டெல்லி: ரஷ்யாவிடம் இந்தியா கச்சா எண்ணெய் வாங்கலாம் என அமெரிக்கா அனுமதிப்பது வெட்கக் கேடானது என காங்கிரஸ் கட்சி தெரிவித்துள்ளது. ஈரான் – இஸ்ரேல் போர் காரணமாக உலக அளவில் கச்சா எண்ணெய் தட்டுப்பாடு ஏற்படும் சூழல் ஏற்பட்டுள்ளது. இதனிடையே இந்திய எண்ணெய் நிறுவனங்கள் ரஷ்யாவிடம் இருந்து கச்சா எண்ணெய் கொள்முதல் செய்ய அமெரிக்கா அனுமதி வழங்கியது. ரஷ்யாவிடம் இருந்து இந்தியா 30 நாட்களுக்கு கச்சா எண்ணெயை வாங்கிக் கொள்ளலாம். உலக சந்தையில் கச்சா எண்ணெய் தட்டுப்பாட்டை போக்கும் வகையில் நடவடிக்கை என்று அமெரிக்கா விளக்கம் அளித்துள்ளது.
இந்நிலையில் இது குறித்து எக்ஸ் தளத்தில் காங்கிரஸ் கட்சி வெளியிட்டுள்ள பதிவில்; கச்சா எண்ணெய் வாங்குவது அல்லது கூடாது என அமெரிக்கா தீர்மானிக்கும் நிலைக்கு இந்தியாவை மோடி அரசு தள்ளிவிட்டது. இந்தியா கச்சா எண்ணெய் வாங்கும் முடிவை பிரதமர் மோடியோ, ஒன்றிய அரசோ எடுப்பதில்லை. இந்தியா கச்சா எண்ணெய் வாங்குவதை தீர்மானிக்க அமெரிக்கா யார் என்று இந்திய குடிமக்கள் கேட்கிறார்கள். இந்தியா எந்த நாட்டுக்கும் அடிமையில்லை; இந்தியா இறையாண்மைமிக்க சுதந்திர நாடு.
அமெரிக்காவிடம் பிரதமர் மோடிகேள்வி எழுப்ப மாட்டார்; மோடி இந்தியாவை அமெரிக்காவிடம் அடகு வைத்துவிட்டார். ரஷ்யாவிடம் இந்தியா கச்சா எண்ணெய் வாங்கலாம் என அமெரிக்கா அனுமதிப்பது வெட்கக் கேடானது என்று குறிப்பிட்டுள்ளது.
