நன்றி குங்குமம் டாக்டர்

வலியை வெல்வோம்

சென்ற இதழில் கணுக்கால் மூட்டைப் பற்றி பார்த்தோம் . அதாவது கணுக்கால் மூட்டு மனித உடலின் மிக முக்கியமான மற்றும் அதிக அழுத்தத்தைத் தாங்கக்கூடிய மூட்டுகளில் ஒன்று, நாம் நடக்கும்போது, ஓடும்போது, குதிக்கும்போது, ஏறும்போது, இறங்கும்போது, சமநிலையைப் பேணும்போது எல்லாம் இந்த மூட்டு தொடர்ந்து செயல்படுகிறது.

இது வெறும் ஒரு எளிய கீல் மூட்டு வகையைச் சார்ந்தது மட்டும் அல்ல. பல எலும்புகள், பல லிகமென்ட்கள், தசைகள், தசைநாண்கள் மற்றும் சிறிய துணை மூட்டுகளால் ஆனது . மேலே குறிப்பிட்டுள்ளதைப் போல கணுக்கால் என்பது நமது உடலில் ஒவ்வொரு நாளும் அதிகம் வேலை செய்யும் பகுதி. நடப்பது, ஓடுவது, ஏறுவது, இறங்குவது, திடீரென்று திரும்புவது என்று எல்லாவற்றிலும் இது பங்கெடுக்கிறது. அதனால்தான் இந்த சிறிய மூட்டுக்கு காயம் ஏற்படுவது மிகவும் சாதாரணமாகிவிட்டது. ஒரு நாளைக்கு ஆயிரக்கணக்கானோர் கணுக்கால் வலியுடன் மருத்துவமனைக்கு செல்கிறார்கள்.

இவற்றில் பெரும்பாலானவை லிகமென்ட் சுளுக்கு (sprain) வகையைச் சேர்ந்தவை. சில சமயங்களில் எலும்பு முறிவு (fracture), உயர் கணுக்கால் சுளுக்கு (high ankle sprain), நீண்டகால நிலைத்தன்மையின்மை (chronic ankle instability) போன்றவையும் ஏற்படுகின்றன.

மிக அதிகம் வரும் காயம் – வெளிப்பக்க சுளுக்கு (lateral ankle sprain):

கணுக்கால் சுளுக்கு என்றால் பெரும்பாலானோர் நினைப்பது வெளிப்பக்க சுளுக்குதான். இது எல்லா கணுக்கால் காயங்களில் 85 முதல் 90 சதவீதம் வரை நிகழ்கிறது. கால் திடீரென்று அதாவது பாதம் உள் நோக்கி வளைந்து (inversion), அதே நேரத்தில் கால் விரல்கள் கீழ்நோக்கி (plantarflexion) இருக்கும் நிலையில்தான் அதிகம் ஏற்படுகிறது.

உதாரணமாக

*படிக்கட்டில் இறங்கும்போது கால் தவறுதல்

*கல் அல்லது ஓரத்தில் கால் பதிதல்

*கால்பந்து, கிரிக்கெட், பாஸ்கெட்பால் விளையாடும் போது கால் திடீரென திருப்புவதால்.

இந்த இயக்கத்தில் முதலில் பாதிக்கப்படுவது வெளிப்பக்கத்தில் இருக்கும் ஒரு சிறிய இணைப்புத் திசு. அதாவது முன்பக்க கணுக்கால்-கணுக்கால் இணைப்பு (Anterior talofibular ligament – ATFL).
இது மிகவும் பலவீனமானது என்பதால் எளிதில் இழுக்கப்பட்டு (over stretch) கிழிந்துவிடும். பாதிப்பு அதிகமாக இருந்தால் அடுத்த இணைப்பான குதிகால்-கணுக்கால் இணைப்பு (Calcaneofibular ligament – CFL) கிழியும். மிகக் கடுமையாக இருந்தால் பின்பக்க கணுக்கால்-கணுக்கால் இணைப்பு (Posterior talofibular ligament – PTFL) ஆகியவையும் பாதிக்கப்படலாம்.

