சேலம்: காஸ் சிலிண்டர் விலை மாதந்தோறும் 1ம் தேதி மாற்றியமைக்கப்படுகிறது. நேற்று அதிகாலை வெளியான நடப்பு மாதத்திற்கான (மார்ச்) விலை பட்டியலில் வீட்டு உபயோக சிலிண்டர் விலையில் மாற்றத்தை ஏற்படுத்தாமல், அதே விலையில் நீடிக்க செய்துள்ளனர்.

அதே வேளையில், 19 கிலோ எடை கொண்ட வர்த்தக காஸ் சிலிண்டர் விலை, ரூ.28 முதல் ரூ.31 வரை அதிகரிக்கப்பட்டது. சென்னையில் கடந்த மாதம் வர்த்தக காஸ் சிலிண்டர் விலை ரூ.1,899.50 என இருந்தநிலையில், ரூ.29.50 அதிகரித்து ரூ.1,929 ஆகவும், சேலத்தில் ரூ.1,848ல் இருந்து ரூ.30 அதிகரித்து ரூ.1,878 ஆகவும் நிர்ணயிக்கப்பட்டுள்ளது.

டெல்லியில் ரூ.28 அதிகரித்து ரூ.1,768.50 ஆகவும், மும்பையில் ரூ.28.50 அதிகரித்து ரூ.1,720.50 ஆகவும், கொல்கத்தாவில் ரூ.31 அதிகரித்து ரூ.1,875.50 ஆகவும் விலை நிர்ணயம் செய்யப்பட்டுள்ளது. கடந்த 3 மாதங்களில் மட்டும், வர்த்தக காஸ் சிலிண்டர் விலை ரூ.190 அதிகரித்துள்ளது.