கவுஹாத்தி: அசாம் மாநிலத்தில் ஒரு சில மாதங்களில் சட்டமன்ற தேர்தல் நடைபெற உள்ளது. இங்கு கடந்த ஆண்டு டிசம்பர் 27ம் தேதி வரைவு வாக்காளர் பட்டியலை தேர்தல் ஆணையம் வெளியிட்டது. இந்த பட்டியலில் 10.56 லட்சம் வாக்காளர்களின் பெயர்கள் நீக்கப்பட்டிருந்தன. மொத்தம் 2.52 கோடி வாக்காளர்களின் பெயர் மட்டுமே வரைவு பட்டியலில் இடம் பெற்றிருந்தது. இந்நிலையில் இறுதி வாக்காளர் பட்டியல் நேற்று வெளியிடப்பட்டது.

இந்த பட்டியலில் மொத்தம் 2.49கோடி வாக்காளர்கள் இடம் பெற்றுள்ளனர். இறுதி பட்டியலில் 2.43 லட்சத்திற்கும் அதிகமான பெயர்கள் வரைவு பட்டியலில் இருந்து நீக்கப்பட்டதாக அறிக்கையில் குறிப்பிடப்பட்டுள்ளது. முதல்வர் தொகுதியில் 2 சதவீதம் நீக்கம்: அசாமில் இறுதி வாக்காளர் பட்டியலில் முதல்வர் ஹிமந்த பிஸ்வா சர்மாவின் ஜலுப்காரி தொகுதியில் மொத்தம் 2.10லட்சம் வாக்காளர்களில் 2.05 சதவீதம் பேர் நீக்கப்பட்டுள்ளனர்.