உங்கள் பாதத்தை உள்நோக்கி அப்படியே திருப்பி 5 வினாடி வைத்திருங்கள். வலி வருகிறதா? அல்லது பழைய சுளுக்கு இருந்தால் இழுப்பு அதிகமாகிறதா? இந்த அறிகுறிகள் இருந்தால் உங்களுக்கும் சிறிது பாதிப்பு இருக்கலாம் அல்லது சரியான வலுவேற்றும் பயிற்சி இல்லாமல் மூட்டு பலவீனமாக இருக்கலாம்.

சுளுக்கு எவ்வளவு கடுமை என்று எப்படி தெரியும்?

ஆரம்பத்தில் எழுதிய கட்டுரைகளில் இதைப் பற்றி படித்து இருப்போம்.இருப்பினும் அதைப்பற்றி தற்போது மீண்டும் நினைவுறுத்துகிறேன்.சுளுக்குகளை தீவிரத்தின் அடிப்படையில் மூன்று பிரிவுகளாக வகைப்படுத்தலாம்.

1.முதல் நிலை (Grade I) சிறிய இழுப்பு மற்றும் நுண்ணிய கிழிவு மட்டுமே கொண்டது. வீக்கம் குறைவு, வலி லேசானது, எடை தாங்கி நடக்க முடியும்.

2.இரண்டாம் நிலை (Grade II) பகுதி கிழிவு உள்ளது. வீக்கம் மற்றும் காயம் (bruising) அதிகம், எடை தாங்கி நடக்க சிரமம், சிறிது நிலைத்தன்மையின்மை இருக்கும்.

3. மூன்றாம் நிலை (Grade III) முழுமையான கிழிவு. கடுமையான வீக்கம், காயம், எடை தாங்க முடியாது, மூட்டு நிலைத்தன்மை இழந்து இருக்கும்.

உள் பக்கம் வரும் சுளுக்கு(medial ankle sprain)
– ஏன் அரிது?

வெளிப்பக்க சுளுக்கு போலல்லாமல் உள் பக்கம் வரும் சுளுக்கு மிகக் குறைவு. ஏனென்றால் உள்ளே இருக்கும் இணைப்பு (டெல்டாய்டு இணைப்பு) மிகவும் வலுவானது. இது வருவதற்கு கால் வெளியே சாய்ந்து (eversion) பிரியும் நிலை (abduction) வேண்டும். இது பெரிய விபத்து அல்லது கடுமையான விசையால் ஏற்படும் தாக்கத்தால் மட்டுமே நிகழும். உள்ளே சுளுக்கு வந்தால் பெரும்பாலும் உள் புடைப்பு எலும்பு முறிவுடன் சேர்ந்து வரும் (medial malleolus fracture).

உயர் கணுக்கால் சுளுக்கு (high ankle sprain அல்லது syndesmotic injury):

இது சாதாரண சுளுக்கு இல்லை. மறக்க முடியாத வலியை உண்டாக்கும்.இது கீழ் கணுக்கால்-கணுக்கால் இணைப்பு மூட்டு (Distal tibiofibular syndesmosis) பாதிக்கப்படுவதால் ஏற்படுகிறது. இதற்கான இயக்கம் கால் வெளியே சுழற்றப்பட்டு (external rotation) மேல்நோக்கி தூக்கப்பட்ட (dorsiflexion) நிலை. இதில் முன்பக்க கீழ் கணுக்கால்-கணுக்கால் இணைப்பு (AITFL), பின்பக்க கீழ் கணுக்கால்-கணுக்கால் இணைப்பு (PITFL), இடைநிலை இணைப்பு (Interosseous ligament) ஆகியவை பாதிக்கப்படும்.பெரும்பாலும் கால்பந்து, ரக்பி, ஹாக்கி போன்றவை விளையாடுபவர்களுக்கு வரும். வலி மிகக் கடுமையாக இருக்கும். வீக்கம் அதிகம். ஆனால் முக்கிய பிரச்சினை – குணமடைய மிக நீண்ட காலம் ஆகும் (4 முதல் 6 மாதங்கள் வரை).

எலும்பு முறிவு கணுக்கால் எலும்பு முறிவு (ankle fractures):

பெரும்பாலும் பெரிய விபத்து, உயரத்தில் இருந்து விழுவது, கார் ஆக்சிடன்ட் போன்றவற்றால் வரும்.
மிக அதிகம் வரும் வகை – வெளிப்பக்க எலும்பு (கீழ்க்கால் சிறிய எலும்பு) சுழல் முறிவு.

