புதுக்கோட்டையில் அமைச்சர் ரகுபதி நேற்று அளித்த பேட்டி: காஸ் சிலிண்டர் தட்டுப்பாடு நீக்க வேண்டிய வழிவகைகளையும், மாற்று வழி வகைகளையும் தமிழ்நாடு அரசு நிச்சயமாக செய்து தரும். விஜய்யை நாங்கள் ஒரு பொருட்டாகவே எடுத்துக்கொள்ளவில்லை. விஜய்யுடன் பவன் கல்யாண் பேசினாலும், அவன் கல்யாணம் பேசினாலும் எங்களுக்கு கவலை இல்லை. எங்களை பொறுத்தவரை மூன்றாவது அணி, நான்காவது அணி என்று எத்தனை அணி வந்தாலும் எங்கள் அணி மக்களுக்கு நல்லது செய்யும். மக்கள் வரவேற்க கூடிய அணியாக இருக்கிறது.

இலவசங்கள் என்று நாங்கள் சொல்லவில்லை. அவர்களுக்கு உரிமை என்று தான் சொல்கின்றோம். மகளிர் உரிமைத்தொகை என்று வழங்குகின்றோம். அந்த பெண்கள், மற்றவரிடம் எதிர்பார்ப்பதை விட அரசே ஆயிரம் ரூபாய் கொடுக்கும்போது மகிழ்ச்சி அடைகின்றனர். இது உதவித்தொகை அல்ல உரிமைத்தொகை. எங்களால் மட்டுமே 2000 ரூபாய் தர முடியும். எடப்பாடி பழனிசாமியால் அது முடியாது. தமிழக வெற்றிக்கழகம் மாற்று கட்சி அல்ல, அது விளம்பர கட்சி. பாஜவின் ஏ டீம், பி டீம் அல்ல சி டீம் விஜய். இதை நான் ஆரம்பத்தில் இருந்தே சொல்லி வருகிறேன். இன்னும் சொல்லப்போனால் அமித்ஷாவின் ஸ்லீப்பர்செல் தான் விஜய். இவ்வாறு அவர் கூறினார்.