சென்னை: ஈரான் மீது அமெரிக்கா, இஸ்ரேல் தாக்குதல் எதிரொலியாக தங்கம் விலை நேற்று அதிரடியாக பவுனுக்கு ரூ.5200 உயர்ந்தது. வெள்ளியும் கிலோவுக்கு ரூ.25 ஆயிரம் எகிறியது. ஒரே நாளில் 2 முறை தங்கம், வெள்ளி விலை உயர்ந்தால் நகை வாங்குவோர் கடும் அதிர்ச்சியடைந்துள்ளனர். தங்கம் விலை கடந்த 3 வாரமாக ஏற்றம் இறக்கத்துடன் காணப்பட்டு வருகிறது. இதன் ஒரு பகுதியாக தங்கம் விலை கடந்த 23ம் தேதி வாரம் தொடக்க நாள் அன்று பவுனுக்கு ரூ.1,440 ஆகவும், 24ம் தேதி பவுனுக்கு ரூ.240, 25ம் தேதி பவுன் ரூ.320 என்றும் உயர்ந்து வந்தது. 26ம் தேதி அன்று பவுனுக்கு ரூ.80 குறைந்தது. தொடர்ந்து நேற்று முன்தினம் தங்கம் விலை பவுனுக்கு ரூ.160 குறைந்து ஒரு பவுன் ரூ.1,19,200க்கு விற்பனையானது.
இந்நிலையில் வார இறுதி நாளான நேற்று காலையில் தங்கம் விலை அதிரடியாக உயர்ந்தது. நேற்று காலையில் கிராமுக்கு ரூ.300 உயர்ந்து ஒரு கிராம் ரூ.15,200க்கும், பவுனுக்கு ரூ.2400 உயர்ந்து ஒரு பவுன் ரூ.1,21,600க்கும் விற்பனையானது. இதேபோல வெள்ளி விலையும் உயர்ந்தது. வெள்ளி கிராமுக்கு ரூ.5 உயர்ந்து ஒரு கிராம் ரூ.300க்கும், கிலோவுக்கு ரூ.5 ஆயிரம் உயர்ந்து பார் வெள்ளி ரூ.3 லட்சத்துக்கும் விற்பனையானது. இந்த அதிர்ச்சியில் இருந்து நகை வாங்குபவர்கள் மீள்வதற்குள் பிற்பகலில் தங்கம், வெள்ளி விலை மேலும் அதிரடியாக உயர்வை சந்தித்தது.
அதாவது, நேற்று பிற்பகலில் வெள்ளி கிராமுக்கு ரூ.350 உயர்ந்து ஒரு கிராம் ரூ.15,550க்கும், பவுனுக்கு ரூ.2800 உயர்ந்து, ஒரு பவுன் ரூ.1,24,400க்கும் விற்பனையானது. இதன் மூலம் தங்கம் விலை காலை, மாலை என ஒரே நாளில் பவுனுக்கு ரூ.5200 உயர்ந்துள்ளது. பிற்பகலில் வெள்ளி விலையும் அதிரடி உயர்வை சந்தித்தது. வெள்ளி விலை கிராமுக்கு ரூ.20 உயர்ந்து ஒரு கிராம் வெள்ளி ரூ.320க்கும், கிலோவுக்கு ரூ.20 ஆயிரம் உயர்ந்து, பார் வெள்ளி ரூ.3 லட்சத்து 20 ஆயிரத்துக்கும் விற்பனையானது. வெள்ளி விலை காலை, மாலை என நேற்று ஒரே நாளில் கிலோவுக்கு ரூ.25 ஆயிரம் உயர்ந்துள்ளது. வார இறுதி நாளில் தங்கம், வெள்ளி விலை அதிரடியாக உயர்ந்துள்ளது நகை வாங்குவோரை கடும் அதிர்ச்சியில் ஆழ்த்தியுள்ளது. இந்த விலை ஏற்றத்துக்கு போர் பதற்றமே முக்கிய காரணமாக கூறப்படுகிறது.
