தெஹ்ரான் : உலகின் சக்திவாய்ந்த போர் விமானம் என்று அமெரிக்கா கூறி வரும் F-35 வகை விமானங்களை ஈரான் சுட்டு வீழ்த்தியுள்ளது. எதிரி நாட்டால் தாக்க முடியாத விமானம் என்று கூறப்பட்டு வந்த ஸ்டெல்த் எஃப் 35 விமானத்தை ஈரான் வீழ்த்தியுள்ளது. இதுவரை எந்த நாட்டு ராணுவத்தாலும் தாக்கப்பட முடியாதது எஃப் 35 என்ற பெருமையை ஈரான் ராணுவம் தகர்த்துவிட்டது. ஈரானின் விமான எதிர்ப்பு தளவாடங்களை முற்றாக அழித்து விட்டோம் என அமெரிக்காவும் இஸ்ரேலும் கூறி வந்த நிலையில் எஃப் 35 விமானம் சுட்டு வீழ்த்தப்பட்டுள்ளது. F-35 விமானம் வெளியேற்றும் வெப்பத்தை வைத்து அதனை சுட்டு வீழ்த்தியுள்ளது ஈரான்.

அமெரிக்கா, இஸ்ரேல் ராணுவ தாக்குதலில் இதுவரை 1,444 ஈரானியர் கொல்லப்பட்டுள்ளனர், பல ஆயிரம் பேர் காயம் அடைந்தனர். பிப்ரவரி 28ம் தேதி தொடங்கி 20 நாட்களாக ஈரானை அமெரிக்காவும் இஸ்ரேலும் கொடூரமாக தாக்கி வருகின்றன. ஈரானின் விமானப்படை, விமான எதிர்ப்பு கட்டமைப்புகளை தகர்த்துவிட்டதாக அமெரிக்காவும் இஸ்ரேலும் கூறுகின்றன. ஈரானின் ஏவுகணை வீசும் திறனையும் முற்றாக ஒழித்துவிட்டதாகவும் அமெரிக்கா, இஸ்ரேல் அறிவித்துள்ளன. அமெரிக்கா, இஸ்ரேலின் பேச்சுகளுக்கு மாறாக ஏவுகணை தாக்குதலை ஈரான் தொடர்வதோடு இரு F 35-யையும் வீழ்த்தியது.

ஈரான் ராணுவத்தால் தாக்கப்பட்ட முதல் F-35 விமானம் மேற்கு ஆசிய நாடு ஒன்றில் அவசரமாக தரையிறக்கப்பட்டுள்ளது. தாங்கள்தான் தாக்கினோம் என்று ஈரான் கூறிய பிறகும் அவசரமாக தரையிறக்கப்பட்டது என்று அமெரிக்கா கூறியுள்ளது. மற்றொரு எஃப் 35 விமானத்தை பந்தர் அப்பாஸ் என்ற இடத்தில் தாக்கி உள்ளது ஈரானின் விமான எதிர்ப்பு படை. இதனிடையே அமெரிக்காவின் எஃப் 35 விமானத்தை ஈரான் சுட்டு வீழ்த்தி இருப்பதன் அதிர்வு, உலகம் முழுவதும் எதிரொலிக்கும் என்று நிபுணர்கள் தெரிவிக்கின்றனர்.

உலகம் முழுவதும் 15 நாடுகள் அமெரிக்காவின் எஃப் 35 விமானங்களை வாங்கி படையில் பயன்படுத்துகின்றன. இந்தியாவுக்கு கூட எஃப் 35 விமானங்களை விற்க தயார் என்று டிரம்ப் கூறிய போதிலும் நம் நாடு அதிக ஆர்வம் காட்டவில்லை. ஸ்டெல்த் F-35 விமானம் ஒன்றின் விலை ரூ.770 கோடி முதல் ரூ.1073 கோடி வரை ஆகிறது. ஒரு முறை ஏவுகணை வீச எஃப் 35 விமானத்தை பயன்படுத்த ரூ.33 லட்சம் முதல் ரூ.39 லட்சம் வரை செலவாகும் என்று நிபுணர்கள் தெரிவித்துள்ளனர்.