அறிகுறிகள்

*மிக அதிக வலி
*எடை தாங்க முடியாமை
*புடைப்பு பகுதியில் தொட்டால் கடுமையான வலி.

இப்படி இருந்தால் உடனடியாக மருத்துவரை அணுகி எக்ஸ்ரே எடுக்க வேண்டும்.

நீண்டகால கணுக்கால் நிலைத்தன்மையின்மை (Chronic Ankle Instability – CAI):

இது ஆரம்ப சுளுக்கு சரியாக குணமடையாமல் இருந்தால் ஏற்படும்.

சுமார் 20-40% சுளுக்கு நோயாளிகள் இதற்கு ஆளாகின்றனர்.

CAI இரண்டு வகை

1. இயந்திர நிலைத்தன்மையின்மை (mechanical instability) –

*லிகமென்ட் தளர்வு காரணமாக மூட்டு அதிகம் நகரும்.

2. செயல்பாட்டு நிலைத்தன்மையின்மை (functional instability) –

*உணர்வு குறைபாடு (proprioception deficit),
*தசை பலவீனம்,
*நரம்பு-தசை கட்டுப்பாடு குறைவு காரணமாக ‘கால் தள்ளாடுதல்’ உணர்வு.

பலருக்கு ஒருமுறை சுளுக்கு ஆன பிறகு கணுக்கால் “நம்பிக்கை இழந்துவிடும்”. அதாவது ஒரு காலில் நின்றால் தள்ளாடுதல்.  சமமில்லாத தரையில் நடக்கும்போது கால் திடீரென்று உள்ளே சாய்ந்துவிடும் மீண்டும் மீண்டும் அதே இடத்தில் சுளுக்கு ஏற்படும்.

இதற்கு காரணம்

*இணைப்பு தளர்ந்து போனது
*கணுக்கால் உணர்வு (நிலை உணர்தல்) குறைந்து போனது
*சுற்றியுள்ள தசைகள் பலவீன மடைதல்.

இதனால் பின்னர் வேறு பிரச்னைகளும் வரலாம் அதாவது கணுக்கால் உள்ளே cartilage சேதம், தசைநார் சிக்கல், நாள்பட்ட வலி போன்றவை.

CAI-இல் தொடர்புடைய பிற பிரச்னைகள்

*டாலஸ் எலும்பில் cartilage பாதிப்பு (osteochondral lesion), முன்பக்க இடுக்கல் (anterior impingement),
*பெரோனியல் தசைநார் சிதைவு அல்லது subluxation, sinus tarsi syndrome,
*நரம்பியல் பாதிப்பு, நாள்பட்ட வலி.

பாதிப்புகளின் பொதுவான அறிகுறிகள்

*கூர்மையான வலி,
*வீக்கம்,
*காயம்,
*எடை தாங்க இயலாமை,
*நடக்க சிரமம்,
*மீண்டும் மீண்டும் தள்ளாடுதல்.
*நீண்டகால வலி,
*விறைப்பு,
*பலவீனம்,
*உணர்வு குறைவு ஏற்படும்.

கணுக்கால் பாதிப்புகளில் 90 சதவீதம் வெளிப்பக்க சுளுக்குதான். அதுவும் கால் உள்ளே சாய்ந்து கீழ்நோக்கி இருக்கும்போது வருகிறது.

உள் – சுளுக்கு அரிது

உயர் சுளுக்கு நீண்ட நாட்கள் வலி தரும். எலும்பு முறிவு பெரிய விபத்தில் வரும். ஒருமுறை காயம் ஆன பிறகு சரியாக பயிற்சி செய்யாவிட்டால் மீண்டும் மீண்டும் வரும். எனவே சிறிய சுளுக்கு ஆனாலும் முழுமையாக குணமாகும் வரை ஓய்வு, ஐஸ் ஒத்தடம் தருவது, கால் உயர்த்தி வைத்தல், பிறகு தசை வலுப்படுத்தும் பயிற்சி செய்வது மிக முக்கியம்.  அறுவைசிகிச்சை செய்யும் சூழல் ஏற்பட்டாலும் தொடர்ந்து இதற்கான வலுவேற்றும் பயிற்சிகளை செய்ய வேண்டும். அறுவைசிகிச்சைக்கு பின்பான Rehabilitation மிக மிக அவசியம்.