் வழங்கப்பட்டது. இதையடுத்து, மொத்த தொகையான ரூ.1.10 கோடியில் 7 வார்டுகளில் உள்ள 11 தெருக்களில் ரூ.1.10 கோடியில் தார் சாலை மற்றும் வடிகால் அமைக்கப்பட்டுள்ளது.
பவானி நகராட்சி, 24-வது கல் தொழிலாளர் முதல் வீதி, கல் தொழிலாளர் முதல் வீதி, மண் தொழிலாளர் முதல் வீதி இணைக்கும் தார் சாலை, 23 மற்றும் 26 -வது வார்டு, பஞ்சாயத்து ஆபீஸ் ரோடு – ஜோதி விநாயகர் கோயில் சந்திப்பு வரை, 25-வது வார்டு, மாரியம்மன் கோயில் வீதி தார் சாலைகள் அமைக்கப்பட்டுள்ளது.
22-வது வார்டு விஷ்ணு தியேட்டர் வீதி, 26-வது வார்டு சீனிவாசபுரம் எக்ஸ்டென்சன் -1, 2 வீதிகள், ராயல் தியேட்டர் 2வது தெரு, 9-வது வார்டு சொக்கராயன்காடு உட்பட மொத்தம் ரூ.1.10 கோடியில் பணிகள் 2.31 கி.மீ. தொலைவுக்கு தார்ச்சாலை அமைக்கப்பட்டுள்ளது.
தமிழ்நாடு நகர்புற சாலை மேம்பாட்டுத் திட்டத்தின் கீழ் 1,2,3,4,7, 14-வது வார்டுகள் உட்பட 9.05 கோடி மதிப்பில் 100 தெருக்களில் 16.46 கி.மீ. தொலைவுக்கு சேதமடைந்த தார்ச்சாலைகள் புதுப்பிக்கும் பணி மேற்கொள்ளப்பட்டுள்ளது.
மொத்தம் 27 வார்டுகளில் உள்ள 32 கி.மீ. தொலைவுள்ள சாலைகளில் 25.27 கி.மீ. தொலைவுக்கு தார்ச்சாலை புதுப்பிக்கும் பணிகள் நிறைவடைந்துள்ளது. மேலும், சில இடங்களில் ஏற்கெனவே தொடங்கப்பட்ட பணிகள் மும்முரமாக நடைபெற்று வருகிறது.
தமிழ்நாடு அரசின் சீரிய நடவடிக்கையால் நகரப் பகுதியில் பொதுமக்கள் அதிகம் பயன்படுத்தும் குறுக்கு சாலைகள் மற்றும் வடிகால் வசதிகள் ஏற்படுத்தப்பட்டுள்ளதால் மகிழ்ச்சி அடைந்துள்ளனர்.
