கோவை மாவட்டத்துல 11ம் எங்களுக்குத்தான்…! இருக்கிறதே 10 தானே…? எஸ்.பி.யை கலாய்த்த ரத்தத்தின் ரத்தங்கள்

தேசிய ஜனநாயக கூட்டணி சார்பில், பெண்கள் பாதுகாப்பை வலியுறுத்தி கோவையில் நேற்று முன்தினம் கண்டன ஆர்ப்பாட்டம் நடந்தது. இதில், பாஜ முன்னாள் மாநில தலைவர் அண்ணாமலை உள்பட பல்வேறு தலைவர்கள் பேசினர். இதில், முன்னாள் அமைச்சர் எஸ்.பி.வேலுமணி பேசியதாவது: நாங்கள் ஆட்சிக்கு வந்ததும் ஒவ்வொரு குடும்பத்துக்கும் தலா 10 ஆயிரம் ரூபாய் கொடுப்போம். இது இல்லாமல், பெண்கள் வங்கி கணக்கில் மாதம்தோறும் தலா 2 ஆயிரம் ரூபாய் போடுவோம். பெண்களுக்கு பாதுகாப்பு கொடுப்போம்.

பெண்களை ஒருபோதும் கைவிட மாட்ேடாம். பெண்கள் நலனுக்காக 16 திட்டங்கள் வைத்துள்ளோம். இதை எல்லாம் செயல்படுத்துவோம். இதற்கு நீங்கள் எல்லோரும் எங்களுக்கு ஓட்டு போட வேண்டும். கோவை மாவட்டம் 2006ல் இருந்து அதிமுக கோட்டையாக இருந்து வருகிறது. கடந்த 2021 தேர்தலிலும் அதிமுக கோட்டையாகத்தான் இருந்தது. இப்போ, கொஞ்சம் மாறியிருக்கு. ஆனாலும், மக்கள் எங்களுக்குத்தான் ஓட்டு போடுவார்கள். கோவை மாவட்டத்தில் உள்ள 11 தொகுதிகளையும் நாங்கள் கைப்பற்றுவோம். இவ்வாறு எஸ்.பி.வேலுமணி பேசினார்.

இப்படி பேசி முடித்ததும், அருகில் இருந்த தொண்டர்கள் மற்றும் நிர்வாகிகள் முணு முணுத்தனர். ‘’ஏன்பா… கோவை மாவட்டத்தில் மொத்தமே 10 தொகுதிதான் இருக்கு… இதுல, நம்ம தலைவரு, 11 தொகுதிகளையும் கைப்பற்றுவோம்… என கறாராக சொல்றாரே… மீதமுள்ள ஒரு தொகுதிக்கு நாம எங்கே போறது…?’’ என கலாய்த்தனர்.