மும்பை: 10வது ஐசிசி டி20 உலக கோப்பை தொடர் வெற்றிகரமாக நிறைவடைந்த நிலையில், இந்த ஆண்டுக்கான சிறந்த டி20 அணியை ஐசிசி அறிவித்துள்ளது. வெஸ்ட் இண்டீஸ் ஜாம்பவான் இயான் பிஷப், இங்கிலாந்து முன்னாள் கேப்டன் இயன் மோர்கன், வர்ணனையாளர் நடாலி ஜெர்மானோஸ், ஐசிசி பிரதிநிதி கவுரவ் சாக்சேனா மற்றும் இலங்கை செய்தியாளர் ரெக்ஸ் கிளமென்டைன் ஆகியோர் அடங்கிய தேர்வுக் குழு இதைத் தேர்ந்தெடுத்தது.

இந்த அணியின் தொடக்க வீரராக டி20 உலக கோப்பை தொடர் நாயகனான இந்தியாவின் சஞ்சு சாம்சன் தேர்வு செய்யப்பட்டுள்ளார். சாம்சன் 5 போட்டிகளில் 321 ரன்கள் எடுத்திருந்தார். அரை இறுதி, இறுதிப் போட்டிகளில் தலா 89 ரன்கள் என நாக்அவுட் போட்டிகளில் இந்திய வெற்றிக்கு முக்கிய காரணமான சாம்சன் இந்த அணியின் விக்கெட் கீப்பராகவும் தேர்வு செய்யப்பட்டுள்ளார்.

மற்றொரு தொடக்க வீரராக பாகிஸ்தானின் சாகிப்சாதா ஃபர்ஹான் உள்ளார். 3வது இடத்தில், 9 போட்டிகளில் 317 ரன்கள் எடுத்து இந்தியாவிற்கு அதிரடி தொடக்கங்களை ஏற்படுத்தி தந்த இந்தியாவின் இஷான் கிஷன் உள்ளார். 4வது இடத்திற்கு 3 அரைசதம் உட்பட 286 ரன்கள் எடுத்து, தென் ஆப்பிரிக்க அணியை சிறப்பாக வழிநடத்திய கேப்டன் எய்டன் மார்க்ரம் தேர்வு செய்யப்பட்டுள்ளார்.

5வது இடத்தில் 9 போட்டிகளில் 2 அரைசதங்களுடன் 217 ரன்கள் மற்றும் 9 விக்கெட்டுகளை கைப்பற்றிய இந்திய ஆல்-ரவுண்டர் ஹர்திக் பாண்டியா உள்ளார். 6வது இடத்தை இங்கிலாந்து ஆல்-ரவுண்டர் வில் ஜாக்ஸும், 7வது இடத்தை வெஸ்ட் இண்டீஸ் ஆல்ரவுண்டர் ஜேசன் ஹோல்டரும் பிடித்துள்ளனர். 8வது இடத்திற்கு 8 போட்டிகளில் 14 விக்கெட்டுகளையும், பைனலில் கட்டுக்கோப்பாக பந்துவீசி 15 ரன்கள் மட்ச்டுமே கொடுத்து 4 விக்கெட்டுகளை கைப்பற்றிய இந்திய நட்சத்திர பவுலர் ஜஸ்பிரித் பும்ரா தேர்வு செய்யப்பட்டுள்ளார்.

9வது இடத்தை 7 போட்டிகளில் 12 விக்கெட்டுகளை வீழ்த்திய தென்ஆப்பிரிக்காவின் லுங்கி இங்கிடி, பிடித்துள்ளார். இந்த அணியின் 10வது வீரராக 8 போட்டிகளில் 13 விக்கெட்டுகளை சாய்த்த இங்கிலாந்தின் முன்னணி சுழற்பந்துவீச்சாளர் அடில் ரஷித் உள்ளார். 11வது இடத்திற்கு 6 போட்டிகளில் 13 விக்கெட்டுகளை வீழ்த்தி ஜிம்பாப்வே அணியின் வெற்றியில் முக்கிய பங்காற்றிய பிளெசிங் முசரபானி தேர்வு செய்யப்பட்டுள்ளார். அணியில் 12வது வீரராக அமெரிக்காவின் ஷாட்லி வான் ஷால்க்விக் தேர்ந்தெடுக்கப்பட்டார். இவர் 4 போட்டிகளில் 13 விக்கெட்டுகளை வீழ்த்தியதோடு இந்தியா, பாகிஸ்தான் அணிகளுக்கு எதிராக தலா நான்கு விக்கெட்டுகள் வீழ்த்தியது குறிப்பிடத்தக்கது.