மதுரை அதிமுகவில் மாஜி அமைச்சர்கள் செல்லூர் ராஜூ, ஆர்பி.உதயகுமாருடன், ராஜன் செல்லப்பா எம்எல்ஏ ஆகியோர் மும்மூர்த்திகளாக தங்களை முன்னெடுத்து வருகின்றனர். இதில் 4வது அணியாக மருத்துவரணி மாநில இணை செயலாளர் டாக்டர் சரவணனும் களமிறங்கியுள்ளார். இந்த முறை எப்படியாவது இலைக்கட்சி தலைமையை ஈர்த்து சீட் வாங்கி விட வேண்டுமென்ற தீராத தாகத்தில் வலம் வரும் இந்த டாக்டரின் சமீபத்திய அஸ்திரம்தான் ‘சரவணா கிச்சன்’.

மலிவு விலையில் உணவளித்து, மக்கள் மனங்களைக் கவர்ந்து வாக்குகளை வாரி விடலாம் என்ற ஐடியாவில், தனது டிரஸ்ட் பெயரில் ஜன.19ல் இந்த நடமாடும் உணவகத்தை துவக்கினார். வெறும் 10 ரூபாய்க்கு 3 இட்லி, ஒரு டீயும் வழங்குவதாக அறிவித்து தெருக்கள்தோறும் தினமும் இந்த வாகனம் வலம் வருகிறது. ஆனாலும், போதிய வரவேற்பில்லை. பல இடங்களில் காசு வாங்காம இட்லி, டீ விநியோகம் நடத்தவும் உத்தரவிடப்பட்டது. தற்போது மற்றொரு ஐடியாவாக மாலையில் ரூ.20க்கு பிரியாணியில் முட்டை, சிக்கன் வழங்கும் புதிய டிஷ் அறிமுகப்படுத்தப்பட்டுள்ளது.

குறிப்பாக, மதுரை வடக்கு தொகுதிக்குத்தான் அதிகமதிகம் இந்த வாகனம் வருகிறது. விற்றுப்பாருங்கள். இயலாவிட்டால் இலவசமாக கொடுத்து விட்டு வாருங்கள் எனச் சொல்லி விடுகிறாராம்… தலைமையை கவர இவரு என்னென்ன கம்பி கட்டுற வேலை எல்லாம் பார்க்கிறார் பாருங்க… நடக்கட்டும்… நடக்கட்டும்.. நாங்க என்ன பண்றோம்னு பாருங்க என்று, மதுரையின் மும்மூர்த்திகள் இதுபோல வேறெதும் திட்டமிருக்கா என ஆதரவாளர்களை குடையத் தொடங்கியுள்ளனர